زەرگەرلىك بۇيىمداردى ساتۋمەن اينالىساتىندارعا ءتيىستى تاڭبالار بولماعان جاعدايدا قانداي جاۋاپكەرشىلىك قاراستىرىلعان؟ بۇل تۋرالى الماتى وڭىرلىك كوممۋنيكاتسيالار قىزمەتىنىڭ بريفينگىندە ساۋدا جانە ينتەگراتسيا مينيسترلىگى تەحنيكالىق رەتتەۋ جانە مەترولوگيا كوميتەتىنىڭ الماتى قالالىق دەپارتامەنتىنىڭ باسشىسى قانات قابىلبەكوۆ باياندادى.
دەپارتامەنت جەتەكشىسى ساۋدا نىساندارىنا بارماي-اق 509 پروفيلاكتيكالىق باقىلاۋ مەن قاداعالاۋ جۇرگىزىلىپ, ناتيجەسىندە بارلىق جاعدايدا زاڭ بۇزۋ فاكتىلەرى انىقتالعانىن اتاپ ءوتتى.
«بەكىتىلگەن ستاندارت بويىنشا باعالى التىن مەتالدارىندا بارىس باستى بەلگى مەن قازاقستاننىڭ حالىقارالىق اببرەۆياتۋراسى – KZ بولۋعا ءتيىس. وسى ستاندارتتى بۇزۋ فاكتىلەرى ناقتى انىقتالعان جاعدايدا دەپارتامەنت باعالى مەتالدار مەن اسىل تاستاردان جاسالعان زەرگەرلىك جانە باسقا دا بۇيىمداردى ساتۋشىلارعا قاتىستى جوسپاردان تىس تەكسەرۋلەردى باستايدى», دەدى ق.قابىلبەكوۆ.
دەپارتامەنت قىزمەتكەرلەرى ايعاقتى ماتەريالدارمەن زاڭعا باعىنباۋدىڭ دالەلدى جانە ناقتى فاكتىلەرى انىقتالعان كەزدە التىن بۇيىمدى وتكىزۋشىگە قاتىستى جوسپاردان تىس ءتيىستى تەكسەرۋ تاعايىندالىپ قانا قويماي, فاكتىلەر راستالعان جاعدايدا اكىمشىلىك قۇقىق بۇزۋشىلىق تۋرالى حاتتاما جاسالادى.
جەكە تۇلعالارعا – 50, لاۋازىمدى تۇلعالارعا, شاعىن كاسىپكەرلىك سۋبەكتىلەرىنە – 80, ورتا كاسىپكەرلىك سۋبەكتىلەرىنە – 100, ءىرى كاسىپكەرلىك سۋبەكتىلەرىنە 150 اەك مولشەرىندە ايىپپۇل سالىنادى.
«سونداي-اق ساتۋشىعا زاڭسىزدىقتى جويۋ تۋرالى نۇسقاۋ بەرىلەدى. ياعني ساتۋشى ءوز ءونىمىنىڭ نورماتيۆتىك قۇجاتتاندىرۋ تالاپتارىنا سايكەس كەلەتىندىگى تۋرالى اكت العاننان كەيىن, باستى سىنامالىق تاڭبامەن تاڭبالاۋدى جۇرگىزۋى كەرەك», دەپ ءتۇسىندىردى سپيكەر.
زاڭ بۇزۋ جويىلىپ, ماسەلە رەتتەلگەننەن كەيىن زەرگەرلىك بۇيىمدار قايتادان ساۋداعا شىعارىلۋى مۇمكىن.
الماتى
