كىتاپ مازمۇنىن سارالاعان وبلىستىق ءماسليحات توراعاسى, تاريح عىلىمدارىنىڭ كانديداتى ناۋرىزباي بايقاداموۆ ەلگە قالتقىسىز قىزمەت ەتۋدىڭ ۇلگىسىن كورسەتكەن قايراتكەر كىتابىنىڭ قوعامداعى ماڭىزىن اتاپ ءوتتى.
– ەل الدىنداعى قىزمەتتىڭ باستى شارتى – وتكەننىڭ ونەگەسىن ۇمىتپاۋ. عۇمىرى ەل تاۋەلسىزدىگىمەن قاتار ءوربىپ, بەس سالاعا مينيستر, ءۇش وڭىرگە اكىم, رەسەي مەملەكەتىندە ەلشى, پرەزيدەنت اكىمشىلىگىنىڭ باسشىسى قىزمەتتەرىن اتقارعان قىرىمبەك ەلەۋ ۇلىن قازاقتىڭ قابىرعالى قايراتكەرىنە اينالدىرعان دا وسى ۇستانىم. وتباسىنداعى تاربيەنى تۇعىر ەتىپ, بيىك توردەن ەلدىڭ ءسوزىن سويلەگەن تۇلعانىڭ ايتار ويى ءبىز ءۇشىن قۇندى, – دەدى ناۋرىزباي بايقاداموۆ.
ساياسي عىلىمدار دوكتورى, قوعام قايراتكەرى مۇرات باقتيار ۇلى كىتاپ مازمۇنى جونىندە ايتا كەلىپ, تاۋەلسىز ەل تاريحىندا ورنى بار تۇلعانىڭ ءوزىن ەل قىزمەتىنە باۋلىعان ۇستازدارىنا دەگەن قۇرمەتىنە ءتانتى ەكەندىگىن جەتكىزدى.
– وسىدان ءبىراز بۇرىن قىرىمبەك ەلەۋ ۇلىنىڭ «قۇندىلىقتار قۇلدىراماسىن» دەگەن تۋىندىسىن تۇشىنا وقىعانىمىز ەستە. بۇگىن قولىمىزعا ءتيىپ وتىرعان كىتاپ سونىڭ زاڭدى جالعاسى ىسپەتتى. اسىرەسە مەن ءۇشىن بۇل كىتاپتا اۆتوردىڭ ءوزىنىڭ ۇستازدارىنا, رۋحانيات سالاسىنداعى ۇلت زيالىلارىنا دەگەن پىكىرلەرى قىزىقتى, – دەدى عالىم.
جيىندا باسپا ءجۇزىن كورگەنىنە كوپ ۋاقىت وتپەگەن كىتاپ تۋرالى پىكىر بىلدىرگەن قورقىت اتا اتىنداعى قىزىلوردا ۋنيۆەرسيتەتىنىڭ رەكتورى بەيبىتكۇل كارىموۆا «اينالايىن, ازاتتىق!» ەستەلىك-ەسسەسى – قازاق مەمۋاريستيكا جانرىنا قوسىلعان سۇبەلى ۇلەس ەكەندىگىنە توقتالدى.
– الەمدە مەملەكەت باسقارعان كىسىلەردىڭ, ساياساتكەرلەردىڭ, بەلگىلى مەملەكەت جانە قوعام قايراتكەرلەرىنىڭ ەستەلىك جازۋى – قالىپتى ءۇردىس. مۇنداي ءداستۇر ءبىزدىڭ ەلدە دە بار. قازاقستاندى ۇزاق جىلدار باسقارعان دىنمۇحامەد احمەت ۇلى قوناەۆتىڭ «اقيقاتتان اتتاۋعا بولمايدى», ء«وتتى داۋرەن وسىلاي» اتتى عۇمىرنامالىق كىتابى, بەلگىلى تۇلعالار يساتاي ابدىكارىموۆتىڭ «كوپ ەكەن كورگەنىمنەن كورمەگەنىم», اسانباي اسقاروۆتىڭ «تاعدىر» اتتى ەڭبەكتەرى ەل تاريحىنىڭ ەلەۋلى كەزەڭدەرىنەن سىر شەرتەدى. مەملەكەت جانە قوعام قايراتكەرى قىرىمبەك كوشەرباەۆتىڭ قولىمىزعا ءتيىپ وتىرعان «اينالايىن, ازاتتىق!» كىتابى دا – عيبراتتى, تاعىلىمدى, ونەگەسى مول تۋىندى – دەدى بەيبىتكۇل سارسەمحانقىزى.
جيىن سوڭىندا كوشەرباەۆتار اۋلەتى اتىنان قىزىلوردا قالاسى, ارال, قازالى جانە سىرداريا اۋداندارىنىڭ قۇرمەتتى ازاماتى ايتباي كوشەرباەۆ تۇساۋكەسەر ءراسىمىن ۇيىمداستىرۋشىلارعا العىسىن ءبىلدىردى.
قىزىلوردا
