اڭگىمەمىزدىڭ القيسساسىن ەرلەردەن باستايىق. ۇزاق ۋاقىت بويى الدىنا جان سالماي جۇرگەن گرۋزيا دزيۋدوشىلارىنىڭ حالىقارالىق دودالارداعى تولاعاي تابىسى تاڭداندىرماي قويمايدى. حالقىنىڭ سانى 3,7 ميلليوننان ازەر اسادى. جەر كولەمى دە شاعىن. سوعان قاراماستان اتالعان مەملەكەتتەن جىل سايىن مىقتى بالۋانداردىڭ قالىڭ شوعىرى شىعىپ جاتىر. قانداي جارىسقا بارسا دا, ولار ۇنەمى ۇزدىكتەر قاتارىنان كورىنەدى. ءدال قازىرگى كەزدە جەتى سالماق دارەجەسىنىڭ ەكەۋىندە گرۋزين جىگىتتەرى الەمدىك رەيتينگتە جەكە-دارا كوش باستاپ تۇر. ولار – لۋكا مايسۋرادزە (90 كگ) مەن يليا سۋلامانيدزە (100 كگ). سونداي-اق الدىڭعى لەكتە جۇرگەندەردىڭ ساناتىندا جاپونيالىق ريۋدزيۋ ناگاياما (60 كگ), دەنيس ۆيەرۋ (66 كگ), ازەربايجاندىق حيدايات گەيداروۆ (73 كگ), بەلگيالىق ماتتياس كاسسە جانە تاجىكستاندىق تەمۋر راحيموۆ (+100 كگ) سىندى بەلدى بالۋاندار بار. مىنە, جەتى سالماق دارەجەسىنىڭ سەركەلەرى وسىلار.
قازىرگى كەزدە توپ-10 دزيۋدوشىسىنىڭ قاتارىنا گرۋزيانىڭ – 8, وزبەكستاننىڭ – 6, جاپونيا, موڭعوليا, ازەربايجاننىڭ – 5, برازيليا مەن فرانتسيانىڭ – 4, وڭتۇستىك كورەيا, كانادا, رەسەيدىڭ – 3, يسپانيا, ۋكراينا, مولدوۆا, يتاليا, تاجىكستان, يزرايل, كۋبا, نيدەرلاندتىڭ – 2, تايپەي, بەلگيا, شۆەيتساريا, ءباا, فينليانديا, تۇركيا, ماجارستان جانە سەربيانىڭ 1 ساڭلاعى ەنىپ وتىر. جالپى, IJF-ءتىڭ مىقتىلار تىزىمىندە بارلىعى 26 مەملەكەتتىڭ وكىلى بار.
وكىنىشتىسى, باعى جانىپ تۇرعان 27 مەملەكەتتىڭ قاتارىنا قوسىلۋعا قازاقستاننىڭ بىردە-ءبىر بالۋانىنىڭ كۇش-جىگەرى جەتپەدى. الپاۋىتتاردى ايتپاعاندا, سپورتتىق ارەنالارداعى قارسىلاسىمىز وزبەكستان ءبىزدى شاڭىنا دا ىلەستىرەر ەمەس. بۇگىنگى تاڭدا الا تاقيالى اعايىنداردىڭ التى بالۋانى – ۇزدىك وندىقتا. بۇل – وتە كەرەمەت كورسەتكىش. كۇنى كەشە عانا قازاقتارعا قىزىعا ءارى قىزعانا قاراپ جۇرگەن تاجىكستان مەن مولدوۆانىڭ دا تاسى ورگە دومالاپ تۇر. قوس ەلدىڭ ارقايسىسىنان ەكى سپورتشىدان ۇزدىكتەر قاتارىنا ەنۋى – جوعارىدا ايتىلعان ءسوزىمىزدىڭ ايقىن دالەلى. ول از دەسەڭىزدەر, مولدوۆالىق دەنيس ۆيەرۋ مەن تاجىك تەمۋر راحيموۆتىڭ ءوز سالماق دارەجەلەرى بويىنشا الەمدىك رەيتينگتە كوش باستاپ تۇر.
