بۇل بايقاۋدىڭ نەگىزىن 1992 جىلى اتاقتى ءۇندى مۋزىكانتى, كومپوزيتور لاكشمينارايانا سۋبرامانيام قالاعان. ول سودان بەرى فەستيۆالدى كورنەكتى مۋزىكانت, اعارتۋشى, اكەسى ۆ.لاكشميناراياننىڭ قۇرمەتىنە وتكىزىپ كەلەدى.
بيىلعى ونەر مەرەكەسى ءۇندىستان مەن قازاقستان اراسىنداعى مادەني بايلانىستى نىعايتۋعا ارنالدى. بايقاۋ دەلي, بانگلادور, مايسور جانە مۋمباي سەكىلدى ءتورت قالادا ءوتتى, وعان 80-گە جۋىق ونەرپاز قاتىستى. وندا بەلگىلى ديريجەر, قازاقستاننىڭ ەڭبەك سىڭىرگەن قايراتكەرى ابزال ءمۇحيتديننىڭ كوركەمدىك جەتەكشىلىگىمەن ەركەعالي راحماديەۆ اتىنداعى مەملەكەتتىك اكادەميالىق فيلارمونياسىنىڭ جانە اقان سەرى اتىنداعى سولتۇستىك قازاقستان وبلىستىق فيلارمونياسىنىڭ سيمفونيالىق وركەسترى, سونداي-اق باس ديريجەر, قازاقستاننىڭ ەڭبەك سىڭىرگەن قايراتكەرى گۇلميرا قۇتتىباداموۆانىڭ كوركەمدىك جەتەكشىلىگىمەن ەلوردالىق فيلارمونيانىڭ كامەرالىق حورى ونەر كورسەتتى. وتاندىق ونەرپازداردىڭ ءار كونتسەرتى كامەرالىق حوردىڭ ماعىنالى قويىلىمدارىمەن باستالىپ, ءۇندى جۇرتشىلىعىنا قازاق ءانىنىڭ ءىنجۋ-مارجانى تارتۋ ەتىلدى. اسىرەسە كەڭ قۇلاشتى اقان سەرىنىڭ «قاراتورعاي», كوڭىلدىڭ نازىك قىلىن شەرتەتىن ساكەن سەيفۋلليننىڭ «تاۋ ىشىندە» جانە حالىق ءانى «قاماجايدى» ورىنداعاندا تىڭدارماندار قازاق ءانىنىڭ عاجايىپ سازدىلىعىنا, سىرشىلدىعىنا ءتانتى بولدى.
بايقاۋ باعدارلاماسى دوكتور سۋبرامانيامنىڭ اۆتورلىق شىعارمالارىنا نەگىزدەلگەن. سوندىقتان نيۋ-دەليدەگى Siri Fort كونتسەرت زالىندا فەستيۆال شىمىلدىعى مەتردىڭ جاڭا تۋىندىسى Bharat Symphony-مەن اشىلدى. سونىمەن قاتار ونىڭ Spring Rhapsody, Paris Concerto سياقتى شىعارمالارى دا ورىندالدى.
كامەرالىق حوردىڭ كوركەمدىك جەتەكشىسى گۇلميرا قۇتتىباداموۆا ءۇندى ەلىندەگى گاسترولدىك ساپاردان جىلى اسەرمەن ورالعانىن جەتكىزدى.
ء«بىز وندا سان قىرلى دوكتور سۋبرامانيامنىڭ جاڭا مۋزىكاسىن تىڭدادىق. ونىڭ شىعارمالارى ءبىر-بىرىنە مۇلدە ۇقسامايدى. فەستيۆال كەرەمەت ۇيىمداستىرىلعان. ءبارى كوڭىلىمىزدەن شىقتى. ءبىزدى ءار قالادا كورەرمەندەر قۇشاق جايا قارسى الىپ, كونتسەرت زالدارى تولىپ وتىردى. ونەرىمىزدى جوعارى باعالادى. قىسقاسى, بۇل ونەر ساپارى اۋراسى بولەك ءۇندى مۋزىكاسىمەن تاجىربيە الماسۋعا نەگىز بولدى», دەدى ول.
