كەش بارىسىندا قالامگەر شىعارماشىلىعىنىڭ كوپ قىرلىلىعىمەن ەرەكشەلەنەتىنى, اقىننىڭ پوەزياسىن ايتپاعاندا, توبىل توپىراعىنان شىققان ءبىرتۋار تۇلعالاردىڭ كوركەم بەينەسىن سومداعان, بۇگىنگى قوعامداعى قۇبىلىستاردى, ادام ساناسىندا بولىپ جاتقان وزگەرىستەردى, تىرشىلىك تىنىسىن ارقاۋ ەتكەن دراماتۋرگيالىق شىعارمالارى مەن ءوڭىر تاريحىن زەردەلەگەن عىلىمي-تانىمدىق كوسەمسوزدەرى, تۇلعاتانۋ سالاسىنداعى كوپتەگەن ەڭبەكتىڭ رۋحانيات كەڭىستىگىنەن وزىندىك ورىن الاتىنى ايتىلدى.
ماسەلەن, كەش قوناقتارىنا تۇڭعىش تانىستىرىلعان «جىتىقارا» كىتابى اقىننىڭ كىندىك قانى تامعان جىتىقارا ءوڭىرىنىڭ كوپشىلىك بىلمەي جاتقان بەيمالىم تاريحى, تانىمال تۇلعالارى, ەل ءۇشىن ەڭبەك ەتكەن ەلەۋلى ازاماتتارى, تابيعي ەرەكشەلىگى مەن جەراستى بايلىعى تۋرالى قۇندى مالىمەتتەرگە تولى.
«جىتىقارا رەسەيدىڭ شەكاراسىندا ورنالاسقان. ارعى بەتتە ورىنبور وبلىسىنىڭ برەدى, ادام اۋداندارى جاتىر. سول ارادا كەزىندە اقجان ماشاني جازعان تابيعاتتىڭ كەرەمەت كورىنىسى, ۇلكەن جادىگەر تۇيەتاس جاتىر. بۇل تۇيەتاستى كوپ ادام كورگەن جوق. تابيعاتتىڭ جاراتقان ءبىر جاراتىلىسى, باۋىرىنان بۇلاق اعىپ جاتىر. سول ءبىزدىڭ كوزىمىزگە شەكارانى كۇزەتىپ جاتقان ۇلكەن قارا بۋرا سياقتى بولىپ كورىنەتىن. كەزىندە ەكى بىردەي وركەشى بولعان ەكەن, كەن ىزدەگەن گەولوگتەر استىنا جارىلعىش زات قويىپ, قوپارىپ تاستاعان. جىتىقارا وڭىرىندە وسى سياقتى تابيعاتتىڭ عاجايىپ تۋىندىلارى از ەمەس. ونىڭ سىرتىندا جىتىقارادان ون اكادەميك, بەس-التى قالامگەر, كوپتەگەن قايراتكەر, ەڭبەك ادامدارى شىققان. بىراق ولاردىڭ ەسىمدەرىن ەشكىم بىلە بەرمەيدى. ويتكەنى ىزدەۋشىسى جوق. ايتاتىن ادامدارى جوق. مەن سول جوقتىڭ ورنىن تولتىرۋعا تىرىستىم», دەيدى اۆتور جاڭا كىتاپ تۋرالى.
اقىلبەك شاياحمەتتىڭ «كولەڭكە» اتتى جيناعىنا ءار جىلدارى جازىلعان 12 پەساسى ەنگەن. «مەن ءوزىمدى كەرەمەت ءبىر دراماتۋرگپىن دەپ ەسەپتەمەيمىن. بىراق 5-6 درامام تالدىقورعانداعى بەكەن ريموۆا اتىنداعى تەاتردا, ورالدا, شىمكەنتتە, قوستانايدىڭ قازاق جانە ورىس تەاترلارىندا ساحنالاندى», دەيدى اۆتور. اقىلبەك شاياحمەتتىڭ «ىبىرايدىڭ وسيەتى» اتتى درامالىق تۋىندىسى «التىن قالام» جۇلدەسىنە يە بولعان.
ال ء«ۇمىتىم ۇزىلمەسىن, سەنىمگە سەلكەۋ تۇسپەسىن, ارمانىم الاسارماسىن دەگەن نيەتپەن جازىلعان ء«ۇمىت. سەنىم. ارمان» جيناعىنا اقىننىڭ سوڭعى بەس-التى جىل ىشىندە جازىلعان ولەڭدەرى مەن پوەمالارى توپتاستىرىلعان.
قالامگەردىڭ ء«سوز جازدىم قالام الىپ» دەگەن كىتابىنا ەل اۋزىنان جينالعان ماتەريالدار, توبىل وڭىرىندە ءومىر سۇرگەن, بىراق وسى ۋاقىتقا دەيىن ەسىمدەرى بەلگىسىز بولىپ كەلگەن ءدىندار ءداۋىر ادەبيەتى وكىلدەرىنىڭ اراپ ارپىنەن كريلليتساعا اۋدارىلعان شىعارمالارى, عازالدارى مەن نازىمدارى, ءدىني داستاندارى, ايتىستارى ەنىپ وتىر.
كەش بارىسىندا كىتاپحانا جانىنداعى «اق قاۋىرسىن» كلۋبىنىڭ مۇشەلەرى اۆتوردىڭ «قاشقىن» پەساسىنىڭ ءبىر ۇزىگىن ساحنالاپ, ولەڭدەرىن جاتقا وقىدى.
اقىلبەك شاياحمەتتىڭ وسى ۋاقىتقا دەيىن جازعان دۇنيەلەرى 80-گە تارتا كىتاپقا جۇك بولادى. اقىننىڭ تىرناقالدى جيناعى 1977 جىلى جارىققا شىققان. كەش بارىسىندا قالامگەر شىعارماشىلىعىنىڭ حرونولوگياسىن, تاقىرىپتىق, جانرلىق ەرەكشەلىگىنەن ماعلۇمات بەرەتىن ۇلكەن كىتاپ كورمەسى اشىلدى.
قوستاناي وبلىسى
