بىلتىر تۇركسوي حالىقارالىق ۇيىمىنىڭ شەشىمىمەن قازاق رۋحانياتىنىڭ دامۋىنا زور ۇلەس قوسقان تۇعىرلى تۇلعانىڭ 125 جىلدىعىنا وراي تەمىربەك جۇرگەنوۆ جىلى دەپ جاريالاندى. وسىعان وراي قوعام قايراتكەرىنىڭ قۇرمەتىنە جىل بويى ءتۇرلى ءىس-شارا ۇيىمداستىردى. سونىڭ جالعاسى رەتىندە جازۋشى بەيبىت قويشىباەۆتىڭ «كوميسسار جۇرگەنوۆ» اتتى كىتابى تۇرىك تىلىنە اۋدارىلسا, عالىم الماجان وتەعاليەۆانىڭ «تەميربەك جۋرگەنوۆ: تريۋمف ي تراگەديا» اتتى ەڭبەگى ورىس تىلىندە جارىققا شىقتى.
ب.قويشىباەۆتىڭ تۇرىك تىلىندەگى «Komiser Jürgenov» اتتى رومانىندا حالقىمىزدىڭ ءبىرتۋار پەرزەنتىنىڭ ءومىر جولى, وسكەن ورتاسى, ەل يگىلىگى جولىنداعى جانقيارلىق ەڭبەگى, قۋعىن-سۇرگىنگە تۇسكەن قايراتكەر وتباسىنىڭ باسىنان وتكەن اۋىر كەزەڭدەرى شىنشىل جازىلعان. سونداي-اق جازىقسىز جالانىڭ قۇربانى بولعان ارداقتى تۇلعانىڭ جارى دامەش امىرحانقىزى ەرىنىڭ ەسىمىن قوعام ومىرىنە قايتارۋ جولىنداعى ۇزاق جىلدار تىنىمسىز تەر توككەنى شىنايى باياندالعان.
ال عالىم الماجان وتەعاليەۆانىڭ «تەميربەك جۋرگەنوۆ: تريۋمف ي تراگەديا» اتتى كەڭ كولەمدەگى مۇراعات دەرەكتەرىنە سۇيەنىپ جازىلعان مونوگرافيالىق ەڭبەگىندە كورنەكتى قايراتكەردىڭ قوعامدىق-ساياسي قىزمەتى بارىنشا اشىلعان.
ءىس-شارا بارىسىندا ءسوز العان مادەنيەت جانە اقپارات ۆيتسە-ءمينيسترى ارمان جۇدەباەۆ اتالعان مينيسترلىك ت.جۇرگەنوۆ مۇراسىن ناسيحاتتاۋدى ۇنەمى نازاردا ۇستايتىنىن ايتتى. حالىقارالىق تۇركسوي ۇيىمىنىڭ باس حاتشىسى سۇلتان راەۆ مازمۇندى ءىس-شارانىڭ ماڭىزىنا توقتالا كەلىپ, «بىلتىر ارداقتى ازاماتتىڭ 125 جىلدىعىن كۇللى تۇركى دۇنيەسى بىرىگىپ تويلادى. ەندى ونىڭ ادەبي-پۋبليتسيستيكالىق مۇراسىن تۇبەگەيلى زەرتتەپ, مادەنيەتىمىز بەن ادەبيەتىمىزدىڭ تاريحىندا الاتىن ورنىن ناقتى بەلگىلەۋ– ءسىز بەن ءبىزدىڭ جانە كەلەشەك ۇرپاقتىڭ موينىنداعى پارىز», دەدى ول.
تۇساۋكەسەردى تۇركسوي-دىڭ قازاقستانداعى مادەني وكىلى, اكادەميك كارىمبەك قۇرماناليەۆ جۇرگىزدى. جيىندا پارلامەنت سەناتىنىڭ دەپۋتاتتارى د.قىدىرالى, ر.رۇستەموۆ, عالىمدار د.قامزابەك ۇلى, ا.ءشارىپ, ە.تىلەشەۆ, ءا.باكىر, و.اليەۆ, تەمىربەكتانۋشى س.اڭساتوۆ ت.ب. سويلەپ, تۇلعاتانۋدىڭ ەل بىرلىگى مەن مەملەكەتشىلدىككە ىقپالىن باسا ايتتى.
