فوتو: gov.kz
جولدىڭ قيىندىعى تازالاۋشى فيرمالارمەن قاتار جەرگىلىكتى پوليتسيا قىزمەتكەرلەرىنىڭ قىزمەتىن دە «قىزدىرىپ» تۇر. ءتارتىپ ساقشىلارى كۇنىنە سان قايتارا ومبى قاردا تۇرىپ قالعان كولىك جۇرگىزۋشىلەرىنە كومەكتەسۋدەن ابدەن شارشاعان. اسىرەسە, اۋىل اراسىنداعى جولداردىڭ قاتەرى جوعارى. مۇنداعى جولدار جابىلماعاندىقتان قاردىڭ قالىڭدىعىنا, بوران باسىپ قالاتىن جەرلەردىڭ مولدىعىنا قاراماي, جولعا شىعىپ كەتۋشىلەر كوپ. ماسەلەن, وتكەن جەكسەنبىدە مامليۋت اۋدانىنداعى دۋبروۆنوە اۋىلىنىڭ سىرتىنان وتەتىن جولدا بىردەن بىرنەشە كولىك قار قۇرساۋىندا قالعان. جەرگىلىكتى تۇرعىنداردىڭ ءبىرى وزىنە حابارلاسقاننان كەيىن ۋچاسكەلىك پوليتسيا ينسپەكتورى الىبەك ءوسىپوۆ اتقا قونىپ, جولاۋشىلاردى قۇتقارۋ ءۇشىن «قازاۆتوجول» تراكتورلارىن كومەككە شاقىرادى. ينسپەكتور دەر كەزىندە شاقىرعان تراكتور قار قۇرساۋىندا قالعان ۋچاستوكتى ارشىپ, 20 گرادۋستىق سۋىقتا تىستەرى تىسىنە تيمەي توڭا باستاعان ادامدار قۇتقارىلدى. امان قالعان تۇرعىندار ءتىپتى العىسقا تولى بەينەكورىنىستەرىن پد باسشىلىعىنا جىبەرىپ تە ۇلگەرگەن. وندا: ء«ۇش ساعات بويى جولدا تۇردىق, ايتەۋىر دەر كەزىندە كومەككە شاقىرعان پوليتسيا قىزمەتكەرىنىڭ ارقاسىندا تەحنيكا كەلدى. الىبەككە راحمەت!», دەپ جازىلعان.
وسىنداي قۇتقارۋ وقيعالارىنىڭ ءبىرى قىزىلجار اۋدانىندا دا بولدى. مۇندا ۋچاسكەلىك ينسپەكتور اقىل بايتەڭىزوۆ ءوزىنىڭ قىزمەتتىك «نيۆاسىمەن» «تەپليچنوە» اۋىلىنىڭ تۇسىندا قارعا باتىپ تۇرعان پەتروپاۆل قالاسى تۇرعىنىنىڭ «گازەل» اۆتوكولىگىن سۇيرەپ شىعارعان. تاعى ءبىر ۋچاسكەلىك پوليتسيا ينسپەكتورى باحتيار امانگەلديەۆ ارحانگەلسكوە اۋىلىنا اتا-انالارىنا دەمالىسقا بارا جاتقان جاس وتباسىنىڭ كولىگىن قالىڭ قاردى قازىپ, الىپ شىعۋعا كومەكتەستى. ىشىندە جاس بالاسى بار وتباسىنىڭ دا ءتارتىپ ساقشىسىنا ايتار العىسى شەكسىز.
ال ۋچاسكەلىك ينسپەكتور جامبىل ورالباەۆ سوكولوۆكا اۋىلى تۇرعىنىنىڭ قاردا باتىپ قالعان «ۆاز»-ىن ءوز كولىگىمەن تارتىپ شىعارا الماعان سوڭ «نيۆاسى» بار كورشىلەس ۆينوگرادوۆكا اۋىلىنىڭ تۇرعىنى اندرەي پانتيۋحوۆتى كومەككە شاقىرىپ, سونىڭ ارقاسىندا جولاۋشىلاردى سۋىقتان امان الىپ قالعان. ال رەسەيدىڭ سۋرگۋت قالاسىنان «پەتروپاۆل – استانا» جولىمەن ۇيىنە كەلە جاتقان جۇرگىزۋشىنىڭ جولدان شىعىپ كەتكەن «حوندا» اۆتوكولىگىن شىعارىپ الۋ ءۇشىن پوليتسيا قىزمەتكەرلەرى تامەرلان تاستانبەك پەن حاميت سادۋاقاسوۆقا جەرگىلىكتى شارۋا قوجالىعىنىڭ ديرەكتورى ۆيكتور رەديننىڭ تراكتورىن شاقىرتۋعا تۋرا كەلگەن.
«Hyundai» كولىگىمەن قاسىنا ەكى ەرەسەك بالاسىن الىپ, كوكشەتاۋ قالاسىنا بارا جاتقان رەسەي ازاماتىن دا ساقشىلار جولدىڭ 346-شاقىرىمىندا اجالدان قۇتقاردى. كوكتايعاقتا رولگە يە بولا الماي قالعان رەسەيلىك جولدان 10 مەتردەي جەرگە ۇشىپ كەتىپ, قالىڭ قاردا ومبىلاپ قالعان ەكەن. جولاۋشىلاردى وبلىستىق پد پاترۋلدىك پوليتسيا باتالونىنىڭ قىزمەتكەرلەرى ەۆگەني ۆيشنەۆسكي مەن التىنبەك وماروۆ قوسىمشا كولىك شاقىرتىپ, قۇتقاردى.
قازىر وڭىردەگى كۇرە جولداردا مۇنداي وقيعالار كۇن سايىن تىركەلىپ جاتىر. مىسالعا كەلتىرگەنىمىز تەك بىرنەشەۋى عانا. وسىعان وراي پوليتسيا قىزمەتكەرلەرى جۇرگىزۋشىلەردى اۆتوموبيل جولدارىنىڭ جابىلۋى تۋرالى حابارلامالاردى باقىلاپ وتىرۋعا, قىسقى جولداردا وتە مۇقيات بولۋعا شاقىرادى. بىراق جەلدەي ەسكەن كولىكپەن تەز جەتىپ قالامىن دەپ ويلايتىن جاۋاپسىز جولاۋشىلار قۇزىرلى ورگانداردىڭ ەسكەرتپەلەرىن قاستىق قىلعانداي كورىپ, قاشىپ-پىسىپ جولعا شىعىپ جاتادى. مۇنداي اسىعىستىقتىڭ اقىرى پوليتسيا قىزمەتكەرلەرى بولماسا, كەيدە ۇلكەن تراگەديامەن دە اياقتالىپ جاتادى.
سولتۇستىك قازاقستان وبلىسى
