فوتو: ن.بايبۋلين
ماۋلەن اشىمباەۆ قازاقستان مەن قىتاي اراسىندا عاسىرلاردان بەرى جالعاسىپ كەلە جاتقان دوستىق پەن ءوزارا قولداۋعا نەگىزدەلگەن بەلسەندى ساياسي ديالوگ قالىپتاسقانىن اتاپ ءوتتى. ستراتەگيالىق ىنتىماقتاستىقتىڭ نىعايۋىنا ەكى ەل باسشىلارىنىڭ ءوزارا سەنىمگە تابان تىرەگەن قارىم-قاتىناسى زور ىقپالىن تيگىزىپ كەلەدى. بىلتىر قازاقستان پرەزيدەنتى قاسىم-جومارت توقاەۆتىڭ قىتايعا جاساعان ساپارلارى ناتيجەسىندە 28 ەكىجاقتى قۇجاتقا جانە 78 كوممەرتسيالىق كەلىسىمگە قول قويىلدى.
پالاتا سپيكەرى پارلامەنتارالىق دەڭگەيدەگى ءوزارا ءىس-قيمىلدى حالىقارالىق ۇيىمدار اياسىندا دا ودان ءارى ارتتىرۋدىڭ ماڭىزدى ەكەنىنە نازار اۋداردى.
ء«بىز بۇكىلقىتايلىق حالىق وكىلدەرى جينالىسىمەن ىنتىماقتاستىقتى دامىتۋعا جانە زاڭنامالىق باعىتتا تاجىريبە الماسۋعا مۇددەلىمىز. ەكى ەلدىڭ زاڭ شىعارۋشى ورگاندارىندا پارلامەنتارالىق دوستىق توپتارى قۇرىلعان. ناقتى ءارى وزەكتى ماسەلەلەردى شەشۋ جولىندا وسى توپتاردىڭ الەۋەتىن پايدالانۋىمىز كەرەك. بۇل رەتتە دوستىق توپتارىنا مۇشە دەپۋتاتتاردىڭ قاتىسۋىمەن ءوزارا ساپارلار ۇيىمداستىرۋدىڭ جانە تۇراقتى كوميتەتتەر اراسىندا بايلانىس ورناتۋدىڭ ماڭىزى زور», دەدى م.اشىمباەۆ.
كەزدەسۋ بارىسىندا تاراپتار حالىقارالىق جانە وڭىرلىك كۇن تارتىبىنە قاتىستى اۋقىمدى ماسەلەلەردى دە تالقىلادى. ساۋدا-ەكونوميكالىق جانە مادەني-گۋمانيتارلىق ىنتىماقتاستىقتى ودان ءارى ارتتىرۋعا دا باسا ءمان بەرىلدى. اتاپ ايتقاندا, ينۆەستيتسيالىق ىنتىماقتاستىق, تۋريزم, سۋمەن قامتاماسىز ەتۋ جانە تاعى باسقا باعىتتار بويىنشا ءوزارا بايلانىستى جانداندىرۋعا قاتىستى تىڭ باستامالار ءسوز بولدى.
سونىمەن قاتار سەنات توراعاسى مەملەكەت باسشىسىنىڭ رەفورمالارىن زاڭنامالىق تۇرعىدان قامتاماسىز ەتۋ ءۇشىن پالاتا اتقارىپ كەلە جاتقان جۇمىستار جونىندە ايتتى.
ودان بولەك, قىتايدىڭ بۋدديزم جانە داوسيزم قاۋىمداستىقتارىنا الەمدىك جانە ءداستۇرلى دىندەر ليدەرلەرىنىڭ سەزىنە جۇيەلى تۇردە قاتىسىپ جانە فورۋم يدەيالارىن قولداپ كەلە جاتقانى ءۇشىن العىس ءبىلدىردى.
«بىلتىرعى قازان ايىندا استانادا سەزد حاتشىلىعىنىڭ XXI وتىرىسى ءوتتى. وندا ءبىز سەزدى دامىتۋدىڭ الداعى 10 جىلعا ارنالعان تۇجىرىمداماسىن قابىلدادىق. قۇجاتتا فورۋم دامۋىنىڭ جاڭا كەزەڭى مەن ماقسات-مىندەتتەرى ايقىندالعان. قىتايدىڭ بۋدديزم جانە داوسيزم قاۋىمداستىقتارىنىڭ باسشىلىعى سەزد اياسىنداعى ءىس-شارالارعا تۇراقتى ءارى بەلسەندى تۇردە قاتىسىپ كەلەدى. الداعى ۋاقىتتا دا وسى باعىتتاردا قىتاي وكىلدەرىمەن بىرلەسكەن جۇمىسىمىزدى جالعاستىرا بەرەمىز دەپ سەنەمىن», دەدى سەنات سپيكەرى.
ءوز كەزەگىندە حاو مينتسزين قازاقستاندا جۇرگىزىلىپ جاتقان قوعامدىق-ساياسي جاڭعىرتۋلاردى جوعارى باعالاپ, ىنتىماقتاستىقتى ودان ءارى كەڭەيتۋگە مۇددەلى ەكەنىن جەتكىزدى. سونداي-اق ول ءتۇرلى دىندەر اراسىندا ديالوگ قالىپتاستىرۋ جانە جاھاندىق قاۋىپسىزدىك ماسەلەلەرىن ىلگەرىلەتۋ جولىندا الەمدىك جانە ءداستۇرلى دىندەر ليدەرلەرى سەزىنىڭ جۇمىسى ماڭىزدى ءرول اتقاراتىنىن اتاپ ءوتتى.
