مەملەكەت باسشىسى سۇحباتتا كوپتىڭ كوڭىلىندە جۇرگەن ءبىراز سۇراققا جاۋاپ بەردى. ەلىمىزدە بىرقاتار رەفورما جۇزەگە اسىرىلىپ جاتقانىمەن, كوپتىڭ كوڭىلىندە ەرتەڭگە دەگەن الاڭداۋشىلىق بار ەكەنى بەلگىلى. سۇحباتتان سىرتقا كەتكەن كاپيتالدى, بۇرىن قابىلدانعان ءتۇرلى سۇرقيا شەشىمدەردى ءبىر-ەكى جىلدا رەتكە كەلتىرۋدىڭ وڭايعا تۇسپەيتىنىن تۇسىندىك. پرەزيدەنت مۇنداي شارۋالاردىڭ جۇيەلى تۇردە جاسالۋ كەرەكتىگىن, سەبەبى شۇعىل ارەكەت ءار كەزدە قاتەلىككە ۇرىندىرىپ, ءتىپتى كەيدە ەلىمىزگە كەلەتىن شەتەلدىك ينۆەستيتسياعا توسقاۋىل بولۋ مۇمكىندىگىن دە ەسكەرتتى.
قاڭتار وقيعاسىنان كەيىن اتا زاڭنىڭ ۇستەمدىگىن قامتاماسىز ەتەتىن, كونستيتۋتسيالىق باقىلاۋدى جۇزەگە اسىراتىن ورگان – كونستيتۋتسيالىق سوت قايتا قالپىنا كەلتىرىلدى. اۋدان, قالا اكىمدەرى سايلاندى. ءماجىلىس جانە ءماسليحات دەپۋتاتتارى پارتيالىق جانە ءبىر مانداتتى وكرۋگتەر ارقىلى سايلاندى. بۇگىندە بارشا حالىق ماجىلىستە دەموكراتيالىق ءپليۋراليزمنىڭ قالىپتاسقانىن بايقاپ وتىر. مۇنداي ءۇردىس جالعاسىن تابۋعا ءتيىس. ەكونوميكانى ءارتاراپتاندىرۋ جانە مونوپوليادان ارىلتۋ, ينفراقۇرىلىمدى جاڭعىرتۋ, بيزنەستى قولداۋ جولىنداعى جاساپ جاتقان جۇمىستار وڭ ناتيجەلەرگە جەتكىزبەي قويمايدى. پرەزيدەنت سۇحباتىنان وسىنداي وي تۇيدىك.
قاڭتار وقيعاسى بويىنشا پرەزيدەنت ماسەلەنىڭ تامىرى تەرەڭدە جاتقانىن, سول كەزدە جاڭا بيلىككە قىرىن قاراعانداردىڭ كوزدەگەندەرى – مەملەكەتتىك توڭكەرىس جاساۋ بولعانىن اشىق ايتتى. حالىقتىڭ الەۋمەتتىك جاعدايعا نارازىلىعىن پايدالانىپ قالعىسى كەلگەن كۇشتەردىڭ ارام پيعىلى ىسكە اسپادى. بۇعان حالقىنا ارقا سۇيەگەن پرەزيدەنت جول بەرمەدى. ەندىگى مىندەت – مۇنداي وقيعالارعا الداعى ۋاقىتتا جول بەرمەۋ. بۇل ءۇشىن حالىقتىڭ ءال-اۋقاتىن كوتەرۋدى قامتاماسىز ەتەتىن جاڭا ەكونوميكالىق رەفورمالار جاساۋ. پرەزيدەنتتىڭ بۇل باعىتتاعى ۇستانىمدارى دا كوڭىلدەن شىقتى. 2029 جىلعا قاراي ۇلتتىق ەكونوميكانى ەكى ەسە ارتتىرۋ وڭايلىقپەن قول جەتكىزەتىن مەجە ەمەس. بىراق الىنبايتىن قامال دەۋگە دە بولمايدى. بۇعان ەلىمىزدىڭ الەۋەتى تولىق جەتەدى. تەك بىرلەسكەن كۇش-جىگەر قاجەت.
سىرتقى ساياساتتا كورشى ەلدەرمەن قارىم-قاتىناس جاقسى جولمەن دامىپ كەلەدى. العاشىندا كوبىمىز تىكسىنە قاراعان قىتايمەن اراداعى ۆيزاسىز رەجىم الدەن-اق حالقىمىزعا پايدالى ەكەنى بايقالا باستادى. ولاردان بىزگە كەلۋشىلەردەن گورى بىزدەن سول جاققا بارىپ جاتقاندار لەگى كوپ. قىتاي جاعى 2024 جىلدى «قازاقستاندىق تۋريزم جىلى» دەپ اتاعان كورىنەدى. مۇنى بارشامىز ءتيىمدى پايدالانا بىلگەنىمىز ءجون. اسىرەسە جاستارىمىز الەمدەگى وزىق ەلدەردىڭ ءبىرى سانالاتىن قىتاي ەلىنە ەمىن-ەركىن بارسىن, كورسىن, ۇيرەنسىن.
ءبىز داڭعازالىققا, بوس كەۋدەلىككە سالىنىپ, تەكتەن-تەككە ازىپ-توزۋعا جول بەرمەۋىمىز كەرەك. «مالىم – جانىمنىڭ ساداعاسى, جانىم – ارىمنىڭ ساداعاسى» دەگەن قازاقتىڭ سوزىندە ادالدىق, ادىلدىك, ەڭبەكقورلىق, بىلىكتىلىك, بىرلىك پەن ىنتىماقتاستىق جاتىر. جاڭارعان جاڭا ەل قۇرۋ – ءبارىمىزدىڭ ارمان-مۇددەمىز. ەندەشە, ەلدىككە ۇيىسىپ, جۇرت بولىپ جۇمىلۋ كەرەك.
مۇرات قازامباەۆ,
قالالىق ارداگەرلەر كەڭەسىنىڭ توراعاسى
جەزقازعان
