ءوڭىر باسشىسى ناريمان تورەعاليەۆ 2024 جىلعى سۋ تاسقىنى كەزەڭىنە دايىندىق جونىندە كەڭەيتىلگەن جيىن وتكىزىپ, ءتيىستى مەكەمە باسشىلارىنىڭ بايانداماسىن تىڭدادى. ويتكەنى بيىلعى اۋا رايىنىڭ قۇبىلمالىلىعى, ىلعالدىڭ مولدىعى كوكتەمگى سۋ تاسقىنىنىڭ الدىن الۋعا ەرتەرەك دايىندالۋ قاجەتتىگىن كورسەتىپ وتىر.
باتىس قازاقستان وبلىستىق توتەنشە جاعدايلار دەپارتامەنتى باستىعىنىڭ ورىنباسارى راشيد ءبىلالوۆتىڭ ايتۋىنشا, كوكتەمگى سۋ تاسقىنى كەزەڭىنە دايىندىق شەڭبەرىندە بىرقاتار ءىس-شارا اتقارىلعان ەكەن.
«كەشەندى جوسپارىمىز بويىنشا 700 ملن تەڭگە قارجى جۇمساپ, 133 ءىس-شارا ورىندادىق. اكىمدىكتەر 210 ملن تەڭگەگە 100-دەن اسا جابدىق پەن ارنايى تەحنيكا ساتىپ الدى. قازىردىڭ وزىندە 19 ۋاقىتشا گيدروبەكەت ورناتىلدى, 41 كم-دەن استام قورعانىس بوگەتى سالىندى جانە نىعايتىلدى. 21 كم-دەن استام ارىق, اۆتوجولداردا 49 سۋ وتكىزۋ قۇبىرى مەن 37 بەتوندىق قۇرىلىس ورناتىلدى», دەيدى راشيد بەكەت ۇلى.
بۇعان قوسا وڭىردە 1 تيەگىش تراكتور, 67 500 قاپشىق, 68 موتوسورعى, 22 موتورلى قايىق, 12 مۇز كەسۋ قۇرىلعىسى مەن 13 موتوبۇرعى, 5 ەلەكتروگەنەراتور, ءورت ءسوندىرۋ جەڭدەرى, قۇتقارۋ كەۋدەشەلەرى, قىسقى كيىم مەن درون ساتىپ الىنعان.
الداعى ۋاقىتتا ءبورلى اۋدانى بويىنشا كەڭتۇبەك, اقساي قالاسى, ەسكى ارالتال, جاڭا ارالتال اۋماقتارى, وسپەن, جاڭاتالاپ, باقتىارال اۋىلدارىندا قورعانىس بوگەتتەرىن ورناتۋ, اقبۇلاق اۋىلىنداعى بوگەتتى قالپىنا كەلتىرۋ قاجەت. دوستىق اۋىلىنداعى بوگەتتى كۇردەلى جوندەۋ, 1 موتوسورعى, 1 قايىق ساتىپ الۋ كۇن تارتىبىندە تۇر.
ال بايتەرەك اۋدانىندا پەرمەتنوە اۋىلىنداعى بوگەتتىڭ قۇرىلىسى, چيروۆو سۋ قويماسىن جوندەۋ جانە رازدولنوە اۋىلىنداعى سۋ قويماسىنىڭ شليۋزىن جوندەۋ جوسپارلانعان.
شىڭعىرلاۋ اۋدانىندا دا «قىزىلكول-ارداق-اقتاۋ» جولىنىڭ 17 جانە 31 شاقىرىمىندا, سونداي-اق «شىڭعىرلاۋ-اقشات-سەگىزساي» اۆتوجولىنىڭ 70 جانە 73 شاقىرىمىندا سۋ وتكىزۋ قۇبىرلارىن ورناتۋ, 1 موتوسورعى, 1 قايىق ساتىپ الۋ كەرەك.
تەرەكتى اۋدانىنىڭ پودستەپنوە اۋىلىندا, بولاشاق جانە كەرەمەت شاعىن اۋداندارىندا سۋ بۇرۋ ارناسىنىڭ قۇرىلىسىنا جوبا قۇجاتىن جاساقتاۋ, 6 موتوسورعى ساتىپ الۋ دا كوزدەلىپ وتىر ەكەن.
تابيعي رەسۋرستار جانە تابيعات پايدالانۋدى رەتتەۋ باسقارماسى وڭىردەگى گيدروتەحنيكالىق قوندىرعىلاردى جان-جاقتى زەرتتەپ تەكسەرىپ, قاراوبا, سوليانكا, چيروۆو سۋ قويمالارىنىڭ جوبا قۇجاتىن تۇزەتۋگە ءتيىس. مۇراتساي سۋ قويماسىن جوندەۋ دە – كەزەك كۇتتىرمەيتىن ءىس.
