فوتو: prosports.kz
«ۆەلوسپورتتان ەلىمىزدىڭ ەڭبەك سىڭىرگەن سپورت شەبەرى, لوندون وليمپياداسىنىڭ چەمپيونى الەكساندر ۆينوكۋروۆپەن كەزدەستىم. داڭقتى ۆەلوشاباندوزىمىز وتاندىق سپورتتى, ونىڭ ىشىندە ۆەلوسپورتتى دامىتۋ جولىندا قاجىرلى ەڭبەك ەتىپ كەلەدى. 2013 جىلدان بەرى ول الەمگە ايگىلى «استانا» ۆەلوكومانداسىن باسقارادى. كەزدەسۋ بارىسىندا الەكساندر «استانا» ۆەلوكومانداسىنىڭ حالىقارالىق جارىستارداعى ناتيجەسى مەن بولاشاق دامۋ جوسپارلارى تۋرالى ايتىپ بەردى. ۆەلوسپورتتان ۇلتتىق قۇرامانىڭ كوشباسشىلارى وسى ۇجىمنىڭ وكىلدەرى ەكەنى بەلگىلى. سوندىقتان ءبىز وسى جازدا پاريجدە وتەتىن وليمپيادادا ەل نامىسىن قورعايتىن ۆەلوشاباندوزداردى دايىنداۋدىڭ جەكە جوسپارىن تالقىلادىق», دەپ جازدى ە.مارجىقپاەۆ.
مينيستر جيىن سوڭىندا الەكساندرعا قازاقستاننىڭ ەڭبەك سىڭىرگەن جاتتىقتىرۋشىسى قۇرمەتتى اتاعىن تاپسىردى. سپورتشى ءوز كەزەگىندە جازدا ۇلتتىق قۇرامامەن بىرگە پاريج وليمپياداسىنا بارۋعا ۋادە بەردى.
