وقۋ-اعارتۋ مينيسترلىگىنىڭ باستاماسىمەن وتكەن وليمپيادا العاش رەت ۇيىمداستىرىلىپ وتىر. ماقسات – اۋىل مەن قالا مەكتەپتەرىنىڭ اراسىنداعى الشاقتىقتى ازايتۋ ءارى وقۋشىلاردىڭ زەيىنىن ارتتىرۋ. مينيستر عاني بەيسەمباەۆ پاندىك وليمپيادالاردىڭ وقۋشىلار ءۇشىن ماڭىزىن بىلايشا ءتۇسىندىردى: «پاندىك وليمپيادا – بالالاردىڭ ساناسىندا العاشقى عىلىمي ىزدەنىستەرگە جول سالاتىن, بولاشاق عالىمداردى شابىتتاندىراتىن, عىلىممەن ەركىن اينالىساتىن جاستار توبىن قالىپتاستىراتىن ەڭ اۋقىمدى باعدارلامالىق سايىس. مەكتەپ وقۋشىلارىنىڭ بەدەلدى وليمپيادالارعا قاتىسۋ رەيتينگى جەڭىس قورجىنىندا مەدالدار سانىنىڭ كوبەيگەنىن, ءبىلىم ساپاسىنىڭ ارتقانىن كورسەتەدى».
«دارىن» رەسپۋبليكالىق عىلىمي-پراكتيكالىق ورتالىعىنىڭ ديرەكتورى عاجدەمبەك تۇرسىنوۆتىڭ ايتۋىنشا, وليمپياداعا اۋىل مەكتەپتەرىنىڭ 9-11 سىنىپ وقۋشىلارى قاتىسىپ جاتىر. وسىلايشا, ەلىمىزدىڭ شالعاي ەلدى مەكەندەرىندەگى دارىندى جانە تالانتتى بالالاردىڭ قابىلەتتەرىن انىقتاپ, دامىتۋ, حالىقارالىق وليمپيادالارعا قاتىسۋعا ىنتالاندىرۋ كوزدەلىپ وتىر. «رەسپۋبليكالىق وليمپيادالاردا اكادەميالىق ادالدىقتى قامتاماسىز ەتۋ ءۇشىن تاپسىرمالار ءار قاتىسۋشىعا ەلەكتروندى تۇردە جەكە-جەكە جىبەرىلەدى. وليمپيادانىڭ بارلىق كەزەڭىندە وقۋشىلاردىڭ اتى-ءجونى كورىنبەيدى. ءار كەزەڭنەن كەيىن تاپسىرمالاردىڭ سكانەرلەنگەن نۇسقاسى, قاتىسۋشىلاردىڭ جۇمىستارى مەن دۇرىس جاۋاپتار ورتالىقتىڭ سايتىندا جاريالانادى», دەدى ع.تۇرسىنوۆ.
ىرىكتەۋ كەزەڭى وتكەن جىلدىڭ قاراشا ايىندا باستالعان. وليمپيادا جاراتىلىستانۋ-ماتەماتيكالىق جانە قوعامدىق-گۋمانيتارلىق باعىتتاردى قامتيتىن 13 ءپان بويىنشا وتكىزىلەدى. باستاپقى كەزەڭگە قاتىسۋ ءۇشىن وقۋشىلار اuyl.daryn.kz سايتىندا تىركەلۋدەن ءوتتى. ناتيجەسىندە, 90 مىڭنان استام وقۋشى قاتىسۋعا نيەت بىلدىرگەن. ءىى ىرىكتەۋ كەزەڭى جەلتوقسان ايىندا وتكىزىلىپ, تاپسىرمالار ونلاين-پلاتفورمادا بەرىلدى. ال قورىتىندى كەزەڭ استانادا ءوتىپ جاتىر. وعان ەكىنشى كەزەڭنەن وتكەن 1088 وقۋشى قاتىسىپ جاتىر. قوعامدىق-گۋمانيتارلىق باعىتتاعى پاندەر بويىنشا وليمپيادا 21-25 قاڭتار ارالىعىنا جوسپارلانعان. ال 5 كۇنگە سوزىلعان جاراتىلىستانۋ-ماتەماتيكا باعىتىنداعى سايىس ءوز مارەسىنە جەتىپ تە ۇلگەردى.
