مۇنىڭ العىشارتتارى قاتارىندا ەكونوميكانى ءارتاراپتاندىرۋ, ونى مونوپوليانىڭ قارماعىنان بوساتۋ, ينفراقۇرىلىمدى جاڭعىرتۋ, بيزنەستى قولداۋ, ينۆەستيتسيا تارتۋ ت.ب. ەرەكشە اتاپ وتۋگە بولادى.
پرەزيدەنت ۇكىمەت تاراپىنان مەملەكەت تاراپىنان حالىقتىڭ الەۋمەتتىك جاعىنان وسال توپتارىن قولداۋدى نازاردان تىس قالدىرمايتىنىن, ونىڭ جۇيەلى تۇردە شەشۋ جولدارى قاراستىرىلىپ وتىرعانىن ايتتى. تۇرمىس تاۋقىمەتى ارقاعا ايازداي باتىپ, بانكتەردەن تۇرمىستىق جاعدايعا بايلانىستى كرەديت الىپ, ونى وتەي الماي جۇرگەن جاندارعا كومەك رەتىندە كەشەندى جۇمىستار قولعا الىندى جانە بۇل باعىتتاعى جۇمىس جالعاسادى. بۇل ورايدا پرەزيدەنت: «مەن ازاماتتارىمىزدىڭ قارىزعا بەلشەدەن باتقانىنا قاتتى الاڭدايمىن. سەبەبى بۇل ماسەلە جۇرتتىڭ الەۋمەتتىك جاعدايىنا جانە ەلىمىزدەگى قارجى جۇيەسىنىڭ تۇراقتىلىعىنا تىكەلەي اسەر ەتەدى. مەن 2019 جىلى مەملەكەت باسشىسى رەتىندە قول قويعان العاشقى قۇجاتتىڭ ءبىرى قيىن جاعدايعا تاپ بولعان ازاماتتاردىڭ بورىشىن ازايتۋ تۋرالى جارلىق ەدى. سول ۋاقىتتا 500 مىڭ ادامنىڭ كەپىلسىز العان نەسيەسى كەشىرىلدى. بۇل بىررەتتىك شارا بولاتىن. ال 2023 جىلى جەكە تۇلعالاردىڭ بانكروتتىعى تۋرالى زاڭ كۇشىنە ەندى. مۇنىڭ ءبارى ماسەلەنىڭ ۋشىعىپ كەتپەۋىنە ىقپال ەتتى. وسى جاعدايدى تۇبەگەيلى وزگەرتۋ ءۇشىن بىلتىرعى جولداۋىمدا ۇكىمەتكە تىڭ شارالاردى قولعا الۋدى تاپسىردىم», دەدى.
سۇحباتتا ىشكى ساياسي تۇراقتىلىق, سىرتقى ساياساتتاعى باعىت-باعدار, وزگە دە جۇرتشىلىق كوكەيىندە جۇرگەن تۇيتكىلدى ماسەلەلەر تالقىلانعان. قاسىرەتتى قاڭتار وقيعاسىنىڭ تۋىنداۋىنىڭ سەبەپ-سالدارلارى, الەمدەگى گەوساياسي جاعدايدىڭ ۋشىعىپ تۇرعان كەزەڭىندە ەلىمىزدىڭ ۇستانىمى ايقىندالعان.
ىشكى تۇراقسىزدىق تۋىنداعان ساتتە مەملەكەتتىك بيلىك السىرەپ, سىرتقى كۇشتەردىڭ ءتۇرلى سيپاتتاعى ارەكەتتەرى كۇشەيىپ, ەلدىڭ تاۋەلسىزدىگىنە قاۋىپ تونەتىنى تاريحتان بەلگىلى. سوندىقتان مەملەكەت باسشىسى الەۋمەتتىك-ەكونوميكالىق دامۋدى, ساياسي تۇراقتىلىقتى قامتاماسىز ەتۋدىڭ ماڭىزىن اتادى. ال بۇل جالعىز پرەزيدەنتتىڭ قولىنان كەلەتىن ءىس ەمەس. ونى ەل-جۇرت بولىپ قولداۋ كەرەك. «جۇمىلا كوتەرگەن جۇك جەڭىل» دەيدى حالىق دانالىعى. قاي سالادا بولسىن جۇرتىمىزدىڭ جۇدىرىقتاي جۇمىلاتىن كەزى كەلدى. وي مەن ءىس-ارەكەتتە دە وزىق بولار كەز تۋىنداپ تۇر. پرەزيدەنت سۇحباتىنان ءبىز وسىنداي بايلام جاسادىق.
الماسبەك ابسادىق,
ا. بايتۇرسىن ۇلى اتىنداعى قوستاناي ۋنيۆەرسيتەتىنىڭ پروفەسسورى, فيلولوگيا عىلىمدارىنىڭ دوكتورى
