جىل سايىن تاعايىندالاتىن مەملەكەتتىك ستيپەنديا مادەنيەت پەن ونەر, شىعارماشىلىق سالاسىنىڭ وكىلدەرى جانە دارىندى جاستاردى قولداۋعا باعىتتالعانى بەلگىلى. مينيستر ماراپاتتاۋ ءىس-شاراسىن جاس قالامگەرلەرگە مەملەكەتتىك قولداۋ كورسەتۋ, دارىندى اقىن-جازۋشىلاردىڭ جاڭا بۋىنىن قالىپتاستىرۋ ماقساتىندا تۇڭعىش رەت بەرىلگەن پرەزيدەنتتىك ارناۋلى ادەبي سىيلىقتى تاپسىرۋ راسىمىمەن باستادى.
«ادەبيەت پەن ونەر سالاسى وكىلدەرىنە مەملەكەتتىك سىيلىق بەرۋ ەلىمىزدە ءداستۇرلى ءىس-شاراعا اينالدى. ءار سالانىڭ تالانتتى وكىلدەرىنە قولداۋ ءبىلدىرۋ قوعامنىڭ العا باسۋىنا, سالاعا كەلگەن جاستارعا سەرپىن بەرۋگە ىقپال ەتەدى. بۇل – جازۋشىنىڭ دا, ونەر ادامىنىڭ دا جانكەشتى ەڭبەگىنە جاسالعان قۇرمەت پەن قولداۋ. ەلىمىزدىڭ قاي وڭىرىندە دە بولماسىن قوعامنىڭ دامۋىنا اتسالىسىپ جۇرگەن ءار ازاماتتىڭ ەڭبەگى باعالانۋى قاجەت. بۇل جولعى ماراپات وسى ۇدەدەن شىقتى دەگەن سەنىمدەمىن. بۇگىندە ەلىمىزدە قاي سالانى الساق تا تۇيتكىلدى ماسەلە جوق دەپ ايتا المايمىز. قازىرگى كەزدە ءتيىستى مينيسترلىك وڭىرلەر بويىنشا ارنايى ساراپتاما جۇرگىزىپ, ناقتى ماسەلەلەردى انىقتاۋ باعىتىندا جۇمىستاردى جالعاستىرىپ كەلەدى. دەگەنمەن كىتاپحانا ءىسى, كىتاپ شىعارۋ, ءبىلىم بەرۋ سالاسىن جاقسارتۋعا باعىتتالعان بارلىق ءىس-شارانى ناتيجەلى ەتۋ اسا ماڭىزدى. ال ادەبيەت پەن ونەرگە جاڭا قادام باسىپ, ءوز ەڭبەكتەرىمەن ەلەنگەن جاستارعا دەگەن سەنىم زور. وتكەن جىلدان باستاپ «حالىق جازۋشىسى» مارتەبەسى قايتا جانداندى. بۇل مارتەبە جاس قالامگەرلەر ءۇشىن بيىك شىڭ ىسپەتتى دەيتىن بولساق, جاستاردىڭ وسى بيىك شىڭعا كوتەرىلۋىنە تىلەكتەستىك بىلدىرەمىن», دەدى مينيستر.
