الەم چەمپيونى ايىرتاۋدا ءجۇر

وسكەمەن قالاسىنان 35 شا­قىرىم قاشىقتىقتا ۇلان اۋدا­نىنا قاراستى ايىرتاۋ دەگەن اۋىل بار. مۇقان اعزاموۆ ۇزاق جىل­دان بەرى اتالعان اۋىلدا تۇرادى. تەحنيكا عىلىمدارىنىڭ كان­ديداتى, پروفەسسور, اۋىل شارۋا­شىلىعىنىڭ مايتالمان مامانى. كەزىندە 10-نان اسا راتسيو­ناليزاتورلىق جاڭالىقتاردى وندىرىسكە ەنگىزگەن, 20-دان اسا ونەرتابىستىق پاتەنتى بار. مۇقان ساعيدوللا ۇلىنىڭ شەگىرتكەنى قۇرتۋعا ارنالعان قوندىرعىسىن ءوڭىردىڭ شارۋا قوجالىقتارى كەڭىنەن پايدالانعان. مۇقاننىڭ ءوزىنىڭ دە قوجالىعى بار, ەڭبەكقور ازامات. بۇعان قوسا سارسەن امان­­جولوۆ اتىنداعى شىعىس قا­زاقستان ۋنيۆەرسيتەتىندە جاس كادر­لارعا ءوز تاجىريبەسىن ۇي­رە­تىپ, ءدارىس وقيدى. ۇزاق جىلدار گىر سپورتى مەن قول كۇرەسىنەن دۇنيەجۇزىلىك فەدەراتسيانىڭ ۆيتسە-پرەزيدەنتى جانە پرەزيدەنتى بولدى. الەم چەمپيوناتتارى مەن ازيا بىرىنشىلىكتەرىندە گىر سپورتى مەن قول كۇرەسىنەن 12 رەت جۇلدەگەر, 5 رەت چەمپيون  اتاندى.

– حايداراباد قالاسىنداعى الەم چەمپيوناتىنا ءبىز ءوز قارجى­مىزبەن باردىق. ستريتليفتينگتەن وتكەن الەمنىڭ 10-بىرىنشىلىگىنە 18 مەملەكەتتەن كىلەڭ «سەن تۇر, مەن اتايىن» دەگەن مىقتىلار جينالدى. تارتىستى وتكەن جارىستا مەن 2 التىن, ءىنىم ەرىك 2 التىن, ۇلىم ءجۇرسىن (بارلىعى اعزاموۆتار) 2 التىن, يۆان مالكوۆ 1 التىن, 1 قولا, ەرىكتىڭ ۇلى جان 2 كۇمىس مەدالدى يەلەندى. ايتا كەتۋ كەرەك, جان اعزاموۆ وتكەن جىلى ستريتليفتينگ ازيا فەدەراتسياسىنىڭ پرەزيدەنتى بولىپ سايلاندى. بۇل سپورت قازاقستاندا جەدەل دامىپ كەلەدى. ۇلىم ءجۇرسىن وتكەن جىلى ستريتليفتينگ دۇنيە­جۇ­زىلىك فەدەراتسياسىنىڭ ۆيتسە-پرەزيدەنتى بولىپ سايلاندى. 2024 جىلى ءبىز الەم چەمپيوناتتارى مەن حالىقارالىق جارىستارعا قاتىسامىز. امانشىلىق بولسا, شىلدە ايىنىڭ 15-21 ارالىعىندا وسكەمەندە ستريتليفتينگتەن الەم چەمپيوناتىن وتكىزۋگە ازىرلەنىپ جاتىرمىز. بۇرىندارى دا قول كۇرەسى مەن گىر سپورتىنان الەم جانە ازيا چەمپيوناتتارىن وت­كىزگەن تاجىريبەمىز بار, – دەيدى مۇقان اعزاموۆ.

اۋىلدا تۇرسا دا, اتالعان سپورت تۇرلەرىنىڭ دامۋىنا ولشەۋسىز ۇلەس قوسىپ جۇرگەن مۇقان سياقتى ازا­ماتتارعا العىستان باسقا ايتارىمىز جوق.

وڭداسىن ەلۋباي,

قازاقستاننىڭ قۇرمەتتى سپورت قىزمەتكەرى

شىعىس قازاقستان وبلىسى,

ۇلان اۋدانى