اقتاۋدا ماڭعىستاۋدىڭ 70-تەن استام كاسىپكەرلەرى مەن بەلسەندىلەرىن جيناعان ىسكەر ايەلدەر قاۋىمداستىعى مەن ايەلدەر كۇشتەرى اليانسىنىڭ كەڭەيتىلگەن وتىرىسى ءوتتى.
جيىنعا قاتىسۋشىلار ايەلدەر كاسىپكەرلىگى مەن جۇمىسپەن قامتۋدى دامىتۋداعى جاھاندىق جانە وڭىرلىك ترەندتەردى تالقىلادى.
ماڭعىستاۋ ىسكەر ايەلدەر قاۋىمداستىعىنىڭ توراعاسى شولپان يلمۇحانبەتوۆا, قازىر ايەلدەر ەلىمىزدىڭ ساياسي جانە الەۋمەتتىك ومىرىندە ۇلكەن ءرول اتقاراتىنىن ايتتى. ونىڭ ايتۋىنشا, بۇگىنگى تاڭدا 9 ملن ەكونوميكالىق بەلسەندى ازاماتتىڭ 4,3 ملن-ى ايەلدەر. ەلىمىزدەگى بارلىق پەداگوگتاردىڭ 84%-دان استامىن جانە ءدارىگەرلەر مەن مەديتسينالىق قىزمەتكەرلەردىڭ 80%-ىن نازىك جاندىلار قۇرايدى.
«جينالىستى وتكىزۋدىڭ ماقساتى - قاۋىمداستىق پەن ايەلدەر كۇشتەرى اليانسى اراسىنداعى ءوزارا ءىس-قيمىلدى ىنتالاندىرۋ. سونىمەن قاتار, ءارقيلى سالادا قىزمەت ەتەتىن ايەلدەردى وقىتۋ جانە قولداۋ, ەلدەگى دەموكراتيانىڭ دامۋىنا ىقپال ەتۋ جانە ەڭبەكشى ايەلدەردىڭ الەۋمەتتىك مارتەبەسىن ارتتىرۋ بولىپ تابىلادى. بۇگىنگى تاڭدا ماڭعىستاۋدىڭ ەكونوميكالىق بەلسەندى تۇرعىندارىنىڭ جارتىسىنا جۋىعى - ايەلدەر. ءبىز ايەلدەردىڭ قۇقتارىن قورعاۋ, وتباسىلىق قۇندىلىقتاردى دامىتۋ جانە ايەلدەردىڭ ەرلەرمەن تەڭ دارەجەدە ساياسات پەن ەكونوميكاعا بەلسەندى ارالاسۋىن قامتاماسىز ەتۋگە ۇمتىلامىز. ءبىزدىڭ ماقساتىمىز ەرلەردىڭ الدىنا شىعۋ ەمەس, تەڭ دارەجەدە بىرلەسەء ارەكەت ەتۋ», دەپ اتاپ ءوتتى شولپان يلمۋحانبەتوۆا.
ءوڭىر باسشىسى نۇرلان نوعاەۆ قوعامداعى تۇراقتىلىق پەن كەلىسىمدى ساقتاۋدا جانە دامۋدا ايەلدىڭ ءرولى وراسان زور ەكەنىن اتاپ ءوتتى. سونداي-اق ايەلدەر ەلىمىزدەگى بەيبىتشىلىك پەن وركەندەۋدىڭ اجىراماس بولشەگى ەكەنىنە توقتالدى.
«مەملەكەت باسشىسى قاسىم-جومارت توقاەۆ قازاقستاننىڭ ءاربىر ازاماتى ەلدەگى ازاماتتىق قوعامدى دامىتۋعا بەلسەندى تۇردە اتسالىسۋى ءتيىس ەكەنىن ءاردايىم ايتادى. ءبىزدىڭ ءوڭىرىمىزدە ايەلدەر انالىق مىندەتتەرىن كاسىپكەرلىك پەن باسشىلىق لاۋازىمدا, الەۋمەتتىك جاۋاپكەرشىلىك پەن قايىرىمدىلىقتا ءساتتى ۇيلەستىرىپ جۇرگەنىن بىلەمىز. ايەلدەردىڭ بۇل كۇش-جىگەرى ءبىزدىڭ ەلىمىزدىڭ كەلبەتىن قالىپتاستىرۋدا شەشۋشى ءرول اتقارادى, ولاردىڭ قوعامدىق قىزمەتتىڭ ءارتۇرلى سالالارىنداعى ىقپالىن كورسەتەدى. ولاردىڭ كوپتەگەن رولدەردى قاتار ۇستاي الۋ قابىلەتى ايەلدەردىڭ قوعامدىق دامۋعا قوسقان ۇلەسىنىڭ ماڭىزدىلىعىن كورسەتە وتىرىپ, باسقالارعا شابىت بەرەدى», دەدى نۇرلان نوعاەۆ.
ماڭعىستاۋدا 2023 جىلدىڭ سوڭىنداعى مالىمەت بويىنشا, ايەل كاسىپكەرلەردىڭ سانى شوب سەكتورىندا 57,9%-دى قۇرادى. كاسىپكەر ايەلدەردىڭ كوپشىلىگى ءبىلىم بەرۋ, دەنساۋلىق ساقتاۋ, وڭدەۋ ونەركاسىبى, ساۋدا سالالارىندا كاسىبىن دوڭگەلەتىپ وتىر.
