مەملەكەت باسشىسىنىڭ سان تاقىرىپتى قامتىعان سۇحباتى قوعامعا تاراعان نەگىزى جوق ءتۇرلى الىپقاشپا اڭگىمەنى پىشاق كەسكەندەي تىيىپ, ەل-جۇرتتىڭ الداعى كۇندەرگە دەگەن سەنىمىن بەكىتىپ بەردى. ەندى سۇحباتتىڭ ەرەكشەلىگىنە كەلسەك, بىرىنشىدەن, ونىڭ سىرتقى فورماسىنا توقتالايىق. اڭگىمەلەسۋ تۇرىندەگى فورماتقا ەلىمىزدىڭ باس گازەتى «ەگەمەن قازاقستاننىڭ» تاڭداپ الىنۋىن جۇرتشىلىق جىلى, ىلتيپاتپەن قابىلدادى. كوپشىلىك مۇنى ءداستۇرلى-كلاسسيكالىق ءباسپاسوزدىڭ ومىرشەڭدىگىنە ءارى مەملەكەتتىك تىلگە دەگەن قۇرمەت ەكەنىن ۇعىنىپ, الەۋمەتتىك جەلىدەگى جەل سوزدەرگە اۋەس ءتۇرلى اقپارات ارنالارىنىڭ باسىم بولىگى «اسىرەقىزىل تەز وڭار» ۋاقىتشا قۇبىلىس ەكەنىن اڭعارتتى. سۇحباتتىڭ ىشكى مازمۇنىن ايتساق, بىرىنشىدەن, اڭگىمەنىڭ اشىق, پراگماتيكالىق باعىتتا ءوربۋى دەر ەدىك. پافوس جوق, جۇرتتى ەشقانداي بوس ۋادەگە ەلىكتىرىپ, قۇرعاق ۇمىتكە ەمەكسىتۋ مۇلدەم بايقالمايدى. ءجۇرىپ كەلە جاتقان جولىمىزدىڭ دۇرىس ەكەنىنە, الدا كەزدەسەر كەدەرگىلەر مەن قيىندىقتاردى ەل بولىپ ەڭسەرە الاتىنىمىزعا كوز جەتكىزەدى. حالىق ءۇشىن ەڭ قاجەتتى الەۋمەتتىك-ەكونوميكالىق سالانىڭ باستى باعدارلارى ايقىندالعان, ىشكى جانە سىرتقى ساياساتتىڭ وزەكتى ماسەلەلەرى رەت-رەتىمەن تەكشەلەنىپ جەتكىزىلگەن. باستىسى, ەلدىڭ بىرلىگىنە كەسىرىن تيگىزەتىن سان ءتۇرلى «ولاي بولعان ەكەن, بۇلاي جاسالماقشى ەكەن» دەگەن سياقتى قاۋەسەتكە قۇرىلعان قاڭتار قاسىرەتى مەن قوسبيلىك تاقىرىبىنداعى تۇششىمسىز اڭگىمەلەرگە تولىق توقتاۋ جاسالدى.
سۇحباتتا رۋحاني تاقىرىپ تا قالىس قالعان جوق. پرەزيدەنتتىڭ مىنا سوزدەرىنە نازار اۋدارالىق. ء«بىز وتكەندى اڭساۋمەن ءومىر سۇرمەۋىمىز كەرەك. كەرىسىنشە, كەلەشەگىمىزدى كەمەل ەتۋگە ۇمتىلىپ, ۇلتتىڭ ۇلىلىعىن ناقتى ىسپەن دالەلدەۋگە ءتيىسپىز. دۇنيەتانىمىمىزعا جات مادەنيەتتەرگە كوزسىز ەلىكتەۋدەن, جالعان پاتريوتيزمنەن, داڭعويلىق پەن داراقىلىقتان ساقتانۋىمىز كەرەك. حالقىمىزدىڭ بويىنداعى كەمشىلىكتەرگە كوز جۇما قاراماي, ودان ارىلۋىمىز قاجەت. مۇنىڭ ءبارى كۇن سايىن قۇبىلعان تۇرلاۋسىز زاماندا ءومىر ءسۇرىپ جاتقان قازاقستاننىڭ كەلەشەگى ءۇشىن ايرىقشا ماڭىزدى».
بۇل – ۇلكەن مەسسەدج. بۇل ويلار ءبىزدىڭ تاۋەلسىزدىكتىڭ وتىزىنشى بەلەسىن ورتالاپ قالعان ەڭسەلى ەل رەتىندە ەگەمەندىكتىڭ ەلەڭ-الاڭىنداعى ەيفوريادان تولىق شىعىپ, دۇنيە دامۋىندا الدى-ارتىن باعامداپ, «اقىرىن ءجۇرىپ, انىق باساتىن» مەملەكەت رەتىندە ورنىققانىمىزدى ايقىنداپ وتىر. ۇرپاق ۇلتتىق قۇندىلىقتاردى بويىنا سىڭىرە وتىرىپ, ۋاقىت كوشىنەن قالماۋى كەرەك. ۇدايى الدا بولۋدى ءورشىل ماقسات ەتۋگە ءتيىس. اتا-بابامىز اتتىڭ قۇلاعىندا قالاي ويناسا, جاس ۇرپاق زاماناۋي اقپاراتتىق تەحنولوگيالاردى دا سولاي جەتىك مەڭگەرىپ جاتسا, ءۇمىتتىڭ اقتالعانى سول بولار ەدى. ۇلتتىڭ ۇلىلىعى, دارالىق, وتانشىلدىق سوندا عانا تانىلاتىنىنا كۋا بولار ەدىك. سۇحباتتا جالعان پاتريوتيزم, داڭعويلىق پەن داراقىلىق تۋرالى دەر كەزىندە ايتىلدى. قوعامنىڭ جەگىقۇرتى – وسىلار. جاساندىلىق پەن جالعاندىق ورىن العان جەردە كەرى كەتۋشىلىك, ابايشا ايتقاندا «وسەك, وتىرىك, ماقتانشاق» سياقتى جاعىمسىز ارەكەتتەر بوي كوتەرە باستايدى. ال بۇل كەساپاتتار ۇلتتى ەشقاشان ۇشپاققا شىعارمايدى. تۇپتەپ كەلگەندە, وتاندى ءسۇيۋ, اتا-اناڭدى سىيلاپ, جاقسى كورىپ, قادىرلەگەنىڭ ءتارىزدى جۇرەكتەن ساف تازا كۇيىندە شىعۋعا ءتيىس. ءبىز سوندا عانا ەتەك-جەڭىن جيناعان باياندى ەل بولامىز. سۇحبات وسى ويعا جەتەلەپ تۇرۋىمەن قۇندى.
قۋات بوراش,
قوعام قايراتكەرى,
جۋرناليست