ال قازاقستان جايىندا نە ايتۋعا بولادى؟ وتاندىق دزيۋدونىڭ دەڭگەيى جىلدان-جىلعا تومەندەپ بارا جاتقانى بەلگىلى. ماسەلەن, جەرلەستەرىمىزدىڭ اراسىندا ەڭ ۇزدىك كورسەتكىشكە ماعجان شامشيددين قول جەتكىزىپ وتىر. 60 كگ سالماقتا سىنعا ءتۇسىپ جۇرگەن سىر بويىنىڭ سايىپقىرانى 12-ورىندى يەلەنگەن. ءدال سول سالماقتا بەلدەسەتىن نۇرقانات سەرىكباەۆ – 19 جانە ەلدوس سمەتوۆ 35-ورىندارعا تابان تىرەدى. وسى ءۇش ورەنىمىزدىڭ اراسىنان پاريج وليمپياداسىنا كىمنىڭ باراتىنى الداعى ۋاقىتتا وتەتىن بايراقتى باسەكەلەر بارىسىندا انىقتالادى. اقيقاتقا جۇگىنسەك, الەمدىك رەيتينگتە كىم جوعارى تۇرسا, سول عالامدىق دوداعا قاتىسۋعا ءتيىس. بۇل جەردە ەشكىمنىڭ اتاق-داڭقى مەن تامىر-تانىستىعىنا, بەدەلى مەن بولمىسىنا جانە وسىعان دەيىنگى جەتىستىگىنە قاراۋدىڭ ەش قاجەتى جوق. نەگىزىندە ۇلتتىق قۇراما باپكەرلەرى وسى ءپرينتسيپتى قاتاڭ ساقتاۋعا ءتيىس. بىراق وليمپيا ويىندارىنىڭ ءدۇبىرى ەستىلگەن تۇستا تۇسىنىكسىز جاعدايلار مەن قيتۇرقى ارەكەتتەر ورىن الىپ جاتسا, وعان دا ەش تاڭدانبايمىز.
66 جانە 73 كگ سالماق دارەجەلەرىندە كۇش سىناساتىن عۇسمان قىرعىزباەۆ پەن دانيار شامشاەۆتىڭ دا اياقالىسى جامان ەمەس. عۇسمان – كوپتى كورگەن ساقا سپورتشى. جاسى 31-دە. وسىدان ەكى جىل بۇرىن بۋداپەشتتە وتكەن الەم چەمپيوناتىندا كۇمىس مەدال يەلەندى. دانيار 22 جاستا. بىلتىر ول استانادا ۇيىمداستىرىلعان ازيا چەمپيوناتىندا بارلىق قارسىلاسىن يپپونمەن ۇتىپ, ايدى اسپانعا ءبىر-اق شىعاردى. بىراق بيىلعى ماۋسىمدا قىرعىزباەۆ پەن شامشاەۆ جارقىن جەڭىسىمەن ءوز جانكۇيەرلەرىن قۋانتا المادى. بۇل كۇندەرى IJF رەيتينگىندە قىرعىزباەۆ – 14 جانە شامشاەۆ 16-ورىندى ەنشىلەدى. 81 كگ سالماقتاعى ابىلايحان جۇبانازار مەن 100 كگ سالماقتا ايقاسىپ جۇرگەن نۇرلىحان شەرحان ءدال مەجەدەن كورىندى.
ۇزدىكتەر تىزىمىندە جانساي سماعۇلوۆ (73 كگ) 27-ورىندى يەمدەنسە, ديدار حامزا (90 كگ) 31-ساتىعا تۇراقتادى. بىراق ولاردىڭ پاريجگە بارمايتىنى انىق. سەبەبى كەزىندە ازيا ويىندارىنىڭ جەڭىمپازى اتانىپ, ەكى بىردەي وليمپيادادا باق سىناعان ديدار كەيىنگى جىلدارى ءوزى قاتىسقان جارىستارىنىڭ بارلىعىندا جەڭىلىس تاپتى. ساتسىزدىكتىڭ شىرماۋىنان شىعا الماعاننان كەيىن 26 جاستاعى ساڭلاق ۇلكەن سپورتتان قول ۇزەتىنىن رەسمي تۇردە مالىمدەدى. ال جاسى 31-دەن اسقان جانسايعا ۋاقىت وزعان سايىن جالىندى جاستارمەن الىسىپ-ج ۇلىسۋ قيىنداپ بارادى. قازىرگى كەزدە ول دا تاتاميمەن قوش ايتىسۋعا قامدانىپ ءجۇر.
بۇگىنگى تاڭدا توپ-50-لىككە جوعارىدا ەسىمدەرى اتالعانداردان بولەك, مىنا جەرلەستەرىمىز ەندى: عالىمجان قىرىقباي (+100 كگ) – 29-ورىن, ەراسىل قاجىباي (+100 كگ) – 39-ورىن, يسلام بوزباەۆ (100 كگ) پەن ءادىل ورازباەۆ (+100 كگ) – 43-ورىن جانە باۋىرجان نارباەۆ (60 كگ) – 49-ورىن. وزگە دزيۋدوشىلاردىڭ قارقىنى تىم باسەڭ. ولار وليمپيا ويىندارىنىڭ جولداماسىنان الدەقاشان كۇدەر ۇزگەن.
