پرەزيدەنت تۇركىستان وبلىسى تۇرعىندارىنىڭ ءال-اۋقاتىن ارتتىرۋدى تاپسىردى

وتكەن جىلدىڭ قورىتىندىسى بويىنشا, ايماقتىڭ نەگىزگى ماكروەكونوميكالىق كورسەتكىشتەرىندە وڭ ديناميكا بايقالادى. اتاپ ايتقاندا, وڭىردەگى ونەركاسىپ ءونىمىنىڭ كولەمى 2,5 پايىزعا ءوسىپ, 1 تريلليون تەڭگەدەن اسقان. وڭدەۋ ونەركاسىبىن دامىتۋ ءۇشىن جالپى سوماسى 30,2 ميلليارد تەڭگە بولاتىن 20 جوبا ىسكە قوسىلىپ, 594 جاڭا جۇمىس ورنى اشىلعان.

وبلىس اكىمىنىڭ ايتۋىنشا, الداعى 5 جىلدا ءوڭىردىڭ ءوز كىرىسىن 100 ميلليارد تەڭگەگە ارتتىرۋ جوسپارلانىپ وتىر. الدىن الا ەسەپ بويىنشا بىلتىر جالپى وڭىرلىك ءونىم كولەمى 3,8 تريلليون تەڭگە بولعان. ال اۋىل شارۋاشىلىعىنداعى ءونىم كولەمى 1,1 تريلليون تەڭگەنى قۇراعان. بۇل كورسەتكىش بويىنشا تۇركىستان وبلىسى رەسپۋبليكادا كوش باستاپ تۇر. سالانى ءارتاراپتاندىرۋ ناتيجەسىندە 3,3 ميلليون توننا كوكونىس, باقشا ونىمدەرى جينالدى. بۇل – رەكوردتىق كورسەتكىش. پرەزيدەنت تاپسىرماسىنا سايكەس اۋىل شارۋاشىلىعىندا ءونىم كولەمىن ارتتىرۋعا, سۋدى ۇنەمدەۋگە ىقپال ەتەتىن جاڭا ءادىس-تاسىلدەر مەن تەحنولوگيالار ەنگىزىلىپ جاتىر.

مەملەكەت باسشىسىنا وڭىردەگى شاعىن جانە ورتا بيزنەستىڭ دامۋ بارىسى تۋرالى باياندالدى. دارحان ساتىبالدىنىڭ ايتۋىنشا, وبلىستاعى كاسىپكەرلىك سۋبەكتىلەرىنىڭ سانى 211 مىڭعا جەتىپ, 1,6 تريلليون تەڭگەنىڭ ءونىمى وندىرىلگەن. وبلىستا جالپى سوماسى 407,5 ميلليارد تەڭگە بولاتىن قۇرىلىس جۇمىستارى جۇرگىزىلىپ, 898,9 مىڭ شارشى مەتر تۇرعىن ءۇي پايدالانۋعا بەرىلگەن. 3 مىڭعا جۋىق وتباسى باسپانالى بولدى. بۇدان بولەك, بىلتىر بيۋدجەت ەسەبىنەن 35 مەكتەپتىڭ قۇرىلىسى جۇرگىزىلىپ, 20 مەكتەپ اشىلدى. «جايلى مەكتەپ» جوباسى اياسىندا وبلىستا ءۇش جىل ىشىندە 49 مىڭ وقۋشىعا ارنالعان 63 مەكتەپ سالىنادى.

سونىمەن قاتار پرەزيدەنتكە ايماقتاعى اۋىلداردى سۋمەن جانە گازبەن قامتاماسىز ەتۋ جۇمىستارىنىڭ بارىسى تانىستىرىلدى. وتكەن جىلى وبلىستاعى 20 ەلدى مەكەنگە جاڭادان اۋىزسۋ قۇبىرى تارتىلدى. توعىز اۋىلداعى ەسكىرگەن سۋ تارتۋ جۇيەلەرى جاڭارتىلدى. سونداي-اق 62 گازبەن قامتۋ نىسانىنىڭ قۇرىلىسى اياقتالىپ, 48 ەلدى مەكەنگە كوگىلدىر وتىن جەتكىزىلدى.

كەزدەسۋ سوڭىندا قاسىم-جومارت توقاەۆ وبلىس اكىمىنە حالىقتىڭ ءال-اۋقاتىن ارتتىرۋ, ءوڭىردىڭ ەكونوميكالىق جاعدايىن جاقسارتۋ جونىندە بەرگەن تاپسىرمالارىن جۇيەلى ءارى ساپالى ورىنداۋ قاجەت ەكەنىن ايتتى. سونداي-اق تۇركىستان ءوڭىرىن دامىتۋ جۇمىستارىن جالعاستىرۋدى تاپسىردى.