مەملەكەت باسشىسى قاسىم-جومارت توقاەۆ «Egemen Qazaqstan» گازەتىندەگى سۇحباتىندا ساياساتقا, رۋحاني وسۋىمىزگە, مادەنيەتكە, ەكونوميكاعا, جالپى ەلىمىزدى جاڭا باعىتتا دامىتۋعا قاتىستى ويلارىن ورتاعا سالىپ, ماڭىزدى ماسەلەلەردى كوتەردى. كولەمدى سۇحباتتى وقىپ, كوكەيدەگى سان ساۋالعا جاۋاپ الدىق.
«تاريحتى بىلمەي وتكەندى, قازىرگى جاعدايدى ءبىلۋ, بولاشاقتى بولجاۋ قيىن», دەگەن ەكەن عۇلاما-عالىم ءال-فارابي بابامىز. سۇحباتتان ەلدىك پەن بىرلىكتى نىعايتۋ باعىتىنداعى سۇراقتارعا تۇشىمدى جاۋاپ الدىق. ماسەلەن, جوشى ۇلىسىنىڭ 800 جىلدىعىن دايەكتەپ, مىڭجىلدىقتارمەن ساباقتاسقان تاريحىمىزدى تەرەڭدەتۋدى نۇسقادى. ەۋرازيا قۇرلىعىندا يمپەريا دەڭگەيىندەگى قاعاناتتى ءتول تاريحىمىزدىڭ ءبىر بولشەگى رەتىندە دارىپتەپ, تاريحي سانانى دايەكتەپ مەملەكەتشىلدىكتى ارتتىرۋ ماڭىزدى دەپ بىلەمىز. وسى ورايدا ءبىزدى, ۇستازدار قاۋىمىن تاعى ءبىر ەرەكشە جايت قۋانتتى. ياعني تاريحي ءىرى تۇلعالار تاعىلىمىمەن تابىستىراتىن ءىس-شارالارعا مەملەكەتتىك دەڭگەيدە كوڭىل ءبولىنىپ وتىر. بەلگىلى عالىم قانىش ساتباەۆتىڭ – 125, قازاقتىڭ باتىر ۇلدارى ساعادات نۇرماعامبەتوۆ پەن راحىمجان قوشقارباەۆتىڭ 100 جىلدىعى اتالىپ وتپەك.
سۇحباتتا اتاپ وتىلگەندەي, بيىل ەلىمىزدە دۇنيەجۇزىلىك كوشپەلىلەر ويىنى وتەدى. بۇل – تۇركى الەمىن جاقىنداستىراتىن, تامىرلاس ەلدەردىڭ رۋحاني ىنتىماقتاستىعىن جانداندىراتىن يگىلىكتى باستاما دەر ەدىم. ۇلى دالاداعى كوشپەلىلەر وركەنيەتىنىڭ مۇراگەرى سانالاتىن باۋىرلاس حالىقتاردىڭ مادەني-گۋمانيتارلىق بايلانىسىن ودان ءارى ارتتىرۋ – بارشامىزعا ابىرويلى مىندەت.
پرەزيدەنتتىڭ جالپىۇلتتىق قۇندىلىقتار, ساپالى ۇلت قالىپتاستىرۋ جولدارى تۋرالى ايتقان ويلارى دا ءىشىمىزدى جىلىتتى. مەملەكەت باسشىسى ناۋرىز – جاڭارۋ مەن جاڭعىرۋدىڭ سيمۆولى ەكەنىن, سوندىقتان ءتول مەرەكەمىزدىڭ مازمۇنىن بايىتىپ, ونى بارىنشا ەرەكشەلەپ, جاڭاشا اتاپ ءوتۋىمىز كەرەگىن ايتتى. ياعني بۇل قادام قوعامدى ۇيىستىرىپ, ۇلتتىق بىرەگەيلىگىمىزدى ايشىقتاپ, ەل بىرلىگىن نىعايتا تۇسۋگە ىقپال ەتەتىنى انىق.
ساليقالى سۇحباتتىڭ سالماقتى تۇسى از ەمەس. ەلدىڭ قازىرگى جاعدايى مەن كەلەشەگى جونىندە كوپ ماعلۇماتقا قانىقتىق. مەملەكەت باسشىسى ەرەكشە اتاپ وتكەندەي, «ەڭبەكقورلىق, بىلىمپازدىق, كاسىبيلىك, بىرلىك, ىنتىماق, جاڭاشىلدىق, ىسكەرلىك, باستاماشىلدىق, ادالدىق, قاراپايىمدىلىق جانە ۇنەمشىلدىك – ناعىز وتانشىل, ادال ازاماتقا ءتان قاسيەتتەر مەن قۇندىلىقتار». وسى قاسيەتتەر مەن قۇندىلىقتاردى جان-جاقتى دارىپتەپ, ۇرپاق ساناسىنا ءسىڭىرۋ – باستى بورىشىمىز. بۇل ورايدا ەلىمىزدەگى ءبىلىم سالاسىنىڭ ۇستازدارى, وقىتۋشىلارى, پروفەسسورلارى مەن عالىمدارى تەرەڭ سەزىنىپ, ابىرويمەن اتقارۋعا كۇش-جىگەرىمىزدى, بۇكىل تاجىريبەمىزدى جۇمساۋعا مىندەتتىمىز.
بەكجىگىت سەردالى,
ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ پروفەسسورى, كومپوزيتور
