قازاق ونەرپازدارىنىڭ كونتسەرتتىك باعدارلاماسى بەلفور زالىنىڭ رەسمي كەستەسىنە ەندى. ۇيىم وكىلدەرىنىڭ ايتۋىنشا, بۇل سيرەك كەزدەسەتىن وقيعا. سودان بولار, زال كورەرمەنگە لىق تولىپ, قوشەمەتكە بولەندى.
ايتا كەتەيىك, «Focus Kazakhstan 2024» جوباسىن بەلفور ۇلتتىق تەاترى «Le GRANIT» جانە «Art Ambassadeurs» ۇيىمى ۇيىمداستىرىپ وتىر. جالپى, ءىس-شارانىڭ ماقساتى – قازاقستان مەن فرانتسيا اراسىنداعى مادەني ىنتىماقتاستىقتى نىعايتۋ. الداعى ۋاقىتتا ءتۇرلى جارمەڭكەلەر, فيلمدەر مەن كورمەلەر وتكىزۋ جوسپارى بار. ەسكە سالساق, 2022 جىلى اتالعان ۇيىم وكىلدەرىنىڭ جوبانى ىسكە اسىرۋ اياسىندا ەكى ەلدىڭ مادەني ىنتىماقتاستىق ماسەلەلەرىن تالقىلاۋ ماقساتىندا «قازاقكونتسەرتتىڭ» تىنىس-تىرشىلىگىمەن تانىسىپ قايتقان ەدى. دەلەگاتسيا «حالىق قازىناسى» ۇلتتىق ونەر ورتالىعىنىڭ ارتىستەرى مەن كلاسسيكالىق ونەر ءبولىمىنىڭ سوليستەرىنىڭ شىعارماشىلىعىنا زور قىزىعۋشىلىق تانىتتى. ناتيجەسىندە, «قازاقكونتسەرت» ارتىستەرى «Focus Kazakhstan 2024» جوباسىندا ونەر كورسەتىپ جاتىر.
19 قاڭتاردا Maison du Peuple de Belfort زالىندا الەمگە ايگىلى «TURAN» ەتنو-فولكلورلىق ءانسامبلى, قازاق بي ونەرىنىڭ ءىنجۋ-مارجانى «گۇلدەر» ءانسامبلى مەن «حالىق قازىناسى» ۇلتتىق ونەر ورتالىعىنىڭ سوليستەرى ايزات قارابەك پەن اسقار مۇقياتتىڭ قاتىسۋىمەن «دالا اۋەندەرى» كونتسەرتى ءوتتى. ارتىستەردىڭ شىعارماشىلىق كوللابوراتسياسى شەتەلدىك كورەرمەنگە دالا رۋحى مەن ۇلتتىق مۇرا بايلىعىن بىرىكتىرگەن قازاق مادەنيەتىنىڭ اسەم الەمىنەن ۇمىتىلماس اسەر سىيلادى.
ال 26 قاڭتار كۇنى جوسپارلانعان مۋزىكالىق كەشكە كلاسسيكالىق ونەر ءبولىمىنىڭ سوليستەرى, قازاقستاننىڭ ەڭبەك سىڭىرگەن قايراتكەرى بيبىگۇل جانۇزاق, مادەنيەت سالاسىنىڭ ۇزدىگى دينا ميرمانوۆا, «دارىن» مەملەكەتتىك جاستار سىيلىعىنىڭ لاۋرەاتى ازات مالىك جانە «forte trio» مەملەكەتتىك تريوسى قاتىسادى. كونتسەرت باعدارلاماسىندا شەتەلدىك جانە ەلىمىزدىڭ كومپوزيتورلارىنىڭ كلاسسيكالىق مۋزىكا جاۋھارلارى ورىندالادى.
فرانتسيانىڭ قوعام قايراتكەرى رافاەل سوديني ەكى ەل اراسىنداعى ورتاق مۇددەلەردىڭ بار ەكەنىنە توقتالدى.
