ەسكە سالايىق, اتالعان قويىلىم تەاتر رەپەرتۋارىنا «استانا وپەرا» بالەت ترۋپپاسىنىڭ كوركەمدىك جەتەكشىسى, رەسەي حالىق ءارتىسى التىناي اسىلمۇراتوۆانىڭ باستاماسىمەن ەنگەن. قويۋشى حورەوگراف ديۋلا حارانگوزونىڭ پىكىرىنشە, بۇل تۋىندى ونىڭ بۇدان بۇرىن ەۋروپادا ساحنالانعان سپەكتاكلدەرىنىڭ ىشىندەگى ۇزدىگى سانالعان.
ءاپ دەگەننەن قويىلىم كورەرمەندەردى كەرەمەت حانشايىم مەن جەتى ەرگەجەيلىنىڭ سيقىرلى الەمىنە جەتەلەي جونەلدى.
«استانا وپەرا» بالەت ترۋپپاسىنىڭ ءارتىسى ايدان قالجان جاڭا جىلدى وسى بالەتتەگى حانزادانىڭ جەتەكشى پارتياسىمەن باستاعانى ءوزى ءۇشىن قۋانىش ەكەنىن جەتكىزدى.
– مۇنداعى حانزادا پارتياسى – باسقا شىعارماداعى حانزادالارعا قاراعاندا ەرەكشە. ونىڭ بولمىسى قاراپايىم, اقكوڭىل. ءبىر جاعىنان, پارتيا – حورەوگرافيالىق جانە تەحنيكالىق شەشىمدەرىمەن كۇردەلى ءارى قىزىقتى. جالپى, ءاربىر ءرولىم ماعان شابىت بەرەدى, جانىما جىلۋلىق سىيلايدى. نەگىزى, تابيعاتىم جاعىمسىز كەيىپكەرلەردى ويناۋعا جاقىن. بىراق حانزادانىڭ پارتياسى – مەنى باسقا قىرىمنان تانىتتى. قويۋشى حورەوگراف ديۋلا حارانگوزو كلاسسيكالىق بي قاعيداسىنان الىس كەتپەي, ونى سول كۇيىندە ساقتاپ, بۇل بالەتتى جاڭاشا كوزقاراسپەن الىپ شىققان. جاڭا پارتيامەن ساحناعا شىعار الدىندا ازداپ قوبالجىعانىمەن كورەرمەندەردىڭ ىقىلاسىن كورىپ, جىگەرلەندىم. تەاتردىڭ جاس ءارتىسى رەتىندە ماعان وسىنداي جەتەكشى ءرولدى ويناۋعا مۇمكىندىك بەرگەنگە قۋانىپ, وزىمە جۇكتەلگەن مىندەتتى ابىرويمەن اتقاردىم دەپ ويلايمىن, – دەدى ول.
تاعى ءبىر تالانتتى بالەت ءارتىسى جاقسىلىق ساۋقىمبەكوۆ وزىنە اڭشىنىڭ بەينەسىن جاساۋعا قولداۋ كورسەتكەن ۇستازدارىنىڭ ەڭبەگىن ەرەكشە اتاپ ءوتتى.
– قويىلىمدا اڭشىنىڭ پارتياسىن العاش رەت ورىندادىم. اكتەرلىك جاعىنان بولسىن, تەحنيكالىق تۇرعىدان بولسىن, بۇل ءرول وتە قىزىقتى. ول – سپەكتاكلدەگى نەگىزگى كەيىپكەردىڭ ءبىرى بولعاندىقتان, تەحنيكانى ويلاي وتىرىپ, اكتەرلىك ويىندى ۇمىتۋعا بولمايدى. سوندىقتان بۇعان مەن تىڭعىلىقتى دايىندالدىم. گاۋھار ۋسينا مەن رۇستەم سەيىتبەكوۆ سەكىلدى ۇستازدارمەن جۇمىس ىستەپ, ولار ماعان وسى پارتيانى ءساتتى الىپ شىعۋعا كوپ كومەكتەستى. اسىرەسە باستى رولدەردىڭ ءبىرىن سومداۋعا مۇمكىندىك بەرگەن التىناي اسىلمۇراتوۆاعا ايرىقشا العىسىمدى ايتامىن. ول كىسىنىڭ ءبىزدىڭ تالانتىمىزدى ۇشتاۋعا قوسقان ۇلەسى مول, – دەدى دارىندى جاس.
كورەرمەندەر سپەكتاكلدەگى باسقا دا كەيىپكەرلەردى تابيعاتىمەن كەلىستىرىپ ويناعان سوليستەردەرىڭ ونەرىنە ءتانتى بولدى.
