مەملەكەت دامۋىنا سەرپىن بەرەتىن نەگىزگى سالالاردى ورىستەتۋدىڭ كەشەندى باعىتتارى قوزعالعان سۇحباتتاعى ۇلتتىق يدەولوگيا, قوعامنىڭ قۇندىلىقتار جۇيەسىن جاڭعىرتۋ, ۇلتتىڭ جاڭا ساپاسىن قالىپتاستىرۋ سەكىلدى رۋحاني تاقىرىپتار ەلدىڭ مادەني ومىرىنە قاتىستى ماڭىزدى ماسەلەلەردى ارقاۋ ەتۋىمەن قۇندى.
قاسىم-جومارت كەمەل ۇلى ءوز سوزىندە: ء«بىز وتكەندى اڭساۋمەن ءومىر سۇرمەۋىمىز كەرەك. كەرىسىنشە, كەلەشەگىمىزدى كەمەل ەتۋگە ۇمتىلىپ, ۇلتتىڭ ۇلىلىعىن ناقتى ىسپەن دالەلدەۋگە ءتيىسپىز. دۇنيەتانىمىمىزعا جات مادەنيەتتەرگە كوزسىز ەلىكتەۋدەن, جالعان پاتريوتيزمنەن, داڭعويلىق پەن داراقىلىقتان ساقتانۋىمىز كەرەك. حالقىمىزدىڭ بويىنداعى كەمشىلىكتەرگە كوز جۇما قاراماي, ودان ارىلۋىمىز قاجەت. مۇنىڭ ءبارى كۇن سايىن قۇبىلعان تۇرلاۋسىز زاماندا ءومىر ءسۇرىپ جاتقان قازاقستاننىڭ كەلەشەگى ءۇشىن ايرىقشا ماڭىزدى», دەپ اتاپ ءوتتى.
راسىندا, ەلدىكتىڭ ەڭسەلەنۋى, قاسيەت-قالىبىمىزدىڭ ساقتالۋى ءبىزدىڭ رۋحاني-مادەني ومىرىمىزگە تىكەلەي بايلانىستى. ۇرپاق ۇلتتىق قۇندىلىقتاردى سىڭىرە وتىرىپ, ۋاقىت كوشىنەن قالماۋى كەرەك. جاڭا مۇمكىندىكتەر ءداۋىرى كوپتەگەن يگىلىكتەرگە جول اشقانىمەن, وسكەلەڭ ۇرپاقتى ب ۇلىڭعىر باعىتقا قاراي تارتىپ كەتپەۋىنە اسا ءمان بەرگەن ابزال. اقپاراتتىق تەحنولوگيالاردى جەتىك مەڭگەرگەن, زامان كوشىنە ىلەسە وتىرىپ, وتكەننىڭ ونەگەسىن جادىنا توقىعان جاستارىمىز مەملەكەت ەرتەڭى. پرەزيدەنتىمىز, جاساندىلىق پەن جالعاندىق ورىن العان جەردە جاعىمسىز ارەكەتتەر بوي كوتەرەتىنىن العا تارتىپ, ونەر مەن مادەنيەت وكىلدەرىنە, رۋحاني سالانىڭ قىزمەتكەرلەرىنە ماڭىزدى وي تاستاپ وتىر.
ءوزىمىز قىزمەت ەتەتىن تاعىلىم ورداسىندا وسى ماسەلەنى ءاردايىم نازاردا ۇستاۋعا تىرىسامىز. مۋزەي قابىرعاسىندا وتەتىن سان الۋان شارالاردىڭ تۇپكى وزەگى ۇلتتىق مادەنيەتىمىزدىڭ, تاريحىمىزدىڭ, ۇرپاق جادىندا زەردەلى كوزقاراسپەن قاتتالۋىنا باسىمدىق بەرىلەدى. سۇحباتتا ايتىلعانداي, ءبىز كوشكە ىلەسەتىن ەمەس, سول كوشتى باستايتىن ەلدەردىڭ قاتارىندا بولۋىمىز كەرەك. ونىڭ العىشارتى – ادالدىق. ادىلەتتى قازاقستاندى ادال ازاماتتار, پايىم-پاراساتى جوعارى, ۇلتىنا جانى اشيتىن جاندار قالىپتاستىرادى.
