زەينەل-عابي جەتىنشى سىنىپ بىتىرگەن جىلداردان اۋىر قيىنشىلىققا تاپ بولعان. ول سۇيەك تۋبەركۋلەزىنىڭ اۋىر تۇرىنە ۇشىراپ, توسەك تارتىپ جاتىپ قالعان. بىراق تىرلىكتەن ءۇمىتىن ۇزبەي, توسەكتە جاتقان كۇيى قولىنان كىتاپ, گازەت-جۋرنال تۇسىرمەگەن. بار-جوعى 7-سىنىپ بىتىرسە دە ءوزىنىڭ ءبىلىمىن ءوزى جەتىلدىرىپ, كوركەم ادەبيەتتى دە, تەوريانى دا وقي بەرگەن. وعان اسىرەسە ن.وستروۆسكيدىڭ «قۇرىش قالاي شىنىقتى» اۆتوبيوگرافيالىق رومانى قاتتى اسەر ەتكەن. قايسار جان پاۆەل كورچاگيندى وزىنە ونەگە تۇتقان. ابايدى دا قولىنان تاستاماي, ولەڭدەرىن بالالارىنا ۇيرەتۋدەن دە جالىقپاعان. ءسويتىپ, ولاردىڭ ۇلگىسىمەن بالالارعا ارنالعان اڭگىمەلەر, تاقپاقتار جازۋمەن اينالىسقان. «قاناتتى ءومىر» دەگەن ءبىر اڭگىمەسى «جۇلدىز» جۋرنالىنا دا شىققان. ال «بالدىرعان» – ءومىرىنىڭ سوڭعى ساتىنە دەيىنگى سەرىگى, اينىماس اۆتورى بولعان باسىلىم. وبلىستىق گازەتكە دە پروبلەمالىق ماقالالارىن باستىرىپ تۇرعان.
سول جىلداردا سولتۇستىك قازاقستان وبلىستىق پارتيا كوميتەتىنىڭ يدەولوگيا جونىندەگى حاتشىسى – ءىلياس وماروۆ ەدى. ۇلتىنىڭ جىلت ەتكەن جاقسىلىعىنا قول ۇشىن بەرۋگە اسىعاتىن ارىس اعامىز زەينەل-عابي تۋرالى ەستىگەن سوڭ سەرگەەۆ (قازىر شال اقىن) اۋدانىنداعى ورتاقكول اۋىلىندا تۇراتىن ونى ءوزى ىزدەپ كەلەدى. دەنساۋلىعىنىڭ تۇزەلۋىنە, تۇرمىستىق جاعدايىنىڭ جاقسارۋىنا قول ۇشىن بەرەدى. كەڭشاردىڭ ديرەكتورىن شاقىرىپ الىپ, «اۋىلىڭدا ۇلكەن جازۋشى تۇرادى, سەن ونىڭ ەسىمىمەن ماقتانۋىڭ كەرەك. ال جازۋشىعا جاعداي كەرەك», دەپ ءتورت بولمەلى ساڭعىراعان ءۇي تۇرعىزىپ بەرەدى. دەنساۋلىعى ازداپ تۇزەلگەن شاعىندا قولجازبالارىن قولتىقتاتىپ الماتىعا جىبەرىپ, ونداعى جازۋشىلار وداعىنىڭ حاتشىلارىنا, ءسابيت مۇقانوۆقا كومەك كورسەتۋدى سۇراپ, ارنايى حات جازىپ بەرەدى. ءسويتىپ, العاشقى اڭگىمەلەر جيناعى ءى.وماروۆتىڭ كومەگىمەن «باستاما» دەگەن اتپەن 1959 جىلى جارىق كورەدى. بۇل وقيعا قالامگەردى قاتتى قاناتتاندىرادى. الماتىدان اسقار لەكەروۆ, قاجىتاي ءىلياسوۆ سياقتى پىكىرلەس, جاناشىر دوستار دا تاۋىپ قايتادى. سولاي باستالعان شىعارماشىلىق جول اعامىزدىڭ ءومىرىنىڭ سوڭعى ساعاتىنا دەيىن جالعاسىپ, كوزىنىڭ تىرىسىندە 16 كىتابىن شىعارعان.
اعامىز ۇلاعاتتى ۇرپاق وسىرگەن ونەگەلى اكە. جولداسى كاماش ەكەۋى تاربيەلەگەن 10 بالاسىنىڭ وسالى جوق. ءۇش قىزى اكەسىنىڭ اۋىر حالىنە اراشا بولۋدى ويلاپ, دارىگەرلىك ماماندىقتى تاڭداپتى. قالعاندارى ۇستاز, ساۋلەتشى, ينجەنەر-قۇرىلىسشى ماماندىقتارىن قالاپ, ءومىردىڭ بيىك بەلەستەرىندە ءجۇر. سونىڭ ىشىندە ءارى ءانشى, ءارى بەلگىلى جۋرناليست بولىپ جۇرگەن التىن يمانباەۆانىڭ ەسىمىن رەسپۋبليكا تۇرعىندارى جاقسى بىلەدى. ول پرەزيدەنت گرانتىنىڭ يەگەرى, قازاقستاننىڭ ەڭبەك سىڭىرگەن قايراتكەرى.
زەينەل-عابي يمانباەۆ 1987 جىلى 63 جاسىندا دۇنيەدەن قايتتى. ۇرپاقتارى ونىڭ جاريالانباعان دۇنيەلەرىن جيناپ, «سولمايتىن گۇل», «قوس قايىڭ» اتتى جيناقتارىن شىعارعان.
جۋىردا س.مۇقانوۆ اتىنداعى وبلىستىق امبەباپ, عىلىمي كىتاپحانادا جازۋشىنىڭ 100 جىلدىعىنا وراي مەرەكەلىك كەش بولىپ ءوتتى. وعان قاتىسقاندار اراسىندا جازۋشىنىڭ بالالارى مەن تۋىستارى, جەرلەستەرى, جاقىن ارالاسقان جاندار جازۋشى تۋرالى قىزىقتى ەستەلىكتەر ايتتى. م.قوزىباەۆ اتىنداعى سولتۇستىك قازاقستان ۋنيۆەرسيتەتىنىڭ دوتسەنتى جانباي قادىروۆ جازۋشىنىڭ شىعارماشىلىعى تۋرالى بايانداما جاسادى. ە.سەركەباەۆ اتىنداعى ونەر كوللەدجىنىڭ ستۋدەنتتەرى جازۋشىنىڭ اڭگىمەلەرىنەن ۇزىندىلەر وقىدى.
وكىنىشكە قاراي, وسىنداي ومىرگە قۇشتار, ەڭبەكقور, زور تالانت يەسى, ولكەمىزدىڭ ماقتانىشى بولعان بالالار جازۋشىسىنا وڭىرىمىزدە لايىقتى سىي-قۇرمەت جاسالماي كەلەدى. ءبىر كەزدە تۋعان اۋىلىنداعى مەكتەپتىڭ اتىن بەرۋگە تالپىنىس بولعانىمەن, باستاما اياقسىز قالىپتى. بىراق پەتروپاۆل قالاسىندا ونىڭ ەسىمىمەن ءبىر كوشەنىڭ اتىن اتاسا, ارتىق بولماس ەدى. وسىنداي ۇسىنىس ايتىلعاندا جينالعان كوپشىلىك قىزۋ قولدادى, ەندى سونى وبلىس باسشىلىعى ەسكەرسە ءجون بولار ەدى.
