فوتو: 6alash.kz
دىنمۇحامەد احمەت ۇلى (1912-1993) - اسا كورنەكتى مەملەكەت جانە قوعام قايراتكەرى, ءۇش مارتە سوتسياليستىك ەڭبەك ەرى, قازاق كسر عىلىم اكادەمياسىنىڭ اكادەميگى, تەحنيكا عىلىمىنىڭ دوكتورى, كسرو, شەت ەل وردەندەرى مەن مەدالدەرىنىڭ يەگەرى. ول وتىز جىلدان استام ۋاقىت ەل باسقاردى.
د. ا. قوناەۆ 1912 جىلى 12 قاڭتاردا الماتى قالاسىندا دۇنيەگە كەلگەن. ەڭبەك جولىن 1936 جىلى ماسكەۋدەگى التىن جانە ءتۇستى مەتالدار ينستيتۋتىن بىتىرگەننەن كەيىن قوڭىرات كەنىشىندە باستادى. ول ديپلومىن قوڭىرات كارەرىنىڭ قۋاتتىلىعىن 90 مىڭ توننا قارا مىس بەرۋگە جەتكىزۋ جونىندە جازىپ, ونى ۇزدىك باعامەن قورعاپ شىعادى. ءوزى جۇمىس ىستەگەن ءۇش جىلدا بۇرعىلاۋ ستانوگىنىڭ جۇمىسكەرلىگىنەن باستاپ تسەح باستىعى, رۋدنيكتىڭ تەحنيكا ءبولىمىنىڭ مەڭگەرۋشىسى, باس ينجەنەرى, ديرەكتورى بولىپ قىزمەت اتقاردى.
سول جىلدارى قوڭىرات قۇرىلىسى قارىشتاپ دامىعان ەدى. د.قوناەۆتىڭ ءوزى تۇرعان ءۇي, بالاباقشا, اۋرۋحانا, مادەنيەت ءۇيى سالىندى. وسىنداي قاجىرلى ەڭبەگى ءۇشىن 1938 جىلدىڭ شىلدە ايىندا «ەرەكشە ەڭبەگى ءۇشىن» مەدالىمەن ماراپاتتالدى.
ۇلى وتان سوعىسى جىلدارىندا ول ءوندىرىس جۇمىسىن جوعارى دارەجەدە ۇيىمداستىرۋشىلاردىڭ قاتارىندا عانا قالعان جوق, 1942-52 جىلدارى قازاق كسر حالىق كوميسسارلار كەڭەسىنىڭ ورىنباسارى بولدى. ودان كەيىن 3 جىل عىلىم اكادەمياسىنىڭ پرەزيدەنتى بولىپ قىزمەت اتقاردى. رەسپۋبليكا حالىق كوميسسارلار كەڭەسىنىڭ توراعاسى بولىپ ەكى كەزەڭ-1955-60 جىلدارى جانە 1962-64 جىلدارى جۇمىس ىستەدى. ودان كەيىن د.قوناەۆ رەسپۋبليكالىق پارتيا ۇيىمىن 1986 جىلى زەينەتكەرلىك دەمالىسقا شىققانعا دەيىن شيرەك عاسىرعا جۋىق ۋاقىت باسقاردى.
دىنمۇحامەد احمەت ۇلى قوناەۆ تۋعان جەرى الماتىدا تۇرعان. 1993 جىلى 22 تامىزدا قايتىس بولىپ, كەڭساي زيراتىنا جەرلەندى.
ايتا كەتەيىك, ەلىمىزدە ەكى جىل بۇرىن قوناەۆ قالاسى بوي كوتەردى. 2022 جىلعى 3 مامىردا مەملەكەت باسشىسى قاسىم-جومارت توقاەۆتىڭ جارلىعىمەن قاپشاعاي قالاسى رەسمي تۇردە قوناەۆ بولىپ وزگەرتىلدى.
ۇلى ساياساتكەر دىنمۇحامەد قوناەۆتى ەسكە الۋ ماقساتىندا ونىڭ نەمەرەلەرى kunayev.kz رەسمي سايتىن اشتى. وندا ونىڭ ءومىربايانىن, قۇندى قۇجاتتارىن, باياندامالارى مەن مۇراعاتتىق فوتوسۋرەتتەرىن وقىپ, كورۋگە بولادى. 1992 جىلدان بەرى الماتىدا قوناەۆ اتىنداعى حالىقارالىق قور جۇمىس ىستەيدى. ال 2002 جىلى قوناەۆ مۇراجاي-ءۇيى اشىلىپ, 2003 جىلى دىنمۇحامەد احمەت ۇلى ءومىرىنىڭ سوڭعى جىلدارىن وتكىزگەن الماتى وبلىسى, الاكول اۋدانى, اقشي اۋىلىندا مەموريالدىق تاقتا ورناتىلدى.
