جوبانىڭ نەگىزگى ماقساتى – قوعامدا سىبايلاس جەمقورلىقتىڭ بارلىق كورىنىسىنە توزبەۋشىلىك ورتاسىن قالىپتاستىرۋ جانە بۇل پروتسەسسكە ەل ازاماتتارىن جاپپاي تارتۋ.
اتالمىش جوبا مەملەكەت باسشىسى اتاپ وتكەن «ادال ازامات» تۇجىرىمداماسىن جۇزەگە اسىرۋ مەن قوعامداعى زاڭ جانە قۇقىقتىق ءتارتىپ ۇستەمدىگىن قالىپتاستىرۋداعى ناقتى قادامداردىڭ ءبىرى بولماق.
ء«بىز قۇقىق بۇزۋشىلىق جاساۋ, پارا بەرۋ نەمەسە السىزگە قولىن كوتەرۋ تۋرالى ويدىڭ ءوزىن ايىپتايتىن قوعامعا اينالۋىمىز كەرەك. بۇل قيىن جۇمىس, بىراق بۇل جولدى ەڭسەرۋىمىز قاجەت. «ادىلدىك جولى» كومانداسى 2 جىل بويى بەلسەندى جۇمىس ىستەپ, قوعامدا قۇقىقتىق ساۋاتتىلىق بويىنشا ولقىلىقتار بار ەكەنىنە كوز جەتكىزدى. وسى ۋاقىت ارالىعىندا adildik.kz سايتى مەن 1463 بايلانىس ورتالىعىنا تۇسكەن 8 مىڭعا جۋىق ازاماتتىڭ ءوتىنىشىن قاراستىرا كەلە, حالىقتىڭ زاڭ مەن ەرەجە تۋرالى بىلىمدەرىن ارتتىرۋ ارقىلى كوپ ماسەلەلەردى قىلمىسقا اپارماي شەشۋگە بولاتىنىنا سەنىمدىمىز», دەپ اتاپ ءوتتى «ادىلدىك جولى» رقب اتقارۋشى ديرەكتورى ديدار سماعۇلوۆ.
اتاپ ايتقاندا, «ادىلدىك جولى» بىرلەستىگى ۇيىمداستىرعان جۇمىستىڭ ارقاسىندا 1206 تۇلعا ءتۇرلى زاڭ بۇزۋشىلىقتارى ءۇشىن اكىمشىلىك جاۋاپكەرشىلىككە تارتىلىپ, ايىپپۇل تولەپ, 800 ملن تەڭگەدەن استام قاراجات بيۋدجەتكە قايتارىلىپ, 76 قىلمىستىق ءىس قوزعالعان.
«زاڭ ۇستەمدىگى» جوباسىنا قازاقستاننىڭ كەز كەلگەن ازاماتى قاتىسا الادى. ءاربىر تۇرعىن سىبايلاس جەمقورلىق فاكتىلەرى (كەز كەلگەن سالاداعى) مەن باسقا دا ماسەلەلەرىن 1463 Call-ورتالىعى نەمەسە Adildik.kz سايتى ارقىلى حابارلاپ, ءوز ساۋالدارى بويىنشا قۇقىقتىق كەڭەستەر مەن كومەك الا الادى.
