ەلىمىزدىڭ بىرىڭعاي ساعات بەلدەۋىنە اۋىسۋىنا وراي وبلىس تۇرعىندارى ەندى ناۋرىزدىڭ بىرىنەن باستاپ ۋاقىت ءتىلىن 1 ساعات كەرى شەگەرۋگە ءتيىس. وسىعان بايلانىستى قوستانايعا ارنايى كەلگەن ءبىر توپ ەلوردالىق عالىم, ساراپشىلار تۇرعىندارمەن كەزدەسىپ, كوپتىڭ كوكەيىندە جۇرگەن ساۋالدارعا جاۋاپ بەردى.
ءماجىلىس دەپۋتاتى ەركىن ءابىلدىڭ ايتۋىنا قاراعاندا, 2004 جىلى ءوڭىردىڭ ءوز ۋاقىت بەلدەۋىن اۋىستىرۋىنا ەلەكتر ەنەرگياسىنىڭ قىجالاتى ماجبۇرلەگەن. ەندى مۇنداي زارۋلىك جوق.
«ەگەر گەوگرافيالىق جاعىنان قاراساق, بىزدە 4 ساعات بەلدەۋى بار. بىراق مۇنىڭ ءبارىن ساقتاۋ ەل ەكونوميكاسىنا اۋىر تيەتىن ەدى. قوستاناي وبلىسىنىڭ شەكاراسى ەشبىر ۋاقىت بەلدەۋىمەن سايكەس كەلمەيدى. سوندىقتان ءوڭىردىڭ UTC+5 ۋاقىت بەلدەۋىنە ءوتۋى بىردەن-ءبىر دۇرىس شەشىم بولىپ سانالادى. ارينە, ءبىز 20 جىل بويى ءبىر ۋاقىت بەلدەۋىمەن ءومىر ءسۇرىپ ۇيرەنىپ قالدىق. ونىڭ دەنساۋلىعىمىزعا زيان تيگىزىپ جاتقانىن ەسكەرمەدىك», دەدى ەركىن ءابىل.
بيوتەحنولوگ-عالىم ءامىر قۋاتتىڭ ايتۋىنشا, ساعات ءتىلىن 29 اقپاندا جاتار الدىندا اۋىستىرىپ قويعان دۇرىس. ماسەلەن, ساعات 23:00-دە ۇيقىعا جاتساڭىز, ساعات ءتىلىن 22:00-گە اۋىستىرىپ قويىڭىز. ال تاڭەرتەڭ جاڭا ۋاقىت بويىنشا وياناسىز.
«بىلتىر قوستانايدا اقپان ايىندا بولدىق. سوندا قاتەلەسپەسەم, ساعات تاڭەرتەڭگى توعىزدا ءالى قاراڭعى بولىپ تۇردى. سوندا ءۇش ساعاتتا كۇننىڭ بەل ورتاسىنا كەلەدى ەكەنبىز. ودان ەكى ساعات بۇرىن جۇرت بالالارىن بالاباقشاعا, مەكتەپكە جەتەكتەپ بارا جاتادى. مۇنىڭ ءبارى حالىق دەنساۋلىعىنا كەرى اسەر ەتەدى. ماسەلەن, ۇيقىدان تاڭعى ساعات جەتىدە وياندىق دەلىك. جاڭا ۋاقىت بەلدەۋىمەن ول كەزدە ساعات ءالى تاڭعى التىنى كورسەتىپ تۇرادى. بالاعا بولسىن, ەرەسەك ادامدارعا بولسىن ءبىر ساعاتتىق ۇيقى ادامنىڭ فيزيونومياسىنا كەرى اسەرىن تيگىزبەي مە, تيگىزەدى. ادام شارشاۋدى جۇيكە سەزىمى ارقىلى ميىمەن قابىلدايدى», دەيدى عالىم.
دارىگەر عالىمدار جاڭا ۋاقىت بەلدەۋىنە اۋىسۋدىڭ ادام دەنساۋلىعىنا پايدالى ەكەنىن, قالىپتى ءومىر ءسۇرۋ ءۇشىن, اسىرەسە بالالاردىڭ دۇرىس دامۋى ءۇشىن, ەڭ الدىمەن, كۇن ساۋلەسى كەرەك ەكەنىن ايتىپ وتىر. الايدا قوستاناي وڭىرىندە جازدا ەرتە تاڭ اتىپ, كەش كۇن باتادى. ياعني ءوڭىر تۇرعىندارى تاڭەرتەڭ كەش ويانىپ, تۇنگە قاراي كەش جاتادى. سوندىقتان تابيعي كۇن اۋىسىمىنىڭ كەستەسىنە ءبىرتابان جاقىنداعان ابزال.
عالىمداردىڭ ايتۋىنشا, ءتۇن ورتاسىنا دەيىن ءتۇننىڭ تەڭ جارتىسى وتۋگە ءتيىس. ال قوستانايدا بۇل ۋاقىتتا ءتۇن ەندى باستالىپ جاتادى. سونداي-اق ءتۇس تاس توبەگە كوتەرىلگەندە ءتالتۇس بولۋ كەرەك. قوستانايدا ساعات 13:45 تە عانا ءتالتۇس بولادى. قازاقستان UTC+5 ۋاقىت بەلدەۋىنە كوشكەندە بۇل قولايسىز جاعداي كەم دەگەندە 1 ساعاتقا قىسقارادى.
جاڭا ۋاقىت بەلدەۋى, اسىرەسە بالالاردىڭ قىس ماۋسىمىندا مەكتەپكە, بالاباقشاعا بارۋىنا قولايلى جاعداي تۋدىرماق. ويتكەنى قازىرگى ۋاقىتتان ءبىر ساعات كەش ويانعان بالانىڭ ۇيقىسى قانىپ, سەرگەك تۇرادى.
الايدا ەندى وڭىردە قىسى-جازى كۇن ەرتە باتاتىن بولادى. دارىگەرلەر ادامنىڭ ۇيقىسى دۇرىس بولۋ ءۇشىن ەرتە جاتۋى كەرەك دەيدى.
دەنساۋلىق ساقتاۋ سالاسىنىڭ ۇزدىگى كوپەي مالشىباەۆ ەلىمىزدىڭ 2004 جىلى ساعات ءتىلىن اۋىستىرۋدان باس تارتۋى ۇلكەن قاتەلىك بولعانىن ايتادى. سالدارىنان تاڭ قۇزىنان مەكتەپكە دەدەكتەگەن بالالاردىڭ ۇيقىسى شالا بولىپ, ول دەنساۋلىقتارىنا سالماق سالعان. ويتكەنى بالانىڭ جۇيكە جۇيەسى كەش ويانادى. سايكەسىنشە ۇيقىلى-وياۋ بالانىڭ ميى اقپاراتتى تولىق قابىلداي الماعاندىقتان, تاڭعى ساباقتاردان دا ايتارلىقتاي پايدا بولمايدى. ءتىپتى اۋتيزمگە شالدىققان بالالار سانىنىڭ كوبەيۋى دە ۋاقىت بەلدەۋىنىڭ دۇرىس بولماۋىمەن بايلانىستى ەكەن.
قوستاناي وبلىسى