جولاۋشىلار كولىگى جانە اۆتوموبيل جولدارى باسقارماسى ء«بورلى-اقساي-جىمپيتى» اۆتوجولىنىڭ 80 شاقىرىمىندا, «چاپاەۆ-جاڭاقالا-سايحىن» جولىنىڭ 157, 227, 238, 244, 255, 265 شاقىرىمدارىندا, «جاڭاقالا-ۇيالى-بيسەن» جولىنىڭ 192 شاقىرىمىندا جول استىنان سۋ وتكىزۋ قۇبىرلارىن ورناتۋى قاجەت. قازتالوۆ اۋدانىنداعى ءاجباي اۋىلىندا قورعانىس بوگەتىن ورناتۋ, اقجايىق اۋدانى بويىنشا العاباس اۋىلىنداعى كيروۆ كانالى ارقىلى وتەتىن جولدى نىعايتۋ, ورال قالاسىنىڭ شۇعىلا-قامبار باتىر كوشەسىنە ارىق جۇيەسىن ورناتۋ دا ءوز كەزەگىن كۇتىپ تۇر.
«قازاۆتوجول» مەكەمەسى «پودستەپنوە-تەرەكتى-رف شەكاراسى» اۆتوجولىنىڭ 11 جانە 13 شاقىرىمى تۇسىندا, سونداي-اق قاراتوبە اۋدانىنداعى قورجىن اۋىلىنا كىرەبەرىس جولدىڭ 4, 5, 11 شاقىرىمىندا سۋ وتكىزۋ قابىلەتىن جوعارىلاتۋى قاجەت.
توتەنشەلىكتەر وبلىس اۋماعىنداعى اۆتوجولداردا سۋ باسۋ قاۋپى جوعارى 49 ورىن بار ەكەنىن ايتادى. مۇنىڭ 46-سى – اۆتوكولىك جولى, ۇشەۋى – تەمىرجول.
ىقتيمال توتەنشە جاعدايدى جويۋعا قازىر 4 مىڭنان استام ادام, 1 مىڭنان استام تەحنيكا, 88 ءجۇزۋ قۇرالى مەن 329 موتوپومپا دايىندىققا كەلتىرىلگەن. سونداي-اق 23 مىڭ توننا ينەرتتى ماتەريال, 145 مىڭ قاپ, 557 توننا جانار-جاعارماي قورى دايىندالىپتى.
«2,5 ملن تەڭگەگە عارىشتىق مونيتورينگ جانە 80 ملن تەڭگەگە اەروۆيزۋالدى زەرتتەۋ جۇرگىزۋگە كەلىسىمشارت جاساقتالدى», دەيدى ر.ءبىلالوۆ.
كەيىنگى جىلداعى سۋ تاسقىنى سالدارىن ەسكەرە وتىرىپ, باتىس قازاقستان وبلىسىندا تاسقىن قاۋپى ەڭ جوعارى اۋماقتار – ورال قالاسى, بايتەرەك, تاسقالا, ءبورلى, قازتالوۆ جانە قاراتوبە اۋداندارى بولىپ بەكىتىلدى.
ورتاشا قاۋىپ – تەرەكتى, شىڭعىرلاۋ, سىرىم, اقجايىق جانە جانىبەك اۋداندارىنا تيەسىلى.
جاڭاقالا جانە بوكەي ورداسى اۋداندارىندا سۋ تاسقىنى قاۋپى جوق دەۋگە دە بولادى.
جيىن بارىسىندا اۋا رايى بولجامى, سۋ قويمالارىن ءتيىمدى پايدالانۋ جونىندە باياندامالار جاسالدى. ءبورلى, قازتالوۆ اۋداندارىنىڭ اكىمدەرى مەن ورال قالاسى اكىمىنىڭ ورىنباسارى كوكتەمگى سۋ تاسقىنىنىڭ الدىن الۋ باعىتىندا اتقارعان جۇمىستارى بويىنشا ەسەپ بەردى.
وبلىس اكىمى ناريمان تورەعاليەۆ ورىنباسارلارىنا ارنايى كوميسسيا قۇرىپ, سۋ تاسقىنى بولۋى مۇمكىن مەكەندەردى ارالاپ, سۋ قويمالارىن, قۇبىرلارىن تەكسەرۋدى تاپسىردى. سونىمەن قاتار ءوڭىر باسشىسى قاڭتار-اقپان ايلارىن ءتيىمدى پايدالانىپ, قار تازالاۋ, قۇبىرلاردى تازارتۋ بويىنشا جۇمىس جۇرگىزۋدى جۇكتەدى.
باتىس قازاقستان وبلىسى
