سۋرەتتى تۇسىرگەن – ەرلان ومار, «EQ»
2022 جىلى بەيجىڭ قالاسىندا وتكەن قىسقى وليمپيادا ەل جادىندا العاش رەت تابيعي قارسىز وتكەن دودا رەتىندە ساقتالدى. بىرنەشە اپتادان بەرى شاھارعا قاردىڭ تۇسپەۋى سپورت جانكۇيەرلەرىن الاڭداتىپ قويعانى راس. الايدا قىتاي ەلىنىڭ استاناسى امالىن تاپتى. ارنايى قۇرىلعىلار ارقىلى ويىن وتەتىن بارلىق نىسان الاڭدارىن جاساندى قارعا تولتىردى. سويتە تۇرىپ قىتايلار نورۆەگ پەن نەمىستەن كەيىنگى ورىنعا تابان تىرەپ, بايراقتى باسەكەنى ابىرويمەن قورىتىندىلادى. حوش, ايتپاعىمىز بۇل ەمەس. قالاۋىن تاۋىپ, قولدان قار جاساعان كورشىلەرىمىزگە قاراعاندا, ءبىزدىڭ تابيعات قىسقى سپورتقا وتە قولايلى. تەك ينفراقۇرىلىم ماسەلەسىن تەزدەتىپ شەشكەنىمىز ءجون.
1998 جىلى ناگانو قالاسىندا وتكەن قىسقى وليمپيادا ويىندارىنىڭ قولا جۇلدەگەرى, جەرلەسىمىز ليۋدميلا پروكاشەۆانىڭ ايتۋىنشا, مەدال الۋ ءۇشىن مىقتى سپورت بازالارى مەن جابىق مۇز ايدىندارى بولۋى كەرەك.
«قازىر كونكي سپورتىمەن اينالىسۋعا ىڭعايلى ەكى جابىق ستاديون بار. ءبىرى استانا قالاسىنداعى «الاۋ» مۇزايدىنى بولسا, ءبىرى – الماتىداعى «مەدەۋ» سپورت كومپلەكسى. سونىڭ سالدارىنان باسقا وڭىردەگى سپورتشىلار استانا قالاسىنا كەلىپ جاتتىعۋعا ءماجبۇر. سوندىقتان سپورتتىق ينفراقۇرىلىم ماسەلەسىن تولىق شەشپەي, چەمپيوندارىمىز كوبەيمەيدى», دەيدى ول.
ونىسى شىندىق. قاشپاعان قاشاردىڭ ۋىزىنان دامەتكەندەي, جاتتىعاتىن ورنى جوق سپورتشىلاردان جەڭىس دامەتۋ – اۋرەشىلىك. بۇل تۋرالى استانا قالاسىنىڭ دەنەشىنىقتىرۋ جانە سپورت باسقارماسىنىڭ بۇقارالىق سپورت ءبولىمىنىڭ باسشىسى ازامات اعزاموۆپەن سويلەستىك. ونىڭ ايتۋىنشا, ەلوردا تۇرعىندارى مەن سپورتشىلارىنىڭ جاعدايى ايتارلىقتاي جامان ەمەس.
«قازىر حالىقتىڭ سالاماتتى ءومىر سالتىنا دەن قويىپ جاتقانى جاسىرىن ەمەس. سول سەبەپتى دەنەشىنىقتىرۋمەن تۇراقتى شۇعىلدانۋشىلار سانى كوبەيىپ كەلەدى. ناقتى استانا قالاسى بويىنشا مالىمەت بەرەيىك. قازىر سپورتتىق ينفراقۇرىلىمدار جاڭارتىلىپ, جوندەۋ جۇمىستارى جۇرگىزىلىپ جاتىر. سونىمەن قاتار قازىر بۇقارالىق سپورتتى دامىتۋ ماقساتىندا قالامىزدىڭ 4 اۋدانىندا دەنەشىنىقتىرۋ جانە ساۋىقتىرۋ كەشەنىنىڭ قۇرىلىسى جوسپاردا تۇر. جىل سوڭىنا دەيىن «تەمىرجول» ماسسيۆىندە دە جاڭا كومپلەكس ىسكە قوسىلماقشى. بۇل – اتقارىلىپ جاتقان جۇمىستاردىڭ ءبىر بولىگى عانا», دەيدى ا.اعزاموۆ.
