كەزدەسۋدى اشقان ماۋلەن اشىمباەۆ ەۋروپالىق وداق قازاقستاننىڭ ستراتەگيالىق سەرىكتەسى ەكەنىن جانە ەلىمىز ەكىجاقتى قارىم-قاتىناستى نىعايتۋعا باسا ءمان بەرەتىنىن اتاپ ءوتتى.
«بىلتىر قازاقستان پرەزيدەنتى قاسىم-جومارت توقاەۆ پەن ەۋروپالىق كەڭەستىڭ پرەزيدەنتى شارل ميشەل تاراپتار اراسىنداعى ىنتىماقتاستىقتىڭ سەرپىندى دامىپ كەلە جاتقانىن اتاپ ءوتتى. ءبىزدىڭ دەپۋتاتتار «قازاقستان رەسپۋبليكاسى – ەۋروپالىق وداق» پارلامەنتتىك ىنتىماقتاستىق كوميتەتىنىڭ جۇمىسىنا بەلسەندى قاتىسىپ كەلەدى. قازاقستان پارلامەنتىنىڭ سەناتى ەۋروپالىق ارىپتەستەرىمىزبەن پارلامەنتارالىق بايلانىستاردى ودان ءارى جانداندىرۋعا, ورتاق مۇددەنى كوزدەيتىن ماسەلەلەر بويىنشا تۇراقتى, مازمۇندى ديالوگتى ءارى قاراي جالعاستىرۋعا دايىن», دەدى سەنات توراعاسى.
سونداي-اق پالاتا سپيكەرى مەملەكەت باسشىسىنىڭ باستاماسىمەن ەلىمىزدە جۇزەگە اسىرىلىپ جاتقان ساياسي جانە الەۋمەتتىك-ەكونوميكالىق رەفورمالارعا توقتالىپ ءوتتى.
«ەلىمىز ادام قۇقىقتارىن قورعاۋعا تولىقتاي بەيىلدى جانە وسى باعىتتاعى رەفورمالاردى بەلسەندى تۇردە جۇرگىزىپ كەلەدى. بىلتىرعى 8 جەلتوقساندا قاسىم-جومارت توقاەۆ ادام قۇقىقتارى مەن زاڭدىلىقتى قامتاماسىز ەتۋ سالاسىنداعى جاڭارتىلعان ءىس-شارالار جوسپارىن بەكىتتى. ول گەندەرلىك تەڭدىكتەن باستاپ, ەڭبەك قاۋىپسىزدىگى مەن ەڭبەكتى قورعاۋعا دەيىنگى باستامالاردى قامتيدى. بۇل ءبىزدىڭ ادام قۇقىقتارى سالاسىنداعى حالىقارالىق ستاندارتتاردى ۇنەمى جەتىلدىرۋگە جانە ساقتاۋعا دەگەن ۇمتىلىسىمىزدى كورسەتەدى. وسى ورايدا ەلىمىزدە كەشەندى رەفورمالار باعدارلاماسىن جۇزەگە اسىرۋدا ۇنەمى قولداۋ كورسەتىپ كەلە جاتقانى ءۇشىن ەۋروپالىق وداققا العىس ايتامىز», دەدى ماۋلەن اشىمباەۆ.
سونىمەن قاتار كەزدەسۋدە ساۋدا-ەكونوميكالىق, ينۆەستيتسيالىق ىنتىماقتاستىقتى كەڭەيتۋ, ونىڭ ىشىندە ترانسكاسپي حالىقارالىق كولىك باعىتىن دامىتۋ ماسەلەلەرى تالقىلاندى. ماۋلەن اشىمباەۆ ورنىقتى دامۋ جانە وسى باعىتتاعى بىرلەسكەن ءىس-قيمىلداردى قابىلداۋ ماسەلەلەرىنە دە توقتالدى.
ءوز كەزەگىندە مارگاريتيس سحيناس قازاقستاننىڭ رەفورمالاردى ىسكە اسىرۋ باعىتىنىڭ تيىمدىلىگىن اتاپ ءوتىپ, جان-جاقتى قاتىناستى ءارى قاراي نىعايتۋعا مۇددەلى ەكەنىن جەتكىزدى.
