ورتالىق باسشىسى ماقپال جۇماباي قوناقتارعا جۋرناليستەردىڭ كۇندەلىكتى جۇمىسىندا قولدانۋعا ىڭعايلى «Emle.kz», «Termincom.kz», «Sozdikqor.kz», «Qazcorpora.kz» سىندى تىلدىك جوبالارمەن قاتار, قازاق تىلىندەگى ءماتىندى دىبىسقا اينالدىراتىن جانە دىبىستى ماتىنگە اينالدىراتىن Telegram-بوت جۇيەسى تۋرالى تولىعىراق بايانداپ بەردى.
كەزدەسۋگە قاتىسقان باس رەداكتورلار كلۋبىنىڭ ۆيتسە-پرەزيدەنتى, رەسپۋبليكالىق «ادىلەت» گازەتىنىڭ باس رەداكتورى مۇراتبەك توقتاعازين, قازاق راديوسىنىڭ ارداگەرى, بەلگىلى ديكتور كۇلاش مولداحمەتوۆا, «Abai tv» تەلەارناسىنىڭ ديرەكتورى ەركىن تاڭاتقان ۇلى, «قازاق گازەتتەرى» جشس باس ديرەكتورىنىڭ ورىنباسارى قامبار احمەتوۆ, «قازاقستان» رترك» اق ينتەرنەت ديرەكتسياسىنىڭ جەتەكشىسى قانات اۋەسباي, «استانا اقشامى» گازەتىنىڭ شەف-رەداكتورى تولەن تىلەۋباي, باس رەداكتورلار كلۋبىنىڭ جاۋاپتى حاتشىسى بيبىگۇل قۇلامان جانە باسقا جۋرناليستەر ءوز ويلارى مەن ۇسىنىستارىن ورتاعا سالدى. كلۋب مۇشەلەرىنىڭ ايتۋىنشا, جۋرناليستەر ماتەريال دايىنداۋ بارىسىندا كونەرگەن سوزدەرگە نەمەسە تۇسىنىكسىز تەرميندەرگە ءجيى ۇشىراسادى.
«جىلدام اقپارات جازۋ كەزىندە ءماتىننىڭ دۇرىستىعىن تەكسەرۋگە ۋاقىت تاپشى بولاتىن ساتتەر بار. سوندايدا جوعارىدا اتالعان پلاتفورمالاردىڭ قاي-قايسى دا كومەكشى بولا الادى», دەيدى ءباسپاسوز وكىلدەرى.
جيىندى جۇرگىزگەن بيبىگۇل جەكسەنباي: «تەحنولوگيا – ءومىرىمىزدىڭ اينىماس بولشەگىنە اينالدى. قازىر جاستارىمىزدان باستاپ ۇلكەندەرگە دەيىن الەۋمەتتىك جەلى, ينتەرنەت مۇمكىندىكتەرىن كەڭىنەن پايدالانادى. وسى تۇرعىدان العاندا, ء«تىل-قازىنا» ورتالىعىندا ازىرلەنگەن قازاق ءتىلىن دامىتۋ باعىتىنداعى ءىت جوبالار مەن ءتۇرلى پلاتفورمالاردى جوعارى وقۋ ورىندارى مەن مەكتەپتەردە وقۋ-تاربيە ۇردىسىنە ەنگىزۋ, كوپشىلىك پايدالانىپ جۇرگەن ءتۇرلى ينتەرنەت رەسۋرستاردا قولجەتىمدى قىلۋ اسا ماڭىزدى دەپ بىلەمىن. باس رەداكتورلار كلۋبى ورتالىقتىڭ تىلگە قاتىستى جاڭا ونىمدەرىن بۇقارالىق اقپارات قۇرالدارى ارقىلى قوعامعا تانىستىرۋعا ءاردايىم دايىن. مەملەكەتتىك ءتىلىمىزدىڭ ساپالى جانە ءتيىمدى تۇردە دامۋىن ۇيىمداستىرۋ ءتىل ماماندارى مەن باق وكىلدەرىنە ورتاق مىندەت», دەدى.
كەزدەسۋدە عىلىمي قاۋىمداستىق الدىندا تۇرعان ماڭىزدى مىندەتتىڭ ءبىرى – اۋقىمدى ءتىل مودەلىن قۇرۋ ماسەلەسى دە تالقىلاندى. سونىمەن قاتار جاساندى ينتەللەكتىنى قازاقشا دامىتۋ قادامدارى مەن وسى باعىتتاعى ناقتى ىزدەنىستەر جايلى تۇشىمدى ويلار ايتىلدى. جيىن سوڭىندا م.جۇماباي قوناقتارعا ورتالىقتىڭ كەلەشەككە جوسپارلانعان ىرگەلى جوبالارى تۋرالى دا جان-جاقتى مالىمەت بەردى.
