اتالعان اۋداندا 14 پەن 35 جاسقا دەيىنگى 102 مىڭ ازامات تۇرادى دەسەك, ونىڭ 7,8 پايىزى NEET ساناتىنداعى جاستار. جاستاردىڭ شىعارماشىلىق باستامالارىن دامىتۋعا ارنالعان ورتالىقتىڭ اشىلۋ سالتاناتىنا قاتىسقان قالا اكىمى ەربولات دوساەۆ, كەلەر جىلعا دەيىن شاھاردا وسىنداي 16 ورتالىق جۇمىسىن باستايتىنىن جەتكىزدى.
ەل اۋماعىندا العاش قانات قاققان جوبانى جۇزەگە اسىرۋ ءۇشىن اكىمدىك بىلتىردان باستاپ ىسكە كىرىسكەن. بىرنەشە عيمارات ساتىپ الىنىپ, جوندەۋ جۇمىستارى جۇرگىزىلدى. تاياۋدا جىلىنا 800 مىڭ جاسقا قىزمەت كورسەتۋگە قاۋقارلى تاعى 7 بىردەي ورتالىق اشىلىپ, جاستار ءۇشىن يدەيا الماسۋ الاڭىنا اينالماق. مۇندا تەگىن نەگىزدە ءبىلىم بەرۋ مەن مادەني ءىس-شارالار وتكىزىلىپ, جاستار بىلىكتى پسيحولوگتەر مەن زاڭگەرلەردىڭ كومەگىن, سونداي-اق جۇمىسقا ورنالاسۋ مەن قارجى ماسەلەسى بويىنشا مامانداردان كەڭەس الا الادى.
«الماتى – جاستار قالاسى. بىزدە 14 پەن 35 جاس ارالىعىنداعى 680 مىڭنان استام جاس بار. بىراق باس قوسىپ وي بولىسەتىن, قيىن كەزدە كومەك كورسەتەتىن ورتالىق قالادا بولعان ەمەس. قازىر ءبىز بۇل ماسەلەنى ءتيىمدى شەشىپ جاتىرمىز. جىل سوڭىنا دەيىن بازالىق ينفراقۇرىلىم قۇرۋعا تىرىسامىز. بىزگە جاستاردان كەرى بايلانىس قاجەت. ولار ءۇشىن اقىسىز نەگىزدە ءبىلىم بەرۋ كۋرسى مەن بىلىكتىلىكتى ارتتىرۋ كۋرستارىن وتكىزۋگە, جاستار باعدارلاماسىن قازىرگى زامانعا بەيىمدەۋگە اركەز دايىنبىز. مەملەكەت باسشىسى ءوز سۇحباتىندا اتاپ وتكەندەي, جاستارعا ءبىرىنشى كەزەكتە كوڭىل بولىنەدى», دەيدى ەربولات دوساەۆ.
كوميۋنيتي ورتالىقتارىنىڭ رەزيدەنتتەرى ءۇشىن بارلىق قىزمەت تەگىن. بۇعان قوسا كولىككە, قوعامدىق تاماقتانۋعا, سپورتتىق جانە مادەني ينفراقۇرىلىمدى پايدالانۋعا, وقىتۋ مەن شەبەرلىك دارىستەرىنە جەڭىلدىكتەر بەرەتىن كەشەندى ديسكونتتىق كارتالار ىسكە قوسىلعان.
«جۇمىسسىزدار كوممۋنالدىق ورتالىقتان مەملەكەتتىك باعدارلامالار بويىنشا كەڭەس الا الادى, سونىمەن قاتار جۇمىسقا ورنالاسۋ مەن وقۋعا قاتىستى اقپاراتتاردى بىلە الادى. ول ءۇشىن «Jasalmaty.kz» پورتالىنا تىركەلىپ, «JobFair365» جۇمىسقا ورنالاستىرۋ پلاتفورماسىندا تۇيىندەمە جازۋى كەرەك. بۇل رەتتە, كوزدەگەن بوس جۇمىس ورنى بويىنشا قاجەتتى داعدىسى بولماسا, جاستار «SkillBridge» پلاتفورماسىندا وزەكتى ماماندىقتار بويىنشا قىسقامەرزىمدى وقىتۋدان وتە الادى», دەيدى الماتى قالاسى جاستار ساياساتى باسقارماسىنىڭ باسشىسى قايىرجان مەڭدىعاليەۆ.
جاستارعا قولداۋ كورسەتەتىن مۇنداي الاڭدار قۇرۋ – الەمدىك تاجىريبەدە جەمىسىن كورسەتكەن جوبا. كوميۋنيتي ورتالىقتار ەڭبەك نارىعى ءۇشىن سۇرانىسقا يە مامانداردى دايارلاۋعا جانە جاستاردى مەگاپوليستىڭ قوعامدىق باستامالارىنا تارتۋعا مۇمكىندىك بەرمەك.
سۋ جاڭا ورتالىقتىڭ ديزاين جوباسىن جاساعان كريستينا بەكمىرزاەۆا: «ورتالىقتىڭ ديزاينى – ءاربىر جاستىڭ الەۋەتىن اشۋدىڭ كىلتى. ءبىز قابىرعا مەن شاتىردى عانا ەمەس, شىعارماشىلىقتىڭ, يدەيا الماسۋدىڭ جانە تۇلعالىق دامۋدىڭ الەۋەتتى الاڭىن قۇرۋدى ماقسات ەتتىك. جاستار ءۇشىن بارىنشا قولايلى جاعداي جاساۋعا تىرىسامىز, عيماراتتاعى ءاربىر دەتال رۋحاني دامۋعا, شىعارماشىلىق ورىستەۋگە اسەر سىيلاۋ ءۇشىن بارىمىزدى سالدىق», دەپ اتاپ ءوتتى.
الماتى
