فوتو: upl.uz
تولقىن قىلىشەۆ 91 كەلىدەن جوعارى سالماقتا الەمدىك دودالاردا اتوي سالىپ جۇرگەن, قامشىبەك قوڭقاباەۆتىڭ قارسىلاسى باحودير جالولوۆتىڭ ءتول شاكىرتى ەكەنىن تىلگە تيەك ەتىپ, ونىڭ قالاي چەمپيون اتانعانىن ايتىپ بەردى. تەمىردەي ءتارتىپتىڭ ارقاسىندا تۇلەپ ۇشىپ, دۇنيەنى دۇبىرلەتىپ جۇرگەن شاكىرتتەرى تولقىن باپكەردەن تالاي «تاياق جەگەنگە» ۇقسايدى...
ول ءتىلشى الماس ءماناپتىڭ «سىزدى قاتال باپكەر دەيدى. جاۋابىن وزىڭىزدەن ەستيىك» دەگەن ساۋالىن تەرىسكە شىعارمادى.
«تارتىپكە باسىمدىق بەرەتىنىم راس. ءباحوديردى «سكاكالكامەن» تالاي ساباعانمىن. كەيدە قاسىمداعى جاتتىقتىرۋشىلار ارا تۇسەتىن. سونداي قاتال ءتارتىپتىڭ ناتيجەسىندە بوحودير چەمپيون بولىپ ءجۇر. قازىر ماعان راحمەت ايتادى. ايتپاقشى, ءباحوديردى شىڭداۋعا قازاقستان دا ەداۋىر ۇلەس قوستى. باحودير, يسرايل, مۋرودجون, ەلنۇر باستاعان مىقتى شاكىرتتەرىمنىڭ بارلىعى قازاقستان ارقىلى الەمگە تانىلدى. سىزدەردە جاستار مەن ەرەسەكتەر اراسىندا جىلىنا 10-15 تۋرنير ۇيىمداستىرىلادى. استانا, الماتى, پاۆلودار, قوستاناي, اتىراۋ, اقتاۋ, شىمكەنت, تۇركىستان سەكىلدى قالالاردا وتەتىن تۋرنيرلەرگە شاكىرتتەرىمدى تالاي اپارعانمىن. كەيدە ءبىر قالاداعى ءتۋرنيردى ءتامامداپ, ەلگە قايتپاي, بىردەن ەكىنشى شاھارداعى دوداعا توپ ەتە تۇسەتىنبىز. بوكسشىلارىمىزدى تۋرنيرلەرگە كوبىرەك قاتىستىرىپ, تاجىريبە جيناقتاۋ باستى ماقسات بولدى. جالولوۆ, مادريموۆ, احماداليەۆ سەكىلدى بوكسشىلار جاستار مەن ەرەسەكتەر اراسىنداعى جارىستارعا قاتار قاتىسا بەرەتىن. باحودير جاس كۇنىندە ارىق, بويشاڭ بولدى. 92 كيلودا جۇدىرىقتاساتىن. بەتى قايتىپ قالماسىن دەپ الەكسەي سەۆاستيانوۆتىڭ جەكە باپكەرىنە «شاكىرتىڭ بايقاپ ۇرسىن, ەكىنشى راۋندتا رينگكە شىعارمايمىز» دەپ ءوتىنىش ايتقان كەزىمىز دە بولعان. سويتكەن باحودير قازىر ابىرويىمىزدى اسىرىپ جاتىر», دەدى وزبەكستان قۇراماسىنىڭ بوكستان باس باپكەرى.
بۇگىندە باحودير جالولوۆ اۋەسقوي بوكستان بولەك, كاسىپقوي بوكستا دا باعىن سىناپ, بابىن شىڭداپ ءجۇر. ءتىلشى باپكەردەن ونىڭ قوس مايداندا جۇرگەنى قانشالىقتى دۇرىس دەپ سۇرادى.
«وتە قيىن. بىراق باسقا امالىمىز جوق. باحودير – جاستاردىڭ كۋميرى, بەتكەۇستارىمىز. ول كاسىپقوي بوكستا 13 جەكپە-جەك وتكىزىپ ۇلگەردى. پاريج وليمپياداسىنان كەيىن تولىقتاي كاسىپقوي بوكسقا اۋىسادى», دەدى تولقىن قىلىشەۆ.
وزبەك ەلىنىڭ بوكستاعى جاس ورەندەرى مەن پاريج وليمپياداسىنان كۇتىپ وتىرعان جۇلدەلەرى تۋرالى «Egemen Qazaqstan» گازەتىنىڭ بۇگىنگى سانىندا جارىق كورگەن الماس ماناپتىڭ «تولقىن قىلىشەۆ, بوكستان وزبەكستان قۇراماسىنىڭ باس باپكەرى: بىزگە قازاق بوكسىنىڭ مىقتى بولعانى كەرەك» ماقالاسىنان تولىق وقي الاسىز.
