ماۋلەن اشىمباەۆ اتاپ وتكەندەي, پرەزيدەنت قاسىم-جومارت توقاەۆتىڭ باستاماسىمەن جۇزەگە اسىپ جاتقان رەفورمالاردى زاڭنامالىق قامتاماسىز ەتۋ جانە وڭىرلەردى دامىتۋعا جاردەمدەسۋ – سەناتتىڭ ماسليحاتتارمەن بىرلەسكەن جۇمىسىنداعى نەگىزگى باعىتتار. وسى ورايدا سەناتورلار وسى جىلدى دا ءداستۇر بويىنشا وبلىستار مەن اۋدانداردىڭ تۇرعىندارىمەن كەزدەسۋدەن باستادى. وڭىرلەردى دامىتۋ پەرسپەكتيۆالارىن تالقىلاۋ جانە مۇنداعى وزەكتى ماسەلەلەردى شەشۋ – شارالاردىڭ نەگىزگى ماقساتى بولىپ وتىر.
م.اشىمباەۆ اتىراۋ وبلىسىنىڭ تۇرعىندارىمەن كەزدەسۋ بارىسىندا مەملەكەت باسشىسىنىڭ «Egemen Qazaqstan» گازەتىنە بەرگەن سۇحباتىندا بەلگىلەنگەن مىندەتتەرگە نازار اۋدارىپ, بارلىق وتانداسىمىزدى ولاردى ىسكە اسىرۋ توڭىرەگىندە كۇش بىرىكتىرۋگە شاقىردى.
«پرەزيدەنت قاسىم-جومارت توقاەۆ سۇحباتىندا دەموكراتيالىق رەفورمالاردىڭ جۇيەلى عانا ەمەس, ەشقاشان كەرى قايتپايتىن تۇبەگەيلى سيپاتقا يە بولعانىن قاداپ ايتتى. جالپى, وتكەن جىلى ازاماتتارىمىزدىڭ كونستيتۋتسيالىق قۇقىعىنىڭ قورعالۋىنا كەپىل بولاتىن جوعارعى ورگان – كونستيتۋتسيالىق سوت جۇمىسىن باستادى. العاش رەت ازاماتتارىمىز اۋدان جانە وبلىستىق ماڭىزى بار قالا اكىمدەرىن تىكەلەي سايلادى. وسى جانە وزگە دە جەتىستىكتەر مەن باستامالار بيىل دا جوعارى كورسەتكىشتەرگە قول جەتكىزۋىمىزگە بەرىك نەگىز بولادى دەپ سەنەمىز. جالپى, بۇگىندە ەلىمىزدىڭ الدىندا اۋقىمدى ماقساتتار تۇر. ول ماقساتتارعا بىرلەسىپ ارەكەت ەتكەندە عانا جەتەتىنىمىز ءسوزسىز», دەپ اتاپ ءوتتى سەنات توراعاسى.
سەنات پەن ءماسليحاتتاردىڭ ءوزارا ءىس-قيمىلىنىڭ ماڭىزدى باعىتى – زاڭداردىڭ, ۇلتتىق باعدارلامالار مەن جوبالاردى وڭىرلەردە ىسكە اسىرۋ ساپاسىنا مونيتورينگ جۇرگىزۋ. پالاتا توراعاسىنىڭ پىكىرىنشە, جەرگىلىكتى جەرلەردە پروبلەمالار انىقتالعان جاعدايدا قالالار مەن اۋىلداردىڭ ەرەكشەلىكتەرىن مىندەتتى تۇردە ەسكەرە وتىرىپ, بارلىق دەڭگەيدەگى دەپۋتاتتاردىڭ بەلسەندى بىرلەسكەن جۇمىسى قاجەت بولادى. م.اشىمباەۆ وسىعان بايلانىستى ءوڭىردىڭ الەۋەتىن تولىق اشۋ مەن دەپۋتاتتاردىڭ وسى باعىتتاعى كۇش-جىگەرىن بىرىكتىرۋدىڭ ماڭىزدىلىعىن اتاپ ءوتتى.
«اتىراۋ وبلىسى شەتەل ينۆەستيتسيالارىن تارتۋ بويىنشا ەلىمىزدە كوش باستاپ تۇر. ونەركاسىپ ءونىمىنىڭ كولەمى دە دايەكتى تۇردە ۇلعايىپ كەلەدى. ايماقتاعى شاعىن جانە ورتا كاسىپكەرلىك سۋبەكتىلەرى سانىنىڭ ءوسۋى دە قۋانتادى. دەگەنمەن ايماقتا جەتىستىكتەرمەن قوسا, شەشىمىن كۇتكەن ماسەلەلەر دە جوق ەمەس. ولاردىڭ قاتارىندا تۇرعىنداردى ەكولوگيا, ونىڭ ىشىندە اۋانىڭ لاستانۋى جانە سۋ ماسەلەسى الاڭداتاتىنىن بىلەمىز. ينجەنەرلىك جانە ەنەرگەتيكالىق ينفراقۇرىلىمدى جاڭعىرتۋ ماسەلەسى دە وزەكتى. وڭىرلەردەگى ماسەلەلەردى شەشۋگە سەنات تاراپىنان جۇيەلى قولداۋ كورسەتۋ – نەگىزگى مىندەتتەردىڭ ءبىرى. ءبىز ءوز تاراپىمىزدان جانە باسقا دا ارىپتەستەرىمىزبەن بىرگە وبلىستىڭ وزەكتى ماسەلەلەرىنىڭ شەشىلۋىنە ءتيىستى كومەك كورسەتەتىن بولامىز», دەدى م.اشىمباەۆ كەزدەسۋگە قاتىسۋشىلارعا ارناعان سوزىندە. ول سونداي-اق ء«وڭىر» دەپۋتاتتىق توبىنىڭ جانە ماسليحاتتارمەن ءوزارا ءىس-قيمىل جونىندەگى كەڭەستىڭ الداعى وتىرىستارىنىڭ كۇن تارتىبىنە توقتالدى.
