فوتو: egemen.kz
زاڭدا 18 جاسقا دەيىنگى بالالارعا ۇلتتىق قوردىڭ تابىسى تەڭ بولىنەتىنى ايتىلعان. وسى ورايدا بيىل كامەلەت جاسىنا تولعان ازاماتتار قوردىڭ قارجىسىنا قول جەتكىزە الا ما دەگەن ساۋال تۋىندايدى.
باستاپقى مەجەگە ساي 2024 جىلى 18 جاسقا تولعان جەتكىنشەكتەر قارجىدان قۇر قالمايدى. ال بىلتىر بۇل جاسقا جەتكەن ازاماتتاردىڭ ەسەپشوتىنا ۇلتتىق قوردان اقشا اۋدارىلمايدى.
رەسمي سانعا سۇيەنسەك قور تابىسىنىڭ 50 پايىزى ەلدەگى 7 ميلليون بالاعا ۇلەستىرىلەدى. ونىڭ ىشىندە بيىل شەكتى جاسقا تولاتىن 300 بالانىڭ ەسەپشوتى قور قارجىسى ەسەبىنەن ءبىر رەت قانا تولىعادى.
بالالارعا بەرىلەتىن قارجى بىرىڭعاي جيناقتاۋشى زەينەتاقى قورىندا جيناقتالادى. وسى مەكەمە ماماندارى بالا قايعىلى جاعدايعا دۋشار بولعاندا ونىڭ ەسەپشوتىنداعى اقشا كىمگە بەرىلەتىنىن ايتتى.
«بالا قايتىس بولعان جاعدايدا زاڭمەن انىقتالعان مۇراگەرلەر بجزق-عا ءتيىستى قۇجاتتارمەن جۇگىنەدى, قاعازدار قارالعان سوڭ مۇراگەرلەر بۇل ماقساتتى جيناقتاردى وزدەرىنىڭ بانكتىك شوتتارىنا الا الادى, ولارعا اقشانى بەلگىلى ماقساتتا عانا پايدالانۋ كەرەك دەگەن شەكتەۋ قويىلمايدى», دەدى «بجزق» اق باسقارۋشى ديرەكتورى مۇرات ءشارىپوۆ.
ال جىلدار بويى ەسەپشوتىندا ۇلتتىق قوردان بولىنگەن قارجى جينالعان بالا اقشاسىن ەكى ماقساتتا پايدالانا الادى.
- تۇرعىن ءۇي جاعدايىن جاقسارتۋ;
- وقۋ اقىسىن تولەۋ.
18 جاسقا تولعاندا شوتتاعى قاراجات 5-10 جىل بويى ساقتالادى. وسى ۋاقىت ارالىعىنداعى پايدالانىلماعان قاراجاتتى زەينەتاقى شوتىنا اۋدارۋ ۇسىنىلادى. سونداي-اق ازاماتتىق زاڭناماعا سايكەس ءىس جۇزىندە جيناقتالعان قاراجاتتى مۇراگەرلىك بويىنشا بەرۋ مۇمكىندىگى دە قاراستىرىلعان.
ايتا كەتەيىك, باعدارلاما بويىنشا العاشقى تولەمدەر اقپان ايىنىڭ باسىندا بالالاردىڭ شوتىنا اۋدارىلا باستايدى. قارجىلىق وپەراتسيالاردى ازاماتتارعا ارنالعان ەلەكتروندىق ۇكىمەتتىڭ نەمەسە بىرىڭعاي جيناقتاۋشى زەينەتاقى قورىنىڭ سايتىندا بالانىڭ جسن تەرۋ ارقىلى تەكسەرۋگە بولادى.
