ءبىر جىلدىڭ قورىتىندىسى بويىنشا 17 وبلىس پەن 3 قالانىڭ اراسىنان تۇركىستان وبلىسى ۇزدىك اتاندى. وڭتۇستىكتىڭ سپورتشىلارى بىلتىرعى جارىستاردا جالپى سانى 58 التىن, 52 كۇمىس, 65 قولا جۇلدەمەن كوش باستادى. ونىڭ 13 التىنىن تۇركىستاندىقتار قازاق كۇرەسىنەن ەنشىلەپ, رەكوردتىق كورسەتكىشتى تىركەدى. ءوڭىر وكىلدەرى ۇلتتىق سپورتتىڭ دامۋىن جۇيەلى جولعا قويعان.
«بۇگىنگى تاڭدا تۇركىستان وبلىسىندا 7 وبلىستىق, 23 اۋداندىق, 7 قالالىق سپورت مەكەمەسىندە ۇلتتىق سپورت تۇرلەرىنەن بولىمشەلەر جۇمىس ىستەيدى. سونىمەن قاتار وبلىستىق دەنەشىنىقتىرۋ جانە سپورت باسقارماسى سپورت مەكتەپتەرىندەگى رەگلامەنتتىڭ ساقتالۋىن قاداعالاپ, جاتتىقتىرۋشىلار مەن ادىسكەرلەرگە وقۋ-جاتتىعۋ ساباقتارىنا ءاردايىم ادىستەمەلىك كومەك كورسەتەدى. وتكەن جىلى ۇلتتىق سپورت تۇرلەرىنەن جارىس ەرەجەلەرىنە وزگەرىستەر مەن تولىقتىرۋلار ەنگىزىلدى. اتاپ ايتقاندا, اۋدارىسپاقتان بۇرىن 8 سالماق دارەجەسىندە جارىس وتسە, بيىل 9 سالماق دارەجەسىندە باق سىناستى. سونداي-اق تەڭگە ءىلۋ جانە جامبى اتۋ سپورتىنان بۇرىن 3 ستيل بويىنشا 1 عانا سپورتشى قاتىساتىن, بيىل 3 ستيلگە 3 سپورتشى قاتىسا الاتىن مۇمكىندىك تۋدى. قاتىسۋشىلار سانى كوبەيدى. ناتيجەسىندە, سپورتشىلارىمىز تاماشا ونەر كورسەتىپ, ەلىمىزدەگى ۇلتتىق سپورت تۇرلەرىنەن ەڭ ۇزدىك ءوڭىر ەكەنىن دالەلدەپ, جالپىكوماندالىق ەسەپتە 1-ورىندى يەلەندى», دەدى تۇركىستان وبلىستىق دەنەشىنىقتىرۋ جانە سپورت باسقارماسىنىڭ باسشىسى قانات جولدىقارەۆ.
ۇلتتىق جانە ات سپورتى تۇرلەرى ورتالىعى ءباسپاسوز قىزمەتىنىڭ حابارلاۋىنشا, رەيتينگتە ەكىنشى ورىندى استانا قالاسى يەلەندى. ەلوردالىقتار اتالعان جارىستاردان 24 التىن, 19 كۇمىس, 28 قولا جۇلدە ەنشىلەدى. اسىرەسە استانالىق ءداستۇرلى ساداق اتۋشىلار الدىنا جان سالمادى. ال ۇزدىك ۇشتىكتى شىمكەنت قالاسىنىڭ سپورتشىلارى تۇيىندەدى. مەگاپوليس نامىسىن قورعاعان وعلاندار 24 التىن,19 كۇمىس, 20 قولا جەڭىپ العان. شىمقالادا دا قازاق كۇرەسىنىڭ ءباسى جوعارى. 24 التىننىڭ 11-ءى قازاق كۇرەسىنىڭ بالۋاندارىنا تيەسىلى. وكىنىشكە قاراي, ۇلتتىق سپورتتى ءالى دە دامىتۋدى قاجەت ەتەتىن ايماقتار بار. اسىرەسە قوستاناي, ۇلىتاۋ, شىعىس قازاقستان وبلىستارىنىڭ ناتيجەلەرى تومەن.
«كەيىنگى جىلدارى ەلىمىزدە ۇلتتىق سپورت قارقىندى دامىپ كەلەدى. ونىڭ دالەلى 2023 جىلدىڭ وزىندە ءبىزدىڭ سپورتشىلار حالىقارالىق ارەنالارداعى جارىستاردان 35 التىن ولجالادى. قازىر ورتالىققا قارايتىن 11 سپورت ءتۇرى بار. ارقايسىسىنىڭ دامۋى جۇيەلى جولعا قويىلعان. سونىمەن قاتار ولاردى زاماناۋي تالاپتارعا ساي قىلۋ ماقساتىندا سوڭعى ۇلگىدەگى تەحنولوگيالاردى دا قوسىپ جاتىرمىز. ءبىز جىل سايىن ۇلتتىق سپورتتاعى ۇزدىك وڭىرلەردى انىقتاپ وتىرامىز. وزدەرىڭىز بىلەتىندەي, بۇل جاعىنان ەلىمىزدىڭ وڭتۇستىك ايماعى الدا تۇر. اسىرەسە تۇركىستان وبلىسى وزگەلەردەن كوش ىلگەرى. مۇنىڭ بارلىعى – ايماقتاعى سپورتقا جاۋاپتى مامانداردىڭ, سپورت باسقارماسىنىڭ جۇيەلى جۇمىسىنىڭ ارقاسى. سونىمەن قاتار استانا قالاسى قارقىندى دامۋدىڭ جولىنا تۇسكەن. بۇل وڭىردە اسىق اتۋ, توعىزقۇمالاق, ءداستۇرلى ساداق اتۋ, قۇسبەگىلىك جانە قازاق كۇرەسىنىڭ وكىلدەرى الدا كەلەدى. دەگەنمەن ات سپورتىنا قاتىستى ماسەلەلەر بار. بۇل الداعى ۋاقىتتىڭ ەنشىسىندە شەشىلەتىن دۇنيە دەپ ەسەپتەيمىن. بۇيىرسا, بارلىق ناتيجەنىڭ قورىتىندىسىن بيىل وتەتىن دۇنيەجۇزىلىك كوشپەلىلەر وينىندا كورەمىز», دەيدى ۇلتتىق جانە ات سپورتى تۇرلەرى ورتالىعىنىڭ ديرەكتورى باقداۋلەت ءسابيتوۆ.
ءسويتىپ, ۇلتتىق سپورتتىڭ جوسپارلانعان شارالارى تولىعىمەن اياقتالدى. ەندى بيىل ءار سپورت تۇرىنەن ىشكى بىرىنشىلىكتەر ۇيىمداستىرىلادى. سونىمەن قاتار ۇلتتىق قۇراما مۇشەلەرى حالىقارالىق جارىستارعا قاتىسىپ, ەل نامىسىن قورعايدى. ال ەڭ باستى ماقساتىمىز – قىركۇيەك ايىندا وتەتىن دۇنيەجۇزىلىك كوشپەلىلەر ويىندارىندا بارىنشا تابىستى ونەر كورسەتىپ, بارشا قازاق جۇرتىن جارقىن جەڭىستەرىمىزبەن قۋانتۋ.