جيىن بارىسىندا مينيستر قازاق ادەبيەتىنىڭ كورنەكتى وكىلدەرى دۋلات يسابەكوۆ, بەكسۇلتان نۇرجەكە, كادىربەك سەگىزباەۆ, يرانبەك ورازباەۆ, مارفۋعا ايتقوجا, ءحانبيبى ەسەنقاراقىزى, باحىتجان قاناپيانوۆ, نۇرعالي وراز, باۋىرجان جاقىپ, ونەر سالاسىنىڭ قايراتكەرلەرى ءاسانالى ءاشىموۆ, نۇرعالي ءنۇسىپجان, تۇڭعىشباي جامانقۇلوۆ, نۇكەتاي مىشباەۆا, ەسمۇقان وباەۆ, اماندوس اقاناەۆ جانە باسقالارعا مەملەكەتتىك ستيپەنديانى تابىس ەتتى. سونىمەن قاتار جەڭىمپاز جاستار قاتارىندا كانن حالىقارالىق فەستيۆالىنىڭ جۇلدەگەرى, اكتريسا سامال ەسلاموۆا, كامەرالىق انسامبل ءارتىسى تولقىنحان سامعار, سكريپكاشى ەركەبۇلان ساپارباەۆ, سۋرەتشى رەنات ەلۋباەۆ, اباي اتىنداعى قازاق ۇلتتىق وپەرا جانە بالەت تەاترىنىڭ ءسوليسى اندرەي ترەگۋبەنكو, «استانا وپەرا» مەملەكەتتىك وپەرا جانە بالەت تەاترىنىڭ ءسوليسى نازىم ساعىنتاي, م.گوركي اتىنداعى مەملەكەتتىك اكادەميالىق ورىس دراما تەاترىنىڭ اكتەرى ماكسيم ياششەنكو ماراپاتتالدى.
پرەزيدەنتتىك ارناۋلى ادەبي سىيلىققا ۇمىتكەر 18-35 جاس ارالىعىنداعى قالامگەرلەرگە ارنالعان بايقاۋ «پروزا», «پوەزيا», «دراماتۋرگيا» جانە «بالالار ادەبيەتى» اتالىمدارى بويىنشا وتكەنى بەلگىلى. بايقاۋعا قاتىسقان 50-دەن استام قاتىسۋشىنىڭ ىشىنەن 17 تالاپكەر – «بالالار ادەبيەتى», 9 قاتىسۋشى – «دراماتۋرگيا», 13 قاتىسۋشى – «پوەزيا», 14 قاتىسۋشى «پروزا» اتالىمى بويىنشا ءوتىنىم بەرگەن.
وسى بايگەدەن وزا شاپقان جەڭىمپازدار قاتارىندا كوميسسيانىڭ شەشىمىمەن «پروزا» اتالىمى بويىنشا «كۆانت» تۋىندىسى ءۇشىن دوسحان جىلقىباي, «پوەزيا» اتالىمىندا «قالالىق قۇستار» ولەڭدەر توپتاماسى ءۇشىن ەدىلبەك دۇيسەنوۆ, «بالالار ادەبيەتى» اتالىمى بويىنشا «اتىڭ وزسىن, ازامات!» توپتاماسى ءۇشىن ولجاس قاسىم, «دراماتۋرگيا» اتالىمى بويىنشا «تاۋ كوتەرگەن تولاعاي» درامالىق تۋىندىسى ءۇشىن ايتولقىن ءاشىموۆا پرەزيدەنتتىك سىيلىقتىڭ يەگەرى اتاندى.
وسى ورايدا مەملەكەتتىڭ ادەبيەت جانە ونەر سالاسىندا جۇرگەن جاستارعا قولداۋ ءبىلدىرىپ جاتقانىن زور قۋانىشپەن قابىلداپ, ولارعا جىلى لەبىزىن بىلدىرگەن قازاقستاننىڭ حالىق جازۋشىسى بەكسۇلتان نۇجەكە اسىرەسە بالالار ادەبيەتىنە كورسەتىلگەن قولداۋدىڭ ماڭىزدىلىعىنا توقتالىپ, پرەزيدەنتتىك ارناۋلى ادەبي سىيلىققا دەرەكتى شىعارمالار اتالىمىن قوسۋ قاجەت دەگەن ۇسىنىسىن ءبىلدىردى. ال اقىن, مەملەكەتتىك «دارىن» جاستار سىيلىعىنىڭ لاۋرەاتى ەرلان ءجۇنىس جاس قالامگەرلەردى قۇتتىقتاپ, ولاردىڭ بويىنداعى جاستىق جىگەر, سىنشىلدىق, وتانسۇيگىشتىك قاسيەتتەر ۇلتتىق ادەبيەتىمىزدىڭ كەمەلدەنۋىنە جۇمسالسا دەپ تىلەك ايتتى.
الماتى
