فوتو: bilimdinews.kz
ۇلت بولاشاعىنا قاتىستى تۇجىرىمدامالى ويىن قاسىم-جومارت توقاەۆ «Egemen Qazaqstan» گازەتىنە بەرگەن سۇحباتىندا دا ايتتى. وسى اشىق اڭگىمەنى قاجەتتى تۇستارىن استىن سىزا وتىرىپ, باستان-اياق وقىپ شىقتىم. پرەزيدەنت ەلىمىزدەگى ءتۇرلى ماسەلەنى قامتيتىن سۇراقتارعا بارىنشا تولىمدى, تۇشىمدى جاۋاپ بەرگەنىن اتاپ وتكەن ابزال.
ۇلت مەملەكەتىمىزدىڭ باستى بايلىعى سانالاتىن جەكە ادامداردان قۇرالادى. ادام كاپيتالىن تۇراقتى دامىتۋ – جىلدام وزگەرىپ جاتقان قازىرگى الەمدە تابىستى ەل بولۋدىڭ باستى كەپىلى. تاۋەلسىز مەملەكەتىمىزدىڭ ىلگەرى باسۋى ادام كاپيتالىنىڭ, ياعني ۇلتىمىزدىڭ ساپالىق دەڭگەيىنە تاۋەلدى ەكەنى تۇسىنىكتى. وسىدان ەكى جىل بۇرىن ۇلتتىق ارناعا بەرگەن سۇحباتىندا قاسىم-جومارت توقاەۆ «ارقايسىمىز ەلىمىزدىڭ پاتريوتى بولۋعا ءتيىسپىز» دەگەن بولاتىن. سونداي-اق پرەزيدەنت وزىق ويلى ۇلت قالىپتاستىرۋدىڭ ماقساتىن ء«بىز ۇلتتىڭ جاڭا ساپاسىن قالىپتاستىرۋ ارقىلى ادىلەتتى مەملەكەتتىڭ جانە ۇيلەسىمدى قوعامنىڭ نەگىزىن قالايمىز», دەگەن سوزىمەن ايقىنداپ بەردى.
مەملەكەت باسشىسى قارىم-قابىلەتى زور, ءبىلىمدى, ادال ازاماتتار ەلىمىزدى العا باستايتىنىن ۇنەمى ايتىپ كەلەدى. وزىق ويلى ۇلت – ۇلتتىڭ جاڭا ساپاسى. سوندىقتان ءبىز ۇلتتىڭ جاڭا ساپاسىن قالىپتاستىرۋعا ءبىر كىسىدەي جۇمىلىپ, اتسالىسۋىمىز كەرەك.
پرەزيدەنتتىڭ پايىمىنشا, مەملەكەتتىك قىزمەتشىلەر وزىنە جۇكتەلگەن مىندەتتى ءمىنسىز اتقاراتىن كاسىبي مامان عانا بولماۋى كەرەك. ولار ءاردايىم باستاماشىل, ناقتى ىسىمەن ەلگە پايدا اكەلەتىن جانە وزگەرىستەردىڭ ومىرشەڭدىگىن حالىققا كورسەتە الاتىن ازاماتتار بولۋى قاجەت. ادىلەتتى قازاقستان قۇرۋدا جاڭا كاسىبي داعدىلاردى مەڭگەرۋگە جانە وزىق ءبىلىمىن ءتيىمدى پايدالانۋعا قابىلەتتى جاستاردىڭ ءرولى ارتا تۇسەدى. ويى ۇشقىر, جاۋاپتى جاستارىمىز بولاشاقتى باعامداي الادى ءارى دايەكتى دامۋعا ۇمتىلادى. وسى ورايدا مەملەكەت باسشىسىنىڭ ء«بىز وزىق ويلى ۇلت رەتىندە تەك قانا العا قاراۋىمىز كەرەك» سۇحباتى بارلىق ءبىلىم بەرۋ ۇيىمىندا تالقىلانىپ, پەداگوگتەر مەن ءبىلىم الۋشىلار ءوز پىكىرلەرىن ورتاعا سالۋى كەرەك دەپ سانايمىن. نەگە دەسەڭىز, جاس ۇرپاق ەلىمىزدەگى ماڭىزدى وقيعا, جاڭالىقتاردان حاباردار بولىپ, تالقىلاۋعا قاتىسىپ, وزىندىك وي-پىكىرلەرىمەن ءبولىسىپ وتىرسا, بۇل ولاردىڭ ازاماتتىق بەلسەندىلىگىن, قوعامدىق ماسەلەلەرگە كوزقاراسىن دامىتۋعا وڭ ىقپال ەتەرى ءسوزسىز. ويى ۇشقىر جاستارىمىز قاتارى كوبەيسىن دەسەك, ولارمەن جۇرگىزىلەتىن تاربيە جۇمىسى دا جۇيەلى ءارى پارمەندى, ناتيجەلى بولۋعا ءتيىس.
وزىق, الدىڭعى قاتارلى ۇلت ءوز ەلىنە جاناشىر, وتانشىل, زامان تالابىنا ساي ارەكەت ەتەتىن, ءبىلىمدى دە بىلىكتى, كاسىپقوي مامان, ەڭبەكقور ازاماتتاردان قۇرالادى. ولاي بولسا, اركىم ءوزىنىڭ ءىسىن ادال اتقارىپ, قوعامدىق ىستەرگە بەلسەندى ارالاسىپ, تۋعان ءوڭىرىمىزدىڭ, قورشاعان ورتامىزدىڭ كوركەيىپ, ءوسىپ-وركەندەۋىنە مۇددەلى بولسا, ۇلتىمىزدىڭ مەرەيى اسىپ, ەل قۋاتىنىڭ ارتا تۇسەرىنە سەنىم مول.
بيالاش سۇيىنكينا,
ءبىلىم بەرۋ ءىسىنىڭ ۇزدىگى
قوستاناي
