«ۋنيۆەرسيتەتتە 2020 جىل ىشىندە مەملەكەتتىك ساتىپ الۋدى جۇزەگە اسىرۋ اياسىندا بيۋدجەت قاراجاتىن جىمقىرۋ فاكتىلەرى جاسالعان. 2020 جىلى ۋنيۆەرسيتەت پەن «Ai-Tall» جشس اراسىندا (5,8 ملن تەڭگە سوماسىنا «امياك سەليتراسىن» ساتىپ الۋ بويىنشا), «كەمالحانسترويەليت» جشس-مەن (15,8 ملن تەڭگە سوماسىنا «امموفوس» ساتىپ الۋ جانە جەتكىزۋ بويىنشا) جانە «قازترايدسناب» جشس-مەن (22 ملن تەڭگە سوماسىنا «قانت جۇگەرىسى» تۇقىمىن ساتىپ الۋ جانە جەتكىزۋ بويىنشا) كەلىسىمشارت جاسالعان. جوعارىدا كورسەتىلگەن شارتتار بويىنشا تۇقىم سەبۋ جانە سەبۋ ورىندارىن وڭدەۋدى راستاۋ اكتىسىن جالعان جاساۋ فاكتىلەرى انىقتالدى», دەلىنگەن قازۇازۋ ءباسپاسوز قىزمەتى تاراتقان حابارلامادا.
ايتا كەتسەك, «دارميراۋديت» جشس جۇرگىزگەن قورىتىندىعا سايكەس ۋنيۆەرسيتەت مەملەكەتكە 43,8 ملن تەڭگە كولەمىندە زالال كەلتىردى.
سونىمەن قاتار ۋنيۆەرسيتەتتە تابىس تابۋ ماقساتىندا جەكە كاسىپكەرلەرگە جالعا بەرىلەتىن بىرقاتار تۇرعىن ەمەس كوممەرتسيالىق ءۇي-جايلار (دۇكەندەر, اسحانالار جانە ت.ب.) بار ەكەنى انىقتالدى.
«ماسەلەن, 2012-2022 جىلدار ارالىعىندا دانا جك كوممەرتسيالىق ءۇي-جايلاردى (دۇكەن ءۇشىن) تۇراقتى تۇردە جالعا العان, بۇل رەتتە اي سايىنعى جالداۋ اقىسى ۋنيۆەرسيتەتتىڭ بۇرىنعى قىزمەتكەرىنە قولما-قول اقشامەن جانە ءموبيلدى اۋدارىمدارمەن بەرىلىپ وتىرعان, الايدا ول ۋنيۆەرسيتەتتىڭ ەسەپ شوتىنا تۇسپەگەن. بۇل فاكتىلەر قر قك 190-بابى 3-بولىگى 1-تارماعى جانە قر قك 189-بابى 4-بولىگى 2-تارماعىندا كوزدەلگەن قىلمىستىق قۇقىق بۇزۋشىلىق جاساۋ فاكتىسى بويىنشا سدتبر-ىندە تىركەلگەن», دەلىنگەن رەسمي حابارلامادا.
ۋنيۆەرسيتەتتىڭ جاڭا باسشىلىعى 2023 جىلدان باستاپ زاڭسىز شىعارىلعان اكتيۆتەردى, ونىڭ ىشىندە جوو جاتاقحانالارى مەن وقۋ اۋديتوريالارىن قايتارۋ بويىنشا بارلىق قاجەتتى شارالاردى قابىلداعانى تۋرالى قوسا ايتىلدى.
