استانا قالاسى پد قىزمەتكەرلەرى ۋاقىتشا ۇستاۋ يزولياتورىنا پاتەر ۇرىلارىن قاماۋعا الدى. ەلوردا تۇرعىنى جاڭا جىل قارساڭىندا بەلگىسىز ادامدار ەكى قاباتتى كوتتەدجگە كىرىپ, سەيفتەن جاسىرىن تۇردە 1000 ەۋرو, 1500 اقش دوللارى, گاۋھار تاستارى بار التىن بۇيىمدار ۇرلانعانى جونىندە پوليتسياعا جۇگىنگەن. كەلتىرىلگەن زالالدىڭ جالپى سوماسى شامامەن 10 ملن تەڭگەنى قۇراعان.
جەدەل-ىزدەستىرۋ ءىس-شارالارىن وتكىزۋ بارىسىندا «نۇرا» اۋدانىنىڭ پوليتسيا قىزمەتكەرلەرى پاتەر ۇرىلارىنىڭ توبىن ۇستادى. كۇدىكتىلەر – وبلىستاردىڭ ءبىرىنىڭ 26 جانە 28 جاستاعى ەكى ازاماتى. ولار ەلوردا ماڭىنداعى اۋىلدا تۇرىپ, ەش جەردە جۇمىس ىستەمەگەنى بەلگىلى بولعان.
سونداي-اق ولاردىڭ بۇرىن ۇرلىق پەن توناۋ ءۇشىن بىرنەشە رەت قىلمىستىق جاۋاپكەرشىلىككە تارتىلعانى دا انىقتالعان.
كۇدىكتىلەر قالا ءىشىن تاكسيمەن ءجۇرىپ ارالاعان. ءسويتىپ ەر ادامدار استانالىق جابىرلەنۋشىنىڭ پاتەرىنە توردى بۇزىپ, پلاستيكالىق تەرەزەنى مايىستىرىپ كىرگەن. ولار پاتەردىڭ يەلەرى جوق ەكەنىنە الدىن الا كوز جەتكىزگەن.
جاۋاپ الۋ بارىسىندا اتالعان ازاماتتار مويىنداۋ ايعاقتارىن بەرىپ, زاتتاي دالەلدەمەلەر الىندى. ۇرىلار اقشانىڭ ءبىر بولىگىن جاڭاجىلدىق مەرەكەلەردى اتاپ وتۋگە جۇمساپ تا ۇلگەرگەن.
قازىرگى كەزدە كۇدىكتىلەردىڭ ەلوردا اۋماعىندا بۇرىن جاسالعان وسىنداي باسقا دا قىلمىسقا قاتىسى بار-جوعى تەكسەرىلىپ جاتىر.
