فوتو: م.كاتاەۆ اتىنداعى وقۋشىلار سارايى
سايىس 4 كەزەڭنەن تۇردى. قاتىسۋشىلار «اققۋ» كلۋبى ارقىلى مەن نە الدىم؟» تاقىرىبىنداعى پرەزەنتاتسيا قورعادى. «شەشە كورگەن تون پىشەر» بايقاۋىندا ۇرشىق ءيىرىپ, ءجۇن ءتۇتتى, «اقىلىنا كوركى ساي» - بىلگىرلەر سايىسىندا ءوز بىلىمدەرىن ورتاعا سالدى, «تاقيا تىگەمىز!» بايقاۋىندا تاقيا ءپىشتى.
بايقاۋدىڭ ماقساتى - قازاق قىزىنىڭ بويىنداعى ۇلتتىق داستۇرىمىزگە ساي ادەپتىلىك, كورىكتىلىك, ەپتىلىك, يناباتتىلىق جانە باسقا دا جان-جاقتى ۇلتتىق قاسيەتتەرىن تانىتا ءبىلۋ, ۇلتتىق قولونەرىمىزدى دارىپتەۋ.
سايىستىڭ قۇرمەتتى قوناعى - «كاۋسار بۇلاق» اجەلەر مەكتەبىنىڭ ءتورايىمى جانە ارداقتى اجە عاليا سۇنعاتوۆا ونەرلى قىزدارعا ساتتىلىك تىلەدى.
ايتا كەتسەك, ايماق بويىنشا 2021 جىلى «اققۋ» وبلىستىق جوباسى ىسكە قوسىلىپ قىز بالالارعا ارنالعان كلۋبتار اشىلدى. بۇل جوبا ءجاسوسپىرىم قىزداردىڭ الەۋمەتتىك-قۇقىقتىق جانە پسيحولوگيالىق قۇزىرەتتىلىگىن دامىتۋعا جاعداي جاساۋ, پسيحولوگيالىق كۇيزەلىستى جەڭۋگە, ۇلتتىق بىرەگەيلىكتى ساقتاۋ ماقساتىندا سالت-ءداستۇر مەن ادەت-عۇرىپتاردى زەردەلەۋ ارقىلى رۋحاني قۇندىلىقتاردى قالىپتاستىرۋعا ىقپال ەتۋگە باعىتتالعان. قازىرگى تاڭدا وبلىس بويىنشا 251 «اققۋ» قىزدار كلۋبتارى جۇمىس ىستەيدى, ونىڭ ىشىندە 3643 قىز بالالار تاربيەلەنەدى. ەرەكشە تىزىمدە تۇرعان قىز بالالار سانى - 32.
بايقاۋ قورتىندىسى بويىنشا باس جۇلدە ايگەرىم حاسانوۆاعا بۇيىردى. جەتەكشىسى - باۋىرجان مومىش ۇلى اتىنداعى جوببم, نازيرا سەيتوۆا.
1 ورىن - مادينا بەكەت, ەكىباستۇز قالاسى, بايەت جالپى ورتا ءبىلىم بەرۋ مەكتەبى, جەتەكشىسى - ەركەن الپەماش.
2 ورىن - الينا جۇمابەكقىزى, شارباقتى اۋدانى, اباي اتىنداعى جوببم, جەتەكشىسى - ا. سمايلوۆا.
2 ورىن - اقەركە تورتاي, ماي اۋدانى, امانكەلدى يمانوۆ اتىنداعى جوم, جەتەكشىسى - بيبىگۇل كابدۋللينا.
3 ورىن - ايارۋ ولجاباەۆا, جەلەزين اۋدانى, مىرجاقىپ دۋلات ۇلى اتىنداعى №3 جوم, جەتەكشىسى - ءامينا قۇسايىنوۆا.
3 ورىن - اقسانا سابيتقىزى, تەرەنكول اۋدانى, قاتشا وسپانوۆا اتىنداعى №3 جوببم, جەتەكشىسى - ن. شۋگايپوۆا.
3 ورىن - مارجان ۋماروۆا, اقتوعاي اۋدانى, اباي اتىنداعى جوببم, جەتەكشىسى - مارجان سەيل.
«سايىستىڭ ەرەكشەلىگى - قاتىسۋشىلاردىڭ تاقيا تىگۋ ونەرىن كورسەتۋ, ۇرشىق ءيىرىپ, ءجۇن ءتۇتۋ جانە «اققۋ» قىزدار كلۋبىنىڭ مۇشەلىرىنىڭ ءوز جەرگىلىكتى كلۋبتارىن تانىستىرۋ», دەدى وبلىستىق «اققۋ» جوباسىنىڭ ۇيلەستىرۋشىسى مايا تەمىربولاتوۆا.
