ءسوز جوق, قازاقستان جىلناماسىندا ساياسي رەفورمالار 2019 جىلى باستالعالى بەرى ەلىمىزدە ەلەۋلى وزگەرىستەر ورىن الىپ كەلەدى. سايلاۋ, ساياسي پارتيالار, پارلامەنت تۋرالى زاڭدارعا تىڭنان تۇرەن سالىندى. ساياسي جاڭعىرۋ ۇدەرىسى 2022 جىلى ەرەكشە ەكپىنمەن جالعاسىن تاپتى. قازاقستان كەرى قايتپايتىن تۇبەگەيلى سيپاتقا يە بولدى. وسى ارقىلى ۇلتتىڭ ساياسي سانا-سەزىمى تۇبەگەيلى وزگەردى. ۇلت قۇندىلىقتارىنا ەرەكشە ەكپىن بەرىلدى.
ء«بىزدىڭ بۇرىن كىم بولعانىمىزدان قازىر كىم ەكەنىمىز, ەڭ باستىسى, بولاشاقتا كىم بولاتىنىمىز الدەقايدا ماڭىزدى», دەي كەلە, ء«بىز وتكەنمەن ءومىر سۇرمەۋىمىز كەرەك. كەرىسىنشە, كەلەشەگىمىزدى كەمەل ەتۋگە ۇمتىلىپ, ۇلتتىڭ ۇلىلىعىن ناقتى ىسپەن دالەلدەۋگە ءتيىسپىز», دەپ ەل كەلەشەگى ءۇشىن ماڭىزدى ماسەلەلەرگە توقتالىپ, ەلىمىزدە ەڭبەكقورلىق پەن جاسامپازدىق جوعارى باعالانۋعا, بىلىمپازدىق پەن جاڭاشىلدىق سالتانات قۇرۋعا ءتيىس ەكەنىن تاعى دا تىلگە تيەك ەتتى. پرەزيدەنت وسى سوزدەرى ارقىلى ەل بولاشاعى جاستاردىڭ قولىندا ەكەنىن مەڭزەيدى. تاۋەلسىز ەل تىرەگى – ءبىلىمدى ۇرپاق دەسەك, جاڭا ءداۋىردىڭ كۇن تارتىبىندە تۇرعان نەگىزگى جانە باستى ماسەلە – ءبىلىم بەرۋ, عىلىمدى دامىتۋ. وركەنيەت بىتكەننىڭ وزەگى عىلىم, تاربيە ەكەندىگىنە ەشكىمنىڭ تالاسى جوق. وسى ورايدا ءبىزدىڭ ەڭ باستى مىندەتىمىز – ۇلتتىڭ تاريحىن, مادەنيەتىن, ءتىلىن قاستەرلەي بىلەتىن جانە ونى جالپى ازاماتتىق دەڭگەيدەگى رۋحاني قۇندىلىقتارعا ۇشتاستىرا بىلەتىن تۇلعا تاربيەلەۋ. باسەكەلىك قابىلەت دەگەنىمىز – ۇلتتىڭ وزگەلەردەن ۇتىمدى دۇنيە ۇسىنا الۋى. بۇل ماتەريالدىق ءونىم عانا ەمەس, سونىمەن بىرگە ءبىلىم, قىزمەت, زياتكەرلىك ءونىم نەمەسە ساپالى ەڭبەك رەسۋرستارى بولۋى مۇمكىن. قازىرگى تاڭدا جەكە ادام عانا ەمەس, تۇتاس حالىقتىڭ ءوزى باسەكەلىك قابىلەتىن ارتتىرسا عانا تابىسقا جەتۋگە مۇمكىندىك الادى. ال بارلىعىنىڭ باستاۋى بىلىمدە. مەملەكەتىمىزدى باسەكەلەستىككە قابىلەتتى ەلگە اينالدىرۋدا ساپالى ۇلت قالىپتاستىرۋ ماڭىزدى.
عىلىم-ءبىلىم جانە مادەني-گۋمانيتارلىق سالاداعى قارىم-قاتىناستى نىعايتۋعا ءاردايىم ايرىقشا ءمان بەرى لەدى. البەتتە, تاريح – ءبىزدىڭ جالپىۇلتتىق بىرەگەيلىگىمىزدىڭ ماڭىزدى بولىگى. بۇل رەتتە ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى كاسىبي جاعىنان باسەكەگە قابىلەتتى, ءوز ەلىنىڭ شىنايى پاتريوتتارىن تاربيەلەۋ باعىتىندا بەلسەندى ەڭبەك ەتىپ كەلەدى. ەۇۋ ازاماتتىق ۇستانىمى بيىك زياتكەر تۇلعانى قالىپتاستىرۋ ءۇشىن ۇلى ابايدىڭ «تولىق ادام» تۇجىرىمداماسىن نەگىزگە العان. تاربيە جۇمىسى «نۇرلى اقىل», «ىستىق قايرات», «جىلى جۇرەك» باعىتتارى بويىنشا جۇرگىزىلەدى.
كەيىنگى كەزدە جاڭا عىلىمي قۇرىلىمدار جاساقتالىپ, بۇرىنعى ينستيتۋتتار جاڭعىرتىلىپ جاتىر. سان عاسىرلىق تاريحىمىزدى زەرتتەۋ, تاريحي ادىلدىكتى قالپىنا كەلتىرۋگە العىشارتتار جاسالىندى.
زاماننىڭ اعىمى قاتتى. ءبىز كەز كەلگەن وزگەرىسكە بەيىمدەلۋىمىز كەرەك. پرەزيدەنت ايتقانداي, ءبىز كوشكە ىلەسەتىن ەمەس, سول كوشتى باستايتىن ەلدەردىڭ قاتارىندا بولعانىمىز شارت. جاقسىدان ۇيرەنىپ, جاماننان جيرەنە ءبىلۋىمىز قاجەت. ۇلتتىق قۇندىلىقتار دەگەندە, ادالدىق پەن جاناشىرلىق سەكىلدى ىزگى قاسيەتتەردى بويىنا سىڭىرگەن جاندى ادال ازامات دەپ ءجۇرمىز. ادىلەتتى قازاقستاندى ادال ازاماتتار قۇرادى. ال ادال ازامات دەگەنىمىز – ادال عالىم, ادال ۇستاز, ادال شاكىرت.
ەرلان سىدىقوۆ,
اكادەميك
