مەملەكەت باسشىسى بيىلعى ۇلتتىق قۇرىلتاي كوكتەمدە وتەتىنىن ايتتى. يدەولوگيا سالاسىنداعى كوپتەگەن ماسەلەنىڭ شەشىمىن تالقىلايتىن ۇلتتىق قۇرىلتاي بۇگىندە سىندارلى ديالوگ پلاتفورماسىنا اينالعاندىعى قۋانتادى.
پرەزيدەنت تۇرمىستىق زورلىق-زومبىلىققا قاتىستى جازانى قاتاڭداتۋدى قولدايتىنىن ايتتى. بىلتىر وتباسىنداعى تۇرمىستىق قۇقىق بۇزۋشىلىقپەن كۇرەس تاسىلدەرى جەتىلدىرىلدى, مۇنداي قىلمىستار ءۇشىن اكىمشىلىك جانە قىلمىستىق جاۋاپكەرشىلىك ەداۋىر كۇشەيتىلدى.
وتباسىلىق زورلىق-زومبىلىققا قاتىستى قىلمىستاردىڭ الدىن الۋ ءۇشىن ناقتى شارالار قولعا الىندى. ايەلدەر مەن بالالارعا جاسالعان زورلىق-زومبىلىققا قاتىستى قىلمىستاردى تەرگەۋمەن ەندى ايەل تەرگەۋشىلەر اينالىسادى. ىشكى ىستەر ورگاندارىندا ايەلدەردى زورلىق-زومبىلىقتان قورعاۋمەن شۇعىلداناتىن مامانداردىڭ شتاتى قالپىنا كەلتىرىلىپ, ولاردىڭ قۇزىرەتى كۇشەيتىلدى. ەندى قوعامدا وزبىرلىق پەن زورلىق-زومبىلىقتىڭ كەز كەلگەن ءتۇرىن ايىپتايتىن قۇقىقتىق سانا-سەزىم قالىپتاستىرۋ كەرەك.
مەملەكەت باسشىسى ەلىمىزدە «زاڭ مەن ءتارتىپ» قاعيداتىنىڭ ورنىعا تۇسكەنىن قالايتىنىن ايتتى. سونداي-اق قوعام نورمالار مەن ەرەجەلەردىڭ جانە جالپى ادامزاتقا ورتاق قۇندىلىقتاردىڭ اياقاستى بولۋىن قاتاڭ ايىپتاپ, ونىمەن بىرلەسە كۇرەسۋى كەرەك ەكەنىن ايتتى.
وزدەرىڭىزگە بەلگىلى, ءماجىلىستىڭ دەپۋتاتتارى مەملەكەت باسشىسى قاسىم-جومارت توقاەۆتىڭ حالىققا جولداۋىن جۇزەگە اسىرۋ اياسىندا تۇرمىستىق زورلىق-زومبىلىققا قارسى كۇرەستىڭ جاڭا ءارى ءتيىمدى شارالارىن قاراستىراتىن زاڭ جوباسىن ازىرلەگەن بولاتىن. قۇجاتتا وتباسى جاعدايىندا ۇرىپ-سوعۋ نەمەسە باسقا دا زورلىق-زومبىلىق ارەكەتتەرى ءۇشىن قىلمىستىق جاۋاپكەرشىلىكتى ەنگىزۋ كوزدەلگەن.
سونداي-اق ايەلدەردىڭ دەنساۋلىعىنا جەڭىل زيان كەلتىرىلسە دە قىلمىستىق جاۋاپكەرشىلىككە تارتىلادى. وتباسىلىق زورلىق-زومبىلىق ورىن العان جاعدايدا اگرەسسوردى ۇيدەن شىعارۋ قاراستىرىلعان. قازىر كەرىسىنشە جابىرلەنۋشى ايەل مەن بالا ۇيدەن كەتەدى. حاراسسمەنت ءۇشىن جاۋاپكەرشىلىككە تارتىلادى. پەدوفيليا ءۇشىن ءومىر بويىنا باس بوستاندىعىنان ايىرۋ, باسقا بالامالى جازا قابىلداماۋ كوزدەلگەن. بۇعان دەيىن پەدوفيليا ءۇشىن سوتتالىپ, كەيىن بوستاندىققا شىققاندارعا سوتتىلىعى جويىلعانىنا قاراماستان ءومىر بويىنا اكىمشىلىك قاداعالاۋدى ەنگىزۋ ۇسىنىلادى. ولار قۇقىق قورعاۋ ورگاندارىنىڭ باقىلاۋىندا بولۋى شارت.
ءماجىلىس زاڭ شىعارۋشى ورگان رەتىندە تۇرمىستىق زورلىق-زومبىلىققا قارسى كۇرەستە زاڭنامانى جەتىلدىرۋدە ازاماتتىق قوعام وكىلدەرىمەن بىرلەسە وتىرىپ, پرەزيدەنتتىڭ تاپسىرمالارىن ورىنداۋدا ءتيىمدى جۇمىستار جاساۋعا ءازىر. دەگەنمەن, قابىلدانعان زاڭ نورمالارىن ورىنداتۋدى قوعام بولىپ كۇشەيتۋىمىز دە قاجەت. زاڭ مەن ءتارتىپ قاعيداتى قازاقستان قوعامىنىڭ يدەولوگيالىق جانە ساياسي تەمىرقازىعىنا اينالۋعا ءتيىس دەپ ويلايمىن.
تۇرمىستىق زورلىق-زومبىلىق ماسەلەسىن شەشۋ قوعامنىڭ بارلىق دەڭگەيىندە بىرلەسكەن كۇش-جىگەردى قاجەت ەتەدى. باستى مىندەتىمىز – كۇشتى زاڭدار قابىلداۋ, زارداپ شەككەندەرگە قولداۋ كورسەتۋ ءۇشىن جاعداي جاساۋ جانە ەڭ نەگىزگىسى, وتباسىلىق زورلىق-زومبىلىقتىڭ كەز كەلگەن تۇرىنە مۇلدەم توزبەۋشىلىك ۇستانىمىن قالىپتاستىرۋدا قوعاممەن جۇمىس ىستەۋ.
جۇلدىز سۇلەيمەنوۆا,
ءماجىلىس دەپۋتاتى
