قازىرگى تاڭدا مەكتەپ ءبىتىرۋشى تۇلەكتەر جوعارى وقۋ ورىندارىنا ءتۇسۋ ءۇشىن ۇبت-نى بەس رەت تاپسىراتىنى بەلگىلى. سونىڭ العاشقىسى – قاڭتار ايىنداعى سىناق. تالاپكەرلەر بۇل جولعى سەرتيفيكاتپەن مەملەكەتتىك گرانتقا قاتىسا المايدى, بىراق شەكتىك بالدان اسسا, اقىلى وقۋعا تۇسۋگە مۇمكىندىك بار. سونىمەن قاتار تەستىلەۋدىڭ قالاي وتەتىنىن كورىپ, اۋانىن سەزىنىپ, ءبىلىمىن ءبىر پىسىقتاپ الۋعا تاپتىرماس ءسات.
– قاڭتار ايىنداعى ۇبت-نىڭ ءبىرىنشى اپتاسى اياقتالدى. تەستىلەۋ 10 اقپانعا دەيىن جالعاسادى. تەستىلەۋگە قاتىسۋعا 136 مىڭ ءوتىنىش كەلىپ ءتۇستى. ولاردىڭ باسىم بولىگى, اتاپ ايتقاندا, 19%-ى «ماتەماتيكا-فيزيكا» پاندەر كومبيناتسياسىن, 14%-ى «بيولوگيا-حيميا» كومبيناتسياسىن تاڭداعان. ەڭ از تاڭدالعان كومبيناتسيا – «حيميا-فيزيكا», ونى 22 ادام تاپسىرعان, – دەدى ۇلتتىق تەستىلەۋ ورتالىعىنىڭ ديرەكتورى رۋسلان ەمەلباەۆ.
گرانتقا ىنتالى ءار تالاپكەردىڭ ماقساتى جوعارى بالل الۋ ەكەنى انىق. ال جوعارى ۇپاي الۋ ءۇشىن ارينە, جوعارى دەڭگەيدەگى دايىندىق كەرەك.
– 11-سىنىپ وقۋشىلارى قاڭتار ايىنداعى سىناقتىڭ ناتيجەسىندە ءبىلىم دەڭگەيىن ءبىلىپ, تەستىلەۋدىڭ قانداي بولاتىنىن سەزىنەدى. تۇلەكتەردىڭ كوبى بۇل جولعى تەستىلەۋدەن كەيىن بىردەن ەس جيىپ, دايىندىققا بىلەك سىبانا كىرىسەدى. مۇعالىم رەتىندە ايتارىم, ۇبت تاپسىرۋ جىلدان-جىلعا جاڭا فورماتقا اۋىسىپ, اكادەميالىق ادالدىق جاقسى ساقتالىپ, جاڭا دەڭگەيگە كوتەرىلىپ كەلە جاتىر. قاڭتار ايىنداعى تەستىلەۋ – وقۋشىلاردى ناعىز ۇبت-عا تىڭعىلىقتى دايىندالۋعا سەرپىن بەرەدى. سوندىقتان وقۋشىلارىما «كوپ الساڭ تاسىما, از الساڭ جاسىما» دەپ ءجيى ايتامىن, – دەيدى استانا قالاسىنداعى JUZ40 EDUCATION ءبىلىم بەرۋ ورتالىعىنىڭ مۇعالىمى نيليۋفار قالمەنوۆا.
سونىمەن قاتار العاشقى سىناقتى تاپسىرىپ شىققان وقۋشىلاردىڭ دا پىكىرىنە قۇلاق سالدىق. ولار كامەرانىڭ الدىندا ءبىرىنشى رەت تاپسىرعاندىقتان قاتتى قوبالجىعاندارىن جاسىرمادى. ءتىپتى دايىندىقتى 11-سىنىپتا باستاعاندىقتان, وتپەگەن تاقىرىپتاردىڭ سۇراعىنان مۇدىرگەندەرىن دە اشىق ايتتى. بىراق بۇل تەستىلەۋ كەلەسى ۇبت-عا جۇيەلى تۇردە جاقسىلاپ دايىندالۋ كەرەكتىگىن انىق ۇقتىردى دەستى ولار.
ال دايىندالامىن دەگەن وقۋشىعا مۇمكىندىك كوپ. اتاپ ايتساق, 2024 جىلعى تۇلەكتەرگە ءبىلىم بەرۋ ورتالىقتارىنىڭ قولداۋىمەن تەگىن ونلاين ساباقتار جۇرگىزىلىپ جاتىر. بۇل ساباقتار ءبىلىم بەرۋ ورتالىقتارىنىڭ YouTube ارنالارىندا تىكەلەي ەفيردە ءوتىپ, ساقتالادى. تالاپكەرلەر كەز كەلگەن ۋاقىتتا ولاردى قايتا قاراي الادى. ال ەندى بىلىمىنە ەمەس, سمارتفونعا سەنگەن وقۋشىلارعا ءتارتىپ قاتال. قازىردىڭ وزىندە 12 تالاپكەر سمارتفون, شپارگالكا جانە باسقا دا تىيىم سالىنعان زاتتاردى الىپ ءوتۋ ارەكەتى سالدارىنان تەست تاپسىرۋ مۇمكىندىگىنەن ايىرىلدى. تەستىلەۋ كەزىندە ەرەجەلەردى بۇزعانى ءۇشىن اۋديتوريادان 5 ادام شىعارىلىپ, ولاردىڭ ناتيجەلەرى جويىلدى.
ايتا كەتەيىك, 2024 جىلعى ۇبت اياقتالعاننان كەيىن كۇنتىزبەلىك جىلدىڭ 31 قازانىنا دەيىن تەستىلەۋدىڭ بەينەجازبالارىنا تالداۋ جۇرگىزىلەدى. تىيىم سالىنعان زاتتاردى پايدالانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا تالاپكەردىڭ ناتيجەلەرى جويىلادى.
بەكزات قۇلشار,
ل.ن.گۋميلەۆ اتىنداعى ەۇۋ ستۋدەنتى
