فوتو: aikyn.kz
تولعاندىرعان تاقىرىپتىڭ ءبىرى – تۇرمىستىق زورلىق-زومبىلىق ماسەلەسى. پرەزيدەنت وتباسىنداعى جانە باسقا دا ءتۇرلى زورلىق-زومبىلىق ارەكەتكە قاتىسى كەلەلى وي, كەسىمدى ءسوز قوزعادى. ءبىز بۇعان دەيىن پارلامەنتتە دە كوتەرگەن بۇل ماسەلە راسىندا قوعامدا وتە وزەكتى بولىپ تۇر.
وكىنىشكە قاراي, قوعامدا تۇرمىستىق زورلىق-زومبىلىققا قاتىستى رەزونانس تۋدىرعان وقيعالار دا از ەمەس. بۇل زاڭدا جەتىلدىرەتىن نارسەنىڭ ءالى دەپ كوپ ەكەنىن كورسەتەدى. زاڭ جوق ەمەس, بار. قازىرگى قولدانىستاعى زاڭنىڭ ورىندالۋىن كۇشەيتسەك, كوپ نارسە وڭالارى ءسوزسىز. ىشكى ىستەر ورگاندارىندا جۇمىس ىستەيتىن ازاماتتارمەن سويلەسكەنىمىزدە, ءبىر جايتتى اڭعارتىپ ەدى. ء«بىزدىڭ قوعامدا قىلمىستىڭ سانى بۇرىنعىدان كوبەيىپ كەتكەن جوق, تەك سول تۋرالى اقپارات كوبەيىپ كەتتى», دەيدى ولار. قازىر مۇنداي جاعىمسىز اقپاراتتىڭ كوپتىگى دە ەلىمىزدە جاپپاي سونداي جاعداي بولىپ جاتقانداي اسەر قالدىراتىنى دا بار. الايدا جوققا شىعارا المايمىز, بارى راس. بىراق بۇرىنعىداي ەمەس, باقىلاۋ كۇشەيدى. قازىر بارلىق جەردە بەينەباقىلاۋ ورناتىلعان. مەكتەپتەر دە تۇگەل باقىلاۋدا. وسىعان ساي بۇرىنعىدان گورى زورلىق-زومبىلىق ايتارلىقتاي ازايىپ كەتكەن جوق. سوندىقتان مەملەكەت باسشىسى ايتقانداي, زاڭ تالاپتارىن كۇشەيتۋ كەرەك. بۇعان قوسا وتباسى قۇندىلىعىن ارتتىرۋ قاجەت. «وتان وت باسىنان باستالادى», بۇل بەكەر ايتىلعان ءسوز ەمەس. مۇنىڭ ءبارى – ءبىر-بىرىمەن استاسقان ۇعىم. ءبىرىنشى – زاڭ, ەكىنشى سانا وزگەرۋگە ءتيىس.
پارلامەنتتە بۇعان قاتىستى زاڭ قارالىپ, جەتىلدىرىلىپ جاتىر. كەيدە قوعام ءبىر جاڭا زاڭ قابىلدانسا ەندى ءبارى ساپ تىيىلا قالادى دەپ قابىلدايدى. قوعامدا بىلگىلى ءبىر ءتارتىپ پەن تالاپ قالىپتاسقانشا ۋاقىت كەرەك. ال زاڭداعى كەيبىر ولقى تۇستار دا ۋاقىت وتە كەلە كورىنەدى. بۇل رەتتە جاۋاپكەرشىلىك زاڭ قىزمەتكەرلەرىنە تۇسەدى. ءاربىر ۋچاسكەلىك ينسپەكتوردىڭ دا شاش ال دەسە باس الماي, ءار ءىستى زاڭدى تۇرعىدا جۇزەگە اسىرۋى ۇلكەن ءرول اتقارادى. زاڭ تالاپتارىن ءبىز ەستيار بالالاردان باستاپ ناسيحاتتاپ, ساناسىنا ءسىڭىرۋىمىز كەرەك. مۇنى گۋمانيستىك قۇندىلىقتاردى ەسكەرە وتىرىپ, ۇلتتىق مەنتاليتەتكە, ەل-جەر جاعدايىنا ساي دامىتۋىمىز قاجەت. قوعامعا قاجەتتى يدەولوگيا ۇلتتىق وتباسى قۇندىلىقتارى اينالاسىنان باستالۋعا ءتيىس. پرەزيدەنتتىڭ سۇحباتتا ايتقان تۇجىرىمدى ويلارى دا وسىعان سايادى.
جارقىنبەك امانتاي,
ءماجىلىس دەپۋتاتى