جۇلدەلى ورىندارعا يە بولعان وقۋشىلاردىڭ تولقىنىسى مەن قۋانىشىن كورگەندە وليمپيادانىڭ اۋىلداعى وقۋشىلارعا ۇلكەن مۇمكىندىك سىيلاعانىن بايقادىق. باتىس قازاقستان وبلىسى تەرەكتى اۋدانى شاعاتاي اۋىلىنىڭ 11-سىنىپ وقۋشىسى داۋرەن تەمىربولات رەسپۋبليكالىق كەزەڭگە جولداما الامىن دەپ ويلاماعانىن ايتتى.
– ەكى كەزەڭنەن ءوتىپ, استانا قالاسىنا كەلدىم. رەسپۋبليكالىق سىندا گەوگرافيا ءپانى بويىنشا 3-ورىن يەگەرى اتاندىم. بۇل مەن ءۇشىن ۇلكەن قۋانىش, ۇلكەن دارەجە. ءبىزدىڭ اۋىلدان رەسپۋبليكالىق دەڭگەيدە ناتيجە كورسەتكەن العاشقى وقۋشى بولىپ وتىرمىن. دەگەنمەن تاڭداۋ ءپانىم گەوگرافيا بولعاندىقتان قورىتىندى كەزەڭنىڭ تاپسىرمالارى ماعان قاتتى قيىن بولمادى. جاقسى دايىندىقپەن كەلدىم. تەك شامالى قوبالجۋ بولدى. وليمپيادا وتە جوعارى دەڭگەيدە ۇيىمداستىرىلعان. مۇنداي ءىس-شارالار ءجيى ۇيىمداستىرىلىپ تۇرسا دەيمىز. ويتكەنى بۇل ءبىز ءۇشىن وتە جاقسى مۇمكىندىك. وسى سايىستىڭ ناتيجەسىندە جاڭا دوستار تاپتىم, كەرەمەت كوڭىل كۇي سىيلاپ جاتىر, تانىمىمىز كەڭەيدى. بۇل جارىستا ورىن الماسام دا ەش وكىنبەيتىن ەدىم. قاتىسۋدىڭ ءوزى ۇلكەن ابىروي, – دەيدى داۋرەن.
ال ماتەماتيكا ءپانى بويىنشا 2-ورىنعا يە بولعان جامبىل وبلىسى ت.رىسقۇلوۆ اتىنداعى مەكتەپ-ليتسەيىنىڭ 11-سىنىپ وقۋشىسى جانكەلدى بايكەيدىڭ ايتۋىنشا, ناعىز ءبىلىمدى, دايىندىعى مىقتى وقۋشى مىندەتتى تۇردە جۇلدەلى ورىنداردان كورىنەدى.
– 90 مىڭ ادامنىڭ اراسىنان ىرىكتەلىنىپ, وليمپياداعا قاتىسۋعا مۇمكىندىك الدىم. سول كەزدەن باستاپ الدىما ماقسات قويىپ, ءتورت اي بويى دايىندالدىم. ەندى, مىنە, ناتيجەسىن كورىپ وتىرمىن. الايدا بۇل جارىسقا اۋەلى مورالدىق تۇرعىدا دايىندالۋىم كەرەك دەپ ويلادىم. سەبەبى مۇندا جەڭىس تە, جەڭىلىس تە بولادى. وعان تۇراقتى دايىندىق كەرەك. مەنىڭشە, بۇل وليمپيادانىڭ ۇلكەن ارتىقشىلىعى – اۋىل مەن قالا مەكتەپتەرىندەگى الشاقتىقتى جويۋعا مۇمكىندىك بەرۋىندە. سونداي-اق اۋىل وقۋشىلارىنىڭ وزىنە دەگەن سەنىمدىلىگىن ارتتىرىپ, تالانتتى جاستاردىڭ كوپ ەكەنىن دالەلدەي ءتۇستى. مەن پرەزيدەنت قاسىم-جومارت توقاەۆتىڭ «ەلىمىز ءىت مەملەكەتكە اينالۋى كەرەك» دەگەن ۇستانىمىن تولىق قۇپتايمىن. سونىڭ نەگىزىندە ءىت سالاسىنداعى مىقتى مامان بولعىم كەلەدى, – دەدى جۇلدەگەر وقۋشى.
