قازاقستاندا الاتاۋ اتتى جاڭا قالا قۇرىلدى

قالانىڭ جالپى كولەمى – 88 مىڭ گەكتار, ال حالقىنىڭ سانى 52,7 مىڭ ادامدى قۇرايدى.

جاڭا قالانى قۇرۋ جول جەلىلەرى, ينجەنەرلىك, الەۋمەتتىك ينفراقۇرىلىم وبەكتىلەرىن مودەرنيزاتسيالاۋعا, جاڭا جۇمىس ورىندارىن اشۋعا, ينۆەستيتسيالاردى, تەحنولوگيالاردى, قوسىمشا قارجى اعىندارىن تارتۋعا, كاسىپكەرلىك بەلسەندىلىكتى دامىتۋعا, سالىق تۇسىمدەرىن ۇلعايتۋعا مۇمكىندىك بەرەدى. بۇل ءوز كەزەگىندە ءوڭىردىڭ ينۆەستيتسيالىق تارتىمدىلىعىن جانە ەكونوميكالىق تۇراقتىلىعىن جاقسارتۋعا ىقپال ەتەدى.

«سونىمەن قاتار ۇكىمەت اەا (ارنايى ەكونوميكالىق ايماق) اۋماعىن 30 مىڭ گەكتاردان 96,5 مىڭ گەكتارعا دەيىن كەڭەيتۋ مەن G4 City اەا-نى Alatau اەا-عا قايتا اتاۋ تۋرالى شەشىمدى ماقۇلدادى. وسىلايشا, الاتاۋ قالاسىنىڭ بارلىق اۋماعى جانە قوناەۆ قالاسىنىڭ ءبىر بولىگى اەا اۋماعىنا جاتقىزىلادى. ارنايى ەكونوميكالىق ايماق اۋماعىندا قىزمەتتىڭ باسىم تۇرلەرى بويىنشا ەقجج-نىڭ (ەكونوميكالىق قىزمەت تۇرلەرىنىڭ جالپى جىكتەۋىشى) 17 اتاۋى نەگىزىندە 110 مىڭ جاڭا جۇمىس ورنىن قۇرا وتىرىپ, جالپى سوماسى 12,5 ترلن تەڭگەگە 170-تەن استام جوبانى ورنالاستىرۋ كوزدەلىپ وتىر», دەلىنگەن حابارلامادا.

بولجامدى مالىمەتتەرگە سايكەس, اەا وبەكتىلەرى جوبالىق قۋاتىنا شىققاننان كەيىن بۇكىل كەزەڭدەگى باعالانعان جيىنتىق ۇلەسى 47,3 ترلن تەڭگەنى, ونىڭ ىشىندە مۋلتيپليكاتيۆتىك اسەرى 17 ترلن تەڭگەنى قۇرايدى. ايتارلىعى, مەملەكەتتىك ينۆەستيتسيانىڭ ءاربىر 1 تەڭگەسىنە 3,8 تەڭگە جەكە ينۆەستيتسيا تارتىلادى.