وسىدان 9 جىل بۇرىن وبلىستىق مەديتسينا ورتالىعىنداعى جەرگىلىكتى دارىگەرلەر ا.سىزعانوۆ اتىنداعى ۇلتتىق عىلىمي حيرۋرگيا ورتالىعى ماماندارىمەن بىرلەسىپ, قالا تۇرعىنىنىڭ بۇيرەگىن اۋىستىرعان. تۋعان قارىنداسى دونور بولعان جىگىتكە جاسالعان وپەراتسيا ءساتتى ءوتىپ, ءومىرى «جاساندى بۇيرەككە» بايلانعان تالايلاردىڭ ءۇمىتى ويانىپ ەدى.
ۇزاق جىلداردان كەيىن جۋىردا وبلىستىق كوپبەيىندى اۋرۋحانادا ا.سىزعانوۆ اتىنداعى ۇلتتىق عىلىمي حيرۋرگيا ورتالىعىنىڭ باسقارما توراعاسى, مەديتسينا عىلىمدارىنىڭ دوكتورى, پروفەسسور, جوعارى ساناتتى دارىگەر بولاتبەك بايماحانوۆ وسى اۋرۋدىڭ زاردابىن تارتىپ جۇرگەن 25 جاستاعى ناۋقاسقا وپەراتسيا جاسادى. بۇيرەك اۋىستىرۋ ويداعىداي ءوتىپ, ءۇش جىلدان بەرى جاساندى بۇيرەك اپپاراتىنا كۇنى قاراپ قالعان جاس جىگىت قالىپتى تىرشىلىككە ورالدى. وعان 36 جاستاعى تۋىسقان اعاسى دونور بولۋعا كەلىسىمىن بەرىپتى.
ب.بايماحانوۆ ەلىمىزدە 2011 جىلدان بەرى بۇيرەك جانە باۋىر ترانسپلانتاتسياسى كەڭىنەن جۇرگىزىلىپ كەلە جاتقانىن ايتادى. وسى كۇنگە دەيىن 1000-عا تارتا وپەراتسيا جاسالىپتى.
«وبلىستىق كوپبەيىندى اۋرۋحانادا مۇنداي كۇردەلى وپەراتسيالاردى ىستەۋگە تولىق جاعداي بار. ءتورت ساعاتتان اسا ۋاقىتقا سوزىلعان وپەراتسيا ءساتتى ءوتتى», دەيدى ب.بايماحانوۆ.
الەمدىك ستاتيستيكادا مۇنداي وپەراتسيانىڭ 80 پايىزىندا ناۋقاس ءومىرىن قايتىس بولعانداردىڭ اعزاسى قۇتقارىپ تۇر. ال ءبىزدىڭ ەلىمىزدە كوبىنە جانى قىسىلعان ناۋقاسقا جاقىندارى كومەككە جەتەدى. بۇگىندە وبلىستاعى ترانسپلانتاتسيالانعان 85 ناۋقاستىڭ 82-سىنە ءوز تۋىسى دونور بولعان.
قىزىلوردا