«بۇل قازاق مادەنيەتىن جاقسى بىلمەيتىن, بىراق تانىسقىسى كەلەتىن بەلفور تۇرعىندارىنا كەرەمەت مۇمكىندىك. قازاقستان مەن فرانتسيا اراسىندا ورتاق مۇددەلەر بار. تەك ساياسي-ەكونوميكالىق تۇرعىدا ەمەس, مادەني جاعىنان دا قارىم-قاتىناسىمىزدى نىعايتۋ ماڭىزدى دەپ ويلايمىن. «تۇران» ەتنو-فولكلورلىق ءانسامبلى بەلفوردا ەكىنشى مارتە ونەر كورسەتىپ وتىر. بۇل جولى جەرگىلىكتى تىڭدارمان كوپ بولدى. سونداي-اق اتى اڭىزعا اينالعان «گۇلدەر» ءانسامبلىنىڭ جاڭا قۇرامى فرانتسيالىق قاۋىم ءۇشىن جاڭالىق بولدى», دەدى رافاەل سوديني.
سونداي-اق «گۇلدەر» ءانسامبلىنىڭ باس بالەتمەيستەرى انۆارا ارىپقىزى گاسترولدىك ساپاردىڭ مادەني ماڭىزىن اتاپ ءوتتى.
«فرانتسيا ساحناسىندا ونەر كورسەتۋ – ءبىز ءۇشىن ءبىر جاعىنان سىناق, ءبىر جاعىنان مارتەبە. بەلگىلى «تۇران» انسامبلىمەن بىرگە شىققانىمىز دا بيشىلەرگە ەمتيحان سىندى. ۇلتتىق اسپاپتاردا ءداستۇرلى اۋەندەرىمىز ورىندالدى. مىڭ بۇرالعان بيشىلەرىمىز بەن انشىلەرىمىز ءوز ونەرلەرىمەن شاشۋ شاشتى. ساحناداعى كوگىلدىر ەكراننان ەلىمىزدىڭ كورىكتى جەرلەرى كورسەتىلدى. كونتسەرتكە جينالعان قاۋىم قازاقستانعا ۆيرتۋالدى ساياحات جاساعانداي اسەردە بولعانىن ەرەكشە تاڭدانىسپەن ايتتى», دەدى ول.
ال ءانشى اسقار مۇقيات فرانتسۋز ساحناسىندا حالىق ءانى «ەكى جيرەندى» شىرقادى. بۇل ءاندى تاڭداپ الۋى دا بەكەر ەمەس.
«فرانتسۋزداردىڭ جانە سول جاقتا ءومىر ءسۇرىپ جاتقان تۇركى تىلدەس حالىقتاردىڭ قازاقتىڭ ۇلتتىق ونەرىنە, ۇلتتىق اسپاپتارىنا, ءبيى مەن انىنە دەگەن ىستىق ىقىلاسىن كورىپ, ەرەكشە تولقىدىم. العاشقى كونتسەرتىمىز جوعارى دەڭگەيدە ءوتتى. كەش سوڭىندا كورەرمەندەر ورىندارىنان تۇرىپ, قوشەمەت كورسەتىپ, ءبىزدى ساحنادان جىبەرمەي ءبىراز تۇردى. ال ءوزىم فرانتسيا ەلىنە حالىق ءانى «ەكى جيرەن» مەن ۇكىلى ىبىرايدىڭ «جيىرما بەسىن» تاڭداپ الدىم. ويتكەنى «ەكى جيرەن» – قازاق ونەرىن ەۋروپا تورىنە تانىتقان امىرە قاشاۋباەۆتىڭ رەپەرتۋارىندا بولعان جانە پاريجدە ورىندالعان ءان», دەيدى اسقار مۇقيات.
«Focus Kazakhstan 2024» ءىس-شاراسى ەكى ەلدىڭ مۋزىكالىق داستۇرلەرىنىڭ مادەني بايلانىسىنا باسا نازار اۋدارعان ەكى ەل اراسىنداعى بىرىڭعاي مادەني كوپىر بولماق. ايتا كەتەيىك, جىل سوڭىنا دەيىن جالعاساتىن جوبا اياسىندا بىرقاتار كونتسەرت, جارمەڭكە, كينو كورسەتىلىم مەن كورمە جوسپارلانىپ وتىر.
