فوتو: سەنات
ماۋلەن اشىمباەۆ باس حاتشىعا ءىلتيپات ءبىلدىرىپ, بۇگىندە اوسشك-ءنىڭ ءرولى ارتىپ كەلە جاتقانىن جانە ءوزارا ىنتىماقتاستىقتى ودان ءارى نىعايتۋعا مۇددەلى ەكەنىن اتاپ ءوتتى. سونداي-اق پالاتا سپيكەرى كەڭەستىڭ استانادا وتكەن VI سامميتىندە ايتىلعان باستامالارعا نازار اۋدارىپ, ونى تولىققاندى حالىقارالىق ۇيىمعا اينالدىرۋدى كوزدەيتىن جول كارتاسىن ىسكە اسىرۋ تەتىكتەرىنە توقتالدى.
«2022 جىلى استانادا وتكەن سامميت كەزىندە مەملەكەت باسشىسى قاسىم-جومارت كەمەل ۇلى توقاەۆ قازاقستاننىڭ 2022-2024 جىلدارى ۇيىمعا توراعالىعى كەزەڭىنە ارنالعان باسىمدىقتاردى ايقىنداپ بەردى. ولاردىڭ قاتارىندا ەرىكتىلەر قوزعالىستارى كوشباسشىلارىنىڭ سلەتىن وتكىزۋ, مۇشە مەملەكەتتەردىڭ جەتەكشى ۋنيۆەرسيتەتتەرىنىڭ ارىپتەستىك جەلىسىن قۇرۋ, ەكولوگيا ماسەلەلەرى بويىنشا جوعارى دەڭگەيلى كونفەرەنتسيا ۇيىمداستىرۋ, ورنىقتى ءوزارا بايلانىس جونىندەگى كەڭەس قۇرۋ سياقتى باستامالار بار. سەنات كەڭەستى ينستيتۋتسيونالدى تۇرعىدان دامىتۋعا ارنالعان مىندەتتەردى ىسكە اسىرۋعا زاڭنامالىق قولداۋ كورسەتۋگە دايىن», دەگەن ماۋلەن اشىمباەۆ قازىرگى تاڭدا پالاتانىڭ تۇراقتى كوميتەتتەرى مەن ۇيىم اراسىندا تىعىز بايلانىس قالىپتاسقانىن تىلگە تيەك ەتتى.
كەزدەسۋ بارىسىندا تاراپتار قازاقستاننىڭ اوسشك-گە توراعالىعىنا قاتىستى ماسەلەلەردى تالقىلادى. ودان بولەك, جىلدان جىلعا ۇيىمنىڭ گەوگرافياسى مەن قىزمەت اياسىنىڭ كەڭەيىپ كەلە جاتقانى ايتىلدى. ناقتى ايتقاندا, ەپيدەميولوگيالىق قاۋىپسىزدىك, دەنساۋلىق ساقتاۋ, فارماتسەۆتيكا, اقپاراتتىق جانە كوممۋنيكاتسيالىق تەحنولوگيالار قاۋىپسىزدىگى سياقتى ىنتىماقتاستىقتىڭ جاڭا باسىم باعىتتارى ەنگىزىلدى.
سونىمەن قاتار كەزدەسۋدە وركەنيەتتەر مەن دىندەر اراسىنداعى ديالوگتى دامىتۋ ماسەلەسى كەڭىنەن ءسوز بولدى. وسىعان وراي ماۋلەن اشىمباەۆ الەمدىك جانە ءداستۇرلى دىندەر كوشباسشىلارىنىڭ سەزىن دامىتۋدىڭ 2033 جىلعا دەيىنگى تۇجىرىمداماسى جونىندە ايتىپ, الداعى ۋاقىتتاعى بىرلەسكەن جۇمىستىڭ باعىت-باعدارىنا نازار اۋداردى.
«قازاقستاننىڭ باستاماسىمەن قۇرىلعان الەمدىك جانە ءداستۇرلى دىندەر كوشباسشىلارىنىڭ سەزىنە وتكەن جىلى 20 جىل تولدى. بىلتىرعى قازان ايىندا استانادا سەزدى دامىتۋدىڭ الداعى 10 جىلعا ارنالعان تۇجىرىمداماسىن قابىلدادىق. بۇل رەتتە سەزد حاتشىلىعى دىنارالىق جانە وركەنيەتارالىق ديالوگتى ودان ءارى نىعايتۋ ءۇشىن حالىقارالىق ۇيىمدارمەن ىنتىماقتاستىقتى ارتتىرۋعا مۇددەلى. ءبىز ۇيىمنىڭ سەنىم شارالارى كاتالوگىندا وركەنيەتتەر, مادەنيەتتەر جانە دىندەر اراسىنداعى ديالوگتى دامىتۋعا باسا ءمان بەرىلگەنىن بىلەمىز. وسى باعىتتا بىرلەسىپ جۇمىس ىستەۋگە بولادى دەپ ەسەپتەيمىن», دەدى ماۋلەن اشىمباەۆ.
سونداي-اق سەنات توراعاسى مەملەكەت باسشىسىنىڭ باستاماسىمەن ەلىمىزدە جۇرگىزىلىپ جاتقان رەفورمالاردى ىسكە اسىرۋ اياسىندا پالاتا اتقارىپ وتىرعان زاڭنامالىق جۇمىستار جونىندە ايتتى.
