كەزەكشىلەر بولىمىنە كوپقاباتتى ءۇيدىڭ ءبىر پاتەرىندە ءورت بولىپ جاتقاندىعى تۋرالى سۋىت حابار تۇسىسىمەن وقيعا ورنىنا بىردەن جەتكەن. الدىمەن, ءسال-ءپال بارلاۋ جاسادى. شاماسى اس ءۇي بولسا كەرەك, تەرەزەسى اشىق. پاتەردىڭ وزگە تەرەزەلەرىنەن قويۋ قارا ءتۇتىن بۋداقتاپ تۇر. اس ءۇيدىڭ تەرەزەسىنەن كىشكەنتاي قىزدىڭ ۇرەيلى ءجۇزى كورىنەدى. ارىپتەستەرى رۇستەم ماناتوۆ پەن اسقار ءالجانوۆ بىردەن ءورت سوندىرۋگە كىرىسكەن. اناس ءزاينىش باسپالداق قۇرا باستادى. شالت قيمىلداپ, دايىندىق جۇمىستارىن قاس قاعىمدا اياقتاپ, قانات باسپالداقپەن جوعارى كوتەرىلدى. الدىمەن كورگەنى كىشكەنتاي قىزدىڭ جاسقا شىلانعان جانارى. بۇل باسۋ ايتقان.
– قورىقپا بوتام, قازىر امان-ەسەن جەرگە تۇسىرەمىن, – دەگەن ستەپنوگور قالالىق توتەنشە جاعدايلار باسقارماسىنىڭ بولىمشە كومانديرى, اعا سەرجانت قانات اسقاروۆ كىشكەنتاي قىز قورقىنىشقا بوي الدىرماسىن دەپ.
– قۇتقارىڭىزشى, اعاي, – دەدى تۇلا بويى ۇرەيدەن قالشىلداپ تۇرعان كىشكەنتاي قىز.
ونىڭ ار جاعىندا تاعى ءبىر بالا بار ەكەن. باجايلاپ قاراسا, ەكى جاس شاماسىنداعى كىشكەنتاي بالدىرعان. ابىروي بولعاندا كىشكەنتاي قىز ءتۇتىن كىرمەسىن دەگەن بولۋى كەرەك اس ءۇيدىڭ ەسىگىن جاۋىپ قويىپتى. ايتكەنمەن, ساڭىلاۋدان اششى ءتۇتىن سىزدىقتاپ ەنىپ جاتىر. ويلانىپ-تولعانۋعا ۋاقىت قايدا, قانات جەتىلەر شاماسىنداعى قىزدى وڭ قولىمەن قاپسىرا قۇشاقتاپ الدى دا, باسپالداقپەن تومەن تۇسە باستادى. قاس قاعىم ءسات قىمبات بولىپ كەتەتىن مۇنداي ۋاقىتتا جاتتىعۋ كەزىندە جاي وعىنداي اتىلاتىن جىلدامدىق كەمىپ, ۋاقىت شىركىن تەز وتەتىن ءتارىزدى. كىشكەنتاي قىزدى قاۋمالعان ادامدارعا تاپسىرعان سوڭ ەكىنشى ءسابيدى قۇتقارۋعا ۇمتىلعان. ەكى جاسار بالانى كوتەرىپ تومەن تۇسكەن سوڭ عانا ەس جيدى. الگىندە كورگەنى ءتۇس سياقتى ب ۇلىڭعىر. قۇتقارۋشىنىڭ ءابجىل قيمىلىنا ءتانتى بولعان بوگدە بىرەۋلەر العىسىن ايتىپ جاتىر.
– مىنە, ازامات! – دەگەن بىرەۋى. – ەكى بىردەي بالانى اجال تىرناعىنان امان الىپ قالدىڭ.
بولىمشە باسشىسى قاناتتىڭ توتەنشە وقيعاعا تاپ بولعان ءساتى جالعىز بۇل ەمەس. بىردە جىلۋ ەلەكتر ورتالىعىنىڭ قازاندىعىندا ءورت شىققان. وقىس وقيعاعا سەبەپشى ەلەكتر سىمدارى ەكەن. اۋقىمى ۇلكەن, ونىڭ ۇستىنە از عانا ۋاقىتتىڭ ىشىندە بەل الىپ كەتكەن. تىنىستاۋ قيىن بولعان سوڭ وتتەگى تولتىرىلعان باللونداردى پايدالانۋعا تۋرا كەلدى. ءالسىن-ءالسىن اۋىستىرىپ وتىردى. بولىمشەدەگى جاۋىنگەرلەردىڭ ءبىر-بىرىمەن قويان-قولتىق جۇمىس ىستەۋلەرىنىڭ ارقاسىندا ءورت وقشاۋلانعان.
كەيىپكەرىمىزبەن تىلدەسىپ وتىرىپ مۇنداي وقىس وقيعالاردىڭ ءجيى كەزدەسەتىندىگىن ۇقتىق. اسىرەسە جىلۋ بەرۋ ماۋسىمى باستالعان كەزدە كوبەيەتىن كورىنەدى. بۇلاردىڭ بولىمشەلەرى ستەپنوگور قالاسىنىڭ ماڭىنداعى بىرنەشە ەلدى مەكەندەرگە قىزمەت كورسەتەدى. ال اۋىل تۇرعىندارىنىڭ باسىم كوپشىلىگى كومىر جاعادى. قايسىبىرىنىڭ ەلەكتر قۋاتىن تاراتاتىن سىمدارى ەسكىرگەن. كەيبىر پەشتەردە دە اقاۋ بار. ايتەۋىر, قاۋىپ قايدان دەرىڭ بار ما؟!
كەيبىر وقيعالار كەزىندە قۇتقارۋشىلاردىڭ ومىرىنە دە قاۋىپ ءتونىپ جاتاتىنى بار. بىردە قالا ىرگەسىندەگى ساياجايدا شاعىن ءۇي ورتەندى. ىلە جەتكەن بۇلار ءمان-جايدى بارلاعان. ساياجاي ىشىندەگى گال باللونى دەر كەزىندە شىعارىلدى. جازاتايىم ىستىقتان جارىلىپ كەتسە قۇتقارۋشىلاردىڭ دا ومىرىنە قاۋىپ تونەر ەدى.
جوعارىدا اتالعان وقيعا, ياكي ەكى بالانى ورتتەن قۇتقارۋ كەزىندەگى قاجىرلى ءىس-قيمىلى ءۇشىن بولىمشە كومانديرى قانات اسقاروۆ ارنايى توسبەلگىمەن ماراپاتتالدى. ءوز جۇمىسىنا ادال, جاۋاپكەرشىلىگى جوعارى جاۋىنگەردىڭ ەرلىگىن ايعاقتايتىنداي بەلگى. بىراق قانات ءۇشىن ەل العىسىنا بولەنگەننەن قىمبات ەشتەڭە جوق.
اقمولا وبلىسى,
ستەپنوگور قالاسى
