فوتو: qamshy.kz
«تاياۋدا بارلىق ارىپتەستەرىمىز وڭىرلەردەن ورالدى. ءوزىم دە اتىراۋ وبلىسىنا بارىپ, جەرگىلىكتى تۇرعىندارمەن, كاسىپكەرلەرمەن جانە ءماسليحات دەپۋتاتتارىمەن كەزدەستىم. سونداي كەزدەسۋلەردىڭ بىرىندە كاسىپكەرلەر وسى ماسەلەنى كوتەرىپ, رەسەيگە تاۋارلارىن جەتكىزگەن كەزدە 15-20 كۇنگە دەيىنگى مەرزىمدى الاتىن ۆەتەرينارلىق, سانيتارلىق, فيتوسانيتارلىق سياقتى ءتۇرلى تەكسەرىستەردەن وتۋگە ءماجبۇر ەكەندەرىن ايتتى. ولار وسىنداي ونىمدەر ءبىزدىڭ تاراپقا كەلگەن كەزدە نە ءۇشىن ۆەتەرينارلىق, سانيتارلىق, فيتوسانيتارلىق جانە تاعى دا باسقا باقىلاۋلار ءتيىستى دەڭگەيدە جۇرگىزىلمەيتىنىن سۇرايدى. نەگىزى كەلىسىم ەكى جاققا بىردەي. ەگەر ءبىزدىڭ سەرىكتەستەرىمىز تەكسەرىپ جاتسا, ءبىز دە تەكسەرۋىمىز كەرەك. بۇل – ءوزارا تەڭدىككە قاتىستى ماسەلە. ەڭ باستىسى, ءبىز ءوز ازاماتتارىمىزدىڭ دەنساۋلىعىن قامتاماسىز ەتۋىمىز قاجەت», دەگەن ماۋلەن اشىمباەۆ وڭىردەگى كاسىپكەرلەردىڭ نارازىلىعىن جەتكىزدى.
پالاتا سپيكەرى مۇنداي ماسەلە جايدان-جاي كوتەرىلمەيتىنىن, دەمەك, ءبىزدىڭ ازاماتتار وسىنداي جاعدايمەن ءجيى كەزدەسەتەتىنىن اتاپ ءوتتى.
«وسى ماسەلەنى وڭىرلەردەگى تۇرعىندار ءجيى كوتەرەدى. بۇل نەنى بىلدىرەدى؟ بۇل – مەملەكەتتىك ورگاندار تاراپىنان لايىقتى جۇمىس جۇرگىزىلمەيدى نەمەسە ءبىز كەلىسىمنىڭ شارتتارىن ءتيىستى دەڭگەيدە ورىنداماي وتىرمىز دەگەن ءسوز. ەگەر كەيبىر جەردە كەلىسىم تالاپتارى ءوز دەڭگەيىندە ورىندالماي جاتسا, ولاردى ىسكە اسىرۋ ءۇشىن ءتيىستى شارالار قابىلداعان ءجون. مۇمكىن ازاماتتارعا قاجەتتى اقپاراتتار دۇرىس جەتپەيتىن شىعار. وسى ماسەلەنى دە نازارعا الىپ, زاڭ اياسىندا ارەكەت ەتۋىمىز كەرەك», دەدى سەنات توراعاسى.
ساۋدا جانە ينتەگراتسيا ءمينيسترى ارمان شاققاليەۆ اتالعان ماسەلەنىڭ وتە وزەكتى ەكەنىمەن كەلىسىپ, وسىعان بايلانىستى بۇگىندە احۋالدىق شتاب قۇرىلعانىن, شەكارالاردا كوشپەلى ءىس-شارالار وتكىزىلەتىنىن جانە الداعى ۋاقىتتا بۇل باعىتتاعى جۇمىستى كۇشەيتەتىنىن تىلگە تيەك ەتتى.
ايتا كەتەيىك, بۇگىن پالاتا وتىرىسىندا دەپۋتاتتار «2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتقا وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭدى قاراپ, ماقۇلدادى. بۇل زاڭ قۇقىقتىق رەتتەۋدەگى ولقىلىقتاردى جويۋ ارقىلى ەۋرازيالىق ينتەگراتسيانى ودان ءارى دامىتۋعا ارنالعان.
حاتتاما ارقىلى ەاەو تۋرالى شارتقا كەدەندىك شەكاراداعى مەملەكەتتىك باقىلاۋ ماسەلەسىنە قاتىستى وزگەرىستەر مەن تولىقتىرۋلار ەنگىزىلەدى.