سەناتورلار ءوڭىردىڭ دارىندى جاستارىمەن كەزدەسۋ بارىسىندا ايماقتى ودان ءارى دامىتۋ كەلەشەگىن, زاڭ شىعارۋدى جەتىلدىرۋ جانە جاڭا جوبالاردى ىسكە اسىرۋ جونىندەگى يدەيالاردى تالقىلادى. سەنات توراعاسى وسىعان بايلانىستى قازاقستاندا جاستاردى قولداۋ مەملەكەتتىك ساياساتتىڭ باسىم باعىتى بولىپ تابىلاتىنىن اتاپ ءوتتى.
«قازىرگى تاڭدا ەلىمىزدە وزدەرىڭىز سياقتى بەلسەندى, بىلىكتى جاستارعا جۇيەلى تۇردە قولداۋ كورسەتىلىپ كەلەدى. جاستاردىڭ ساپالى ءبىلىم الۋىنا جاعداي جاسالىپ وتىر. سىزدەردىڭ وبلىستارىڭىزدا «اتىراۋ جاستارى» يپوتەكالىق باعدارلاماسى قولعا الىنعالى 100-گە تارتا جاس ازامات باسپانالى بولعانىن بىلەمىز. بۇل رەتتە پرەزيدەنتتىك جاستار كادرلىق رەزەرۆىن ايرىقشا اتاپ وتكەن ءجون. ءماجىلىس جانە ءماسليحات دەپۋتاتتارىنىڭ قاتارىندا جاستاردىڭ بولۋىن قامتاماسىز ەتەتىن زاڭنامالىق نورمالار دا قابىلدانعانىن بىلەسىزدەر. سەنات تاراپىنان دا بەلسەندى جاستاردى قولداۋعا ارنالعان جوبالار ىسكە اسىرىلىپ كەلەدى. وسكەلەڭ ۇرپاققا ۇلكەن سەنىم مەن جاۋاپكەرشىلىك جۇكتەلەتىنىن ايتقىم كەلەدى. جاستارىمىزدىڭ بويىنداعى سونداي دۇرىس ۇستانىمدار مەملەكەتىمىزدىڭ دامۋىنا تىڭ سەرپىن بەرەتىنى ءسوزسىز», دەپ اتاپ ءوتتى م.اشىمباەۆ. ول سونىمەن قاتار سەنات جانىنداعى تالداۋ مەكتەبى مەن جاس ساراپشىلار كلۋبىنىڭ جۇمىسى تۋرالى ايتا كەلىپ, بۇل جوبالار جاستاردىڭ الەۋەتىن اشۋعا جانە ولاردى پالاتانىڭ زاڭ شىعارۋ جۇمىسىنا تارتۋعا باعىتتالعانىن جەتكىزدى.
سەنات توراعاسى ۇلتتىق قۇندىلىقتاردى ودان ءارى ىلگەرىلەتۋدىڭ, ۇزدىكسىز ءبىلىم الۋدىڭ جانە كاسىبي ءوسۋ ءۇشىن جاڭا داعدىلاردى يگەرۋدىڭ ماڭىزدىلىعى تۋرالى دا ايتتى. م.اشىمباەۆ اتىراۋ وبلىسىنىڭ كورنەكتى تۇلعالارىن مىسالعا كەلتىردى. ولاردىڭ قاتارىندا ءابۋ سارسەنباەۆ پەن حيۋاز دوسپانوۆا, سالىق زيمانوۆ پەن زەينوللا قابدولوۆ, فاريزا وڭعارسىنوۆا مەن جۇمەكەن ناجىمەدەنوۆ بار. ءبىرتۋار تۇلعالاردىڭ دارىنىمەن, ەرجۇرەكتىلىگىمەن جانە وجەتتىلىگىمەن تانىمال بولعانىن اتاپ ءوتتى.
سەنات دەپۋتاتتارى سونىمەن قاتار مۇگەدەكتىگى بار بالالارعا ارنالعان «اينا-Like» ورتالىعىنداعى تاربيەلەنۋشىلەرىمەن, «APEC Petro Technic» جوعارى كوللەدجىنىڭ ۇجىمىمەن كەزدەستى, «Kazakhstan Petrochemical Industries Inc.» جشس جۇمىسشىلارىنىڭ قىزمەتىمەن جانە ەڭبەك جاعدايلارىمەن تانىستى. كەزدەسۋلەر كەزىندە وڭدەۋشى ونەركاسىپتى, ەكونوميكانىڭ جاڭا سالالارىن دامىتۋ جانە ينفراقۇرىلىمدىق جوبالاردى ىسكە اسىرۋ ماسەلەلەرى تالقىلاندى.
