بۇل تۋرالى پرەزيدەنتتىڭ كەڭەسشىسى ءارى ءباسپاسوز حاتشىسى بەرىك ءۋالي حابارلادى. «پرەزيدەنت قاسىم-جومارت توقاەۆ داڭقتى تەننيسشى, ۋيمبلدون ءتۋرنيرىنىڭ چەمپيونى ەلەنا رىباكينانى اۋستراليادا وتكەن بەدەلدى جارىستاعى سەنىمدى جەڭىسىمەن قۇتتىقتاپ, جاڭا بەلەستەردى باعىندىرا بەرۋىنە تىلەكتەستىك ءبىلدىردى», دەپ جازدى ب.ءۋالي Facebook-تەگى پاراقشاسىندا.
ەلەنا رىباكينا اتالعان ءتۋرنيردىڭ جەڭىمپازى بولعانشا WTA رەيتينگىندە 4-ورىندا تۇرعان ەدى. ءسويتىپ, فينالعا دەيىن سۇرىنبەي جەتكەن ول باس جۇلدەگە الەمنىڭ ەكىنشى راكەتكاسى بەلارۋستىق ارينا سوبولەنكومەن تالاستى. بىراق فينال جۇرت كۇتكەندەي اسا تارتىستى بولمادى. ەلەنانىڭ ەرەكشە قارقىنىنا ارىنى قاتتى ارينانىڭ ءوزى توتەپ بەرە المادى. كۇنى كەشە كوش باسىنان كورىنىپ جۇرگەن ارينا العاشقى سەتتە-اق ەلەنادان ءبىر گەيم الا الماي, پۇشايمان كۇش كەشتى. ءسويتىپ, ءبىرىنشى پارتيادا 6:0 ەسەبى تىركەلدى. ال ەكىنشى سەتتە سوبولەنكو ءۇش گەيم جەڭۋگە عانا شاماسى كەلدى. وسىلايشا, رىباكينا 6:3 ەسەبىمەن جەڭىسكە جەتتى. ءبىر ساعاتتان اسا ۋاقىتقا سوزىلعان ماتچتا ەلەنا 7 ەيس جاساپ, 7 برەيك-پوينتتىڭ بەسەۋىن ۇپايعا اينالدىرا الدى. ال ارينا 3 ەيس, 1 برەيكپەن شەكتەلدى.
بۇل بريسبەندە وتانداسىمىز 220 مىڭ دوللار تابىس تاۋىپ, 500 ۇپايدى قورجىنىنا سالدى. وسى جەڭىسىنەن كەيىن ەلەنا تىلەۋلەس بولىپ, ءوزىن قولداعان بارشا جانكۇيەرگە ريزاشىلىعىن ءبىلدىردى. «بارشاڭىزعا, اسىرەسە وتانداستارىما مىڭ العىس. سىزدەردىڭ حابارلامالارىڭىزدى وقۋ, الەمنىڭ ءتۇرلى ەلدەرىندە مىنبەلەردەن جانكۇيەرلەرىمدى كورۋ ماعان ەرەكشە قۋانىش سىيلايدى», دەپ جازدى رىباكينا Instagram جەلىسىندەگى پاراقشاسىندا.
بۇدان كەيىن ە.رىباكينا 8-13 قاڭتار ارالىعىندا وتەتىن ادەلايدە (اۋستراليا) WTA 500 تۋرنيرىندە ونەر كورسەتەدى. سودان سوڭ ۇلكەن دۋلىعا باسەكەسى – Australian Open-دە باق سىنايدى.