ماراپاتتاۋ سالتاناتىندا وقۋ-اعارتۋ ءبىرىنشى ۆيتسە-ءمينيسترى ناتاليا جۇمادىلداەۆا جۇلدەگەرلەر اراسىندا ەلىمىزدىڭ ابىرويىن الەمدىك دەڭگەيدە كوتەرەتىن بولاشاق مىقتى عالىمداردىڭ بارىنا سەنىم ءبىلدىردى. «مەن ساحناعا كوتەرىلگەن وقۋشىلارمەن بىرگە قوبالجىپ, بىرگە قۋانىپ وتىردىم. سىزدەردىڭ ومىرلەرىڭىزدە وسىنداي جارقىن جەتىستىكتەر كوبەيە بەرسىن. تەك اقىل مەن ەڭبەككە سەنىم ارتتىڭىزدار», دەدى ول وقۋشىلارعا.
ۇيىمداستىرۋشىلاردىڭ ايتۋىنشا, وليمپيادانىڭ ءۇشىنشى كەزەڭىنىڭ ءاربىر قاتىسۋشىسى جەكە جۇمىس ورنىمەن, جاۋاپ پاراقتارىنىڭ بلانكىلەرىمەن, ونىڭ وقۋ تىلىندەگى تاپسىرمالار ماتىنىمەن تولىق قامتاماسىز ەتىلدى. اشىقتىق پەن اكادەميالىق ادالدىقتى ساقتاۋ ماقساتىندا وليمپيادانىڭ ءوتۋ بارىسى ونلاين رەجىمدە كورۋگە ارنالعان بەينەباقىلاۋ جۇيەسىمەن قاداعالاندى.
ايتا كەتەيىك, جاراتىلىستانۋ-ماتەماتيكا باعىتى بويىنشا وليمپيادانىڭ جەڭىمپازدارىن ماراپاتتاۋ سالتاناتىندا جامبىل, تۇركىستان, اباي, اتىراۋ وبلىستارىنان كەلگەن وقۋشىلاردىڭ اتى ءجيى اتالدى. جامبىل وبلىسى ت.رىسقۇلوۆ اۋدانى ت.رىسقۇلوۆ اتىنداعى مەكتەپ وقۋشىلارىنىڭ جەتەكشىسى دينارا نيازقۇلوۆا اۋىل مەكتەپتەرىندەگى دارىندى بالالارعا كوڭىل ءبولىنىپ جاتقانى قۋانتارلىق جايت ەكەنىن اتاپ ءوتتى.
– جامبىل وبلىسىنان رەسپۋبليكالىق كەزەڭگە 28 وقۋشىنى الىپ كەلدىك. ءبىلىم الۋشىلاردىڭ ءبىرشاماسى جۇلدەلى ورىندارعا يە بولىپ, تاماشا ناتيجە كورسەتتى. وتە قۋانىشتىمىز. بالالاردى دايارلاعان مۇعالىمدەرىنە العىس بىلدىرەمىز. ءارى وليمپيادانى ۇيىمداستىرۋشىلارعا اۋىل مەن قالا اراسىنداعى الشاقتىقتى جويۋ ماقساتىندا وسىنداي باستاما كوتەرگەنى ءۇشىن ريزاشىلىعىمىز شەكسىز, – دەدى دينارا نيازقۇلوۆا.
جاراتىلىستانۋ-ماتەماتيكا باعىتىنداعى وليمپيادا قورىتىندىسى بويىنشا جەڭىمپازدار مەن جۇلدەگەرلەر انىقتالىپ, وقۋ-اعارتۋ مينيسترلىگىنىڭ ديپلومدارىمەن ماراپاتتالدى. سونداي-اق جەڭىمپازدارعا ەلىمىزدىڭ بىرقاتار جوعارى وقۋ ورىندارىنىڭ رەكتورلىق گرانتتارى تابىستالادى. ال قوعامدىق-گۋمانيتارلىق باعىتتاعى پاندەر بويىنشا وليمپيادا ناتيجەسى 25 قاڭتاردا بەلگىلى بولادى.
ايتا كەتەيىك, III كەزەڭنىڭ بارلىق قاتىسۋشىسى «دارىن» رەسپۋبليكالىق سىرتتاي مەكتەبىنە قابىلدانادى. سونىمەن قاتار I دارەجەلى ديپلوم يەگەرلەرى 2024 جىلعى جالپى ءبىلىم بەرەتىن پاندەر بويىنشا رەسپۋبليكالىق وليمپيادانىڭ قورىتىندى كەزەڭىنە قاتىسۋعا مۇمكىندىك الادى.
