الدىمەن اسقاردىڭ جۇرت جادىندا ساقتالعان وشپەس ەرلىگىن وقىرمان قاۋىمنىڭ ەسىنە تاعى ءبىر سالا كەتەلىك. 2022 جىلدىڭ قاراشا ايىندا تۇرعىن ءۇي كەشەنىندە ورىن العان الاپات ءورتتى ءسوندىرۋ بارىسىندا ءۇش ادامنىڭ ءومىرىن ساقتاپ قالدى. وكىنىشتىسى سول, ءتىلسىز جاۋمەن الىسىپ ءجۇرىپ ءوزى قازا تاپتى. ەل پرەزيدەنتى قاسىم-جومارت توقاەۆتىڭ جارلىعىمەن ءى دارەجەلى «ايبىن» وردەنىمەن ماراپاتتالدى. ەڭ باستىسى, ءوز قىزمەتىن ادال اتقارعان, باسىنا تونگەن قاۋىپ-قاتەردەن قاشپاعان ەسىل ەردىڭ ارتىندا ەلدى ءسۇيۋدىڭ, جەردى ءسۇيۋدىڭ, ءوز جۇرەك قالاۋىمەن تاڭداعان ماماندىققا ادالدىقتىڭ ومىرشەڭ ونەگەسى قالدى. سالتاناتتى ساتتە ءسوز سويلەگەن توتەنشە جاعدايلار ۆيتسە-ءمينيسترى باۋىرجان سىزدىقوۆ قۇتقارۋشىلار مەن ءورت سوندىرۋشىلەردىڭ ءاردايىم ەرلىكپەن ورنەكتەلەتىن ادال ەڭبەكتەرى تۋرالى كەڭىنەن تولعاپ ايتىپ بەردى.
– اسقار زابيكۋليننىڭ ەرلىگى شىن مانىندەگى شىنايى ءپاتريوتيزمنىڭ, پاراساتتى پارىزدىڭ ۇلگىسى, – دەدى باۋىرجان سىزدىقوۆ. – ەسىمى قازاقستان رەسپۋبليكاسى توتەنشە جاعدايلار مينيسترلىگىنىڭ عانا ەمەس, بۇكىل ەلىمىزدىڭ تاريحىندا جازىلىپ قالدى. كەيىنگى ۇرپاق, اعا بۋىننىڭ وكشەسىن باسىپ كەلە جاتقان جاستار ادالدىق پەن جاۋاپكەرشىلىكتىڭ قانداي بولاتىندىعىن الدىڭعى بۋىننىڭ وكىلى اسقار ءتارىزدى ەسىل ەرلەردىڭ ونەگەسىنەن الادى.
ەسكەرتكىش تاقتاعا جابىلعان اق جامىلعى الىنعاننان كەيىن باتىردىڭ رۋحىنا تاعزىم ەتىپ كەلگەن قاۋىم گۇل شوقتارىن قويىپ, ءبىر مينۋت ۇنسىزدىكپەن ەسكە الدى.
– اقمولالىق قۇتقارۋشىلار كاسىبي ءىس-قيمىلدارىنىڭ ارقاسىندا وتكەن جىلى ءۇش جۇزدەن استام ادامنىڭ ءومىرىن ساقتاپ قالدى, – دەپ اتاپ ءوتتى وبلىس اكىمىنىڭ ءبىرىنشى ورىنباسارى ەلدوس رامازانوۆ. – اسقارداي ۇل وسىرگەن, ءتالىمدى تاربيە بەرگەن اتا-اناسىنا العىس ايتامىز.
ەسكەرتكىش 3,7 مەترلىك تۇعىرعا ورناتىلعان. اينالاسى ادەمىلەپ اباتتاندىرىلعان. كورىك بەرىپ تۇراتىن كوك وسكىن اعاش ەگىلىپتى. ۇقىپتى قولدىڭ تابى اڭعارىلىپ تۇراتىن تازالىقتىڭ رەڭى ەرگە دەگەن ەلدىڭ ىستىق ىقىلاسى مەن قوشەمەتىن بىلدىرەتىندەي. بەيبىت زاماندا ناعىز باتىرلارعا ءتان ەرلىكتىڭ ەرەن ۇلگىسىن كورسەتكەن اسقار بەينەسى ايتىپ كەلمەيتىن اپات كەزىندە نامىس پەن جاۋاپكەرشىلىكتىڭ قاشان دا باعالاناتىنىن مەڭزەپ تۇرعانداي.
كوكشەتاۋ