پرەزيدەنت سۇحباتىندا ۇلى دالاداعى كوشپەندىلەر وركەنيەتىنىڭ مۇراگەرى سانالاتىن باۋىرلاس حالىقتاردىڭ مادەني-گۋمانيتارلىق بايلانىسىن ارتتىرۋدىڭ ماڭىزدىلىعى ايتىلدى. تاريحى تەڭىز, تامىرى ەگىز تۇركى حالىقتارىنا ورتاق قۇندىلىقتار باۋىرلاس ەلدەردى ءبىر-بىرىنە جاقىنداتاتىن, ديپلوماتيالىق قارىم-قاتىناستاردى نىعايتاتىن قۋاتتى كۇش. وسى ورايدا, باۋىرلاس حالىقتاردىڭ رۋحاني مۇرالارىن, تاريحي جادىگەرلەرىن ناسيحاتتاۋ, كوشپەلى كورمەلەر ۇيىمداستىرۋدىڭ ماڭىزى زور. ەلىمىزدە وتەتىن دۇنيەجۇزىلىك كوشپەندىلەر ويىنى مەملەكەت باسشىسى اتاپ وتكەندەي, مەملەكەتىمىز ءۇشىن تاريحي وقيعا بولماق.
سۇحباتتاعى: «ەل تاريحىندا ەرەكشە ورنى بار تۇلعالارعا قۇرمەت كورسەتۋ ءداستۇرى ەلىمىزدىڭ جالپىۇلتتىق بىرەگەيلىگىن نىعايتا تۇسۋگە زور سەپتىگىن تيگىزەدى. بيىل ايگىلى عالىم قانىش ساتباەۆتىڭ تۋعانىنا 125, داڭقتى باتىرلار ساعادات نۇرماعامبەتوۆ پەن راقىمجان قوشقارباەۆتىڭ تۋعانىنا 100 جىل تولادى. سونىمەن قاتار تاريحشىلاردىڭ پايىمداۋىنشا, جوشى ۇلىسىنىڭ ىرگەسى قالانعانىنا – 800 جىل. مەملەكەتتىلىگىمىزدىڭ تامىرى تىم تەرەڭدە جاتقانىن ايگىلەيتىن وسى ايتۋلى داتاعا وراي كەڭ اۋقىمدى زەرتتەۋلەر قولعا الىنادى» دەگەن جولدار عىلىمي قوعامداستىقتىڭ الدىنا زور جاۋاپكەرشىلىك جۇكتەپ وتىر. اتالعان شارالار تۇعىرلى تۇلعالاردىڭ رۋحىن اسقاقتاتىپ قانا قويماي, ولاردىڭ تەلەگەي-تەڭىز مۇراسىن, ونەگەسىن, ءجۇرىپ وتكەن جولىن كەيىنگىگە ۇلگى ەتۋىمەن قۇندى. ەڭ باستىسى بۇل باستامالار ۇلتتىق عىلىمعا قوسىلعان ايشىقتى مۇرا بولماق.
قورىتا ايتقاندا, حالىق ءۇشىن اسا ماڭىزدى الەۋمەتتىك-ەكونوميكالىق سالانىڭ باستى باعدارلارى ايقىندالعان, ىشكى جانە سىرتقى ساياساتتاعى وتكىر ماسەلەلەر قامتىلعان, ەل بىرلىگىنە كەرى اسەرىن تيگىزەتىن الىپقاشپا اڭگىمەلەرگە ۇيلەسىمدى نۇكتە قويعان پرەزيدەنت سۇحباتى الداعى ۋاقىتتاعى باعىت-باعدارىمىزعا سەرپىن بەرەدى دەپ ەسەپتەيمىن.
راشيدا حاريپوۆا,
قر مەملەكەتتىك ورتالىق مۋزەيىنىڭ ديرەكتورى