دۇرىس, اۋىزدى قۇر شوپپەن سۇرتۋگە بولمايدى. جەرلەستەرىمىز نامىسقا تىرىسىپ باعادى. جاقىندا وڭتۇستىك كورەيانىڭ كانۆون قالاسىنداعى جاسوسپىرىمدەردىڭ IV قىسقى وليمپيادا ويىندارىندا پولينا ومەلچۋك شورت-ترەكتەن قولا جۇلدەگەر, ال شاڭعىمەن تۇعىردان سەكىرۋ سايىسىندا 38 قارسىلاسپەن سىنعا تۇسكەن يليا ميزەرنىح چەمپيون اتانعانى تۋرالى اقجولتاي جاڭالىق ءبارىمىزدى ەرەكشە قۋانتتى. بۇل قارقىنمەن قىسقى سپورتتىڭ وتانىنا اينالعان نورۆەگيا, نيدەرلاند سپورتشىلارىمەن دە يىق تىرەسەتىن كۇن الىس ەمەس دەپ سەنەمىز.
نورۆەگيا دەمەكشى, بۇل مەملەكەتتە سپورتتىڭ دامۋىنا ەرەكشە اسەر ەتەتىن مىنا ءبىر تاجىريبە بار. بالالار اراسىنداعى جارىستا ەشقاشان التىن, كۇمىس, قولا دەگەن سەكىلدى مەدال بەرىلمەيدى. دوداعا تۇسكەن سپورتشىلاردىڭ ءبارى بىردەي ماراپاتتالادى. مۇنىڭ سەبەبىن سپورت تىزگىنىن ۇستاعاندار بىلاي تۇسىندىرەدى. ەگەر بالا جاس كەزىندە تاۋى شاعىلسا, كەلەشەكتە سول سپورتتى تاستاپ كەتۋ ىقتيمالدىعى كوبەيەدى ال جەڭىلسە دە, قۇرداسىمەن بىردەي مەدال العان ورەننىڭ سپورتقا دەگەن ىنتاسى اشىلادى. سونىمەن قاتار نورۆەگيادا بۇقارالىق سپورت تا جولعا قويىلعان. ەندى مىنا دەرەككە نازار اۋدارايىق. نورۆەگيانىڭ 30–40 مىڭدىق قالاشىقتارىنىڭ باسىم بولىگىندە كەم دەگەندە 200 شاقىرىمدىق ۆەلوسيپەد جولى, 3 شاڭعى جولى, حالىقارالىق تالاپتارعا ساي ستاديون جانە وزگە دە سپورت نىساندارى بولادى. شاڭعى جولدارىنىڭ بارلىعى جارىقپەن قامتاماسىز ەتىلگەن. ياعني تاۋلىكتىڭ كەز كەلگەن ۋاقىتىندا جاتتىعۋعا مۇمكىندىك بار. ال سپورت زالى مەن مۇزايدىنى كەز كەلگەن ەلدى مەكەندە بار. حالىق بوس ۋاقىتىندا شاڭعى تەۋىپ, كونكيمەن جارىسقا تۇسەدى. سول ارقىلى ىشكى مادەنيەتى قالىپتاسقان. تورتجىلدىقتىڭ باستى باسەكەسى – وليمپيا ويىندارىندا دا سكانديناۆ سپورتشىلارى بايگەنىڭ الدىن بەرمەي كەلە جاتقانى سودان دەپ توپشىلايمىز.
بالالاردى سپورتقا تارتۋدىڭ تاعى ءبىر جولى – فەنومەن كۋلتى. ايتالىق, ءبىر عانا دەنيس تەننىڭ ديماش قۇدايبەرگەنمەن جاساعان كوللابوراتسياسى قانشاما جاس بالانىڭ مانەرلەپ سىرعاناۋعا ىنتاسىن وياتتى. بالا قانداي دا ءبىر ونەردىڭ, ياكي سپورتتىڭ ماڭىزىنان بۇرىن, ونى ناسيحاتتاپ وتىرعان تۇلعاعا ءتانتى بولادى. سول ارقىلى ەلىكتەگەن ادامعا ەرە ءجۇرىپ, ءوز داڭعىل جولىن قالىپتاستىرادى. بۇل ۇدەرىسكە ۇكىمەتتەن باستاپ, مەملەكەتىمىزدىڭ ءاربىر ازاماتى اتسالىسۋى كەرەك.
