وسكەمەندىك جەكپە-جەك شەبەرلەرى

جاقىندا بەكبولاتتىڭ ۇلى جاسۇلان حابارلاستى:

– اعا, وتكەن جىلدىڭ اياعى  مەن وسى جىلدىڭ باسى ءبىز ءۇشىن جەمىستى بولدى, – دەدى ول.

بىلتىر 25 قاراشادا قارا­عاندى قالاسىندا نوماد مما-دان الەم كۋبوگى ءوتتى. ءدۇ­بىر­لى جا­رىستا ەكى تۇلەگىمىز – قىر­مى­زى توقتامىس پەن ايارۋ قۇر­مانبەك التىننان القا تاقتى. ودان ءبىر اپتا بۇرىن قوستاناي قالاسىندا جالاۋى جەلبىرەگەن مما بيرمان بوكسىنان ەل چەمپيوناتىندا قىرمىزى توق­تامىس, اياجان قابىلحان, يسلام قۋانىش ۇلى چەمپيون اتانسا, ءمادي التىنبەك, ءامىرالى بەك­بولات, الان ورازبەكوۆ, اي­ارۋ قۇرمانبەك كۇمىسپەن كۇپ­تەلدى. ارادا ءبىر ايدان سوڭ باحرەيندە وتكەن ازيا چەمپيونا­تىندا قىر­مىزى توقتامىس ەكىنشى ورىنعا تابان تىرەدى. قار­جى­نىڭ تاپشىلىعىنان جۇلدە الادى دەگەن بىرنەشە سپورتشىمىز جارىسقا بارا المادى. جاقىندا عانا وسكەمەندە وتكەن پونكراتيوننان ءوڭىر بى­رىنشىلىگىندە 11 شاكىرتىمىز التىننان القا تاقسا, بەس تۇلەگىمىز ەكىنشى ورىنعا يە بولدى. ەندى ولار رەسپۋبليكالىق جارىسقا دايىندالىپ جاتىر.

بىرەر ايدا وسىنشاما جا­رىسقا قاتىسىپ, جۇلدە تەرگەن وسكەمەننىڭ جەكپە-جەك شەبەرلەرى جەڭىسكە جاتتىعۋلار مەن ىزدە­نىستىڭ ارقاسىندا جەتكەندەرى بەل­گىلى. قىرمىزى توقتامىس – الەم­نىڭ ءۇش دۇركىن چەمپيونى, ازيا جەڭىمپازى. ال بەكبولاتتىڭ نەمەرەسى ءامىرالى وسى سپورتتا تا­ما­شا جەتىستىكتەرگە جەتتى. وب­لىس­تىڭ بىرنەشە دۇركىن چەمپيو­نى, رە­سەيدىڭ ەكاتەرينبۋرگ قالا­سىندا جالاۋى جەلبىرەگەن ارالاس جەكپە-جەك جارىسىنان ەكىنشى ورىنمەن ورالدى.

اكەلى-بالالى بەكبولات پەن جاندوس ساعيەۆتاردىڭ شا­كىرت­تەرى ءالى تالاي بيىك بەلەستى با­عىن­دىراتىندارى ءسوزسىز. قار­جى تاپشىلىعىنا قاراماستان الىس ەلدەرگە ساپار شەگىپ, وزدەرىنىڭ شەبەرلىگىن كۇن سايىن شىڭداپ جۇرگەن وسكەمەندىك ورەندەرگە ساتتىلىك سەرىك بولسىن دەگىمىز كە­لەدى.

وڭداسىن ەلۋباي,

جۋرناليست

وسكەمەن